Ахъушала ши — ну акIуб­си мер саби, са­бира дебали жа­гаси, саркъибси, дила ур­кIи­лис бегI­лара дигуси.
Ахъушала ши гьанна Ахъушала районна дай саби. Ахъуша ибси дев цалабиркули саби ахъу — «чедибси», ша — «ши» ибти дугьбазибад. Илар лер Дайша, Хъарша, Хьарша, Панжи ва Семга бикIути къатIанира.
Ахъуша жявхIелла ши саби, иличила нушази бурули саби ванзала удир дургути гьаб-убла адамтала ваяхIли, гIягI­ниахълумани, лига-кья­кьяли.
Дила шилизир хаслира пикри бяхIчиаэс лайикьти мер-мусара лер. Илди сари: «Хала Мижит», «ядала вацIа», «къаркъуби адилтIуси мер», «ГIя­ли-ХIяжи Ахъушинскийла уличилси мижит» — ила бахъал ту­рис­тунира башули бирар.
Ахъушала бархIиличи-бар­хIи халабикIуси, гьалабяхI башуси ши саби. Илар адамти хIер­биэс къулайти шуртI­рира гIер­дуцили сари. Лер сагати больницаби, чумал школа, музей, библиотека, жу­ра-журала тукенти ва цар­хIил­тира. Ил ба­гьандан нушачи башути турис­ту­нира дус­личи-дус им­цIа­би­кIу­ли са­би. ИмцIаливан илди ядала ва­цIа­лизи, умуси гьава гьигьбарес башули бирар. Илаб вегIла гъамтачил къулайли замана бер­кIес вирар.
Ахъушала ши — бахъал писательтала, поэтунала, драматургунала ВатIан саби, чулира даргала литературала мез гьаладяхI ардукес халаси пай кабихьибти. Илди-ургав бегI гьалав гьанушес рирус Мя­хIяммад ГIябдуллаев — Писки МяхI, суненира «ХIяяла РяхIмат» бикIуси жуз дураибси. Наб чебуркъуб риш­тIа­хIе­лил илала назмурти да­кьес, гьар савли яслилизи ра­шу­хIели ну илала хъулрала мякьла тIаш­­рилзусири наб назму бел­чIа­хъес. ИшбархIира нуни илала шаласи сипат хъум­хIер­тис, ва иличила халаси пахруличил, разидешличил гьанбуршис.
Нушала шилизивадси, сунела пагьму наб дебали дигиаурси поэт, писатель сай Насруллагь ГIямаров. Илала дахъал назмуртира, поэмабира лер, илди-ургаб — ГIяли-ХIяжи Ахъушинскийличилара.
Сабурлара яхIлара
Ургьур цIацIали бурцу,
Дила ахъушантани,
Уркурли гIяра бурцу
Се балагьли булъалра
Дарган ламус хIебирцу,
Дила ахъушантани
Уркурли гIяра бурцу.
Вайси пикри, нясси кьас
УркIилизи хIедурцу,
Дила ахъушантани,
Уркурли гIяра бурцу.
ХIялалсила някъ бурцу,
ХIярамси гьалмагъ хIерцу,
Дила ахъушантани.
(Писки МяхI)

Аминат ГIябдулхаликьова,
ДГУ-ла филологияла факультетла 3-ибил курсла студентка