Дагъистайзирадси урегал дурхIяла нешли къел-хIерзи агарли беткахъибти СВО-ла бутIакьянчиби бургнила шайчибси саби-гIяхIъулатала хIяракат бузесаили сари. Индира цайналра дявила хасси балбуц бетурхуси мер-мусаличи рякьунси ахIен, амма «Рузи» ибси у (позывной) бихули сари. Илини дуги-хIери хIеили, умцIлаби дурадуркIули сари ва гIяхIцад бургъантас гъамси адамли ретаурли сари.
СВО бехIбихьибхIели, иткъира акьуси замана агарси бахъал дурхIнала нешли бургъантас сегъуна кумек гIеббаахъес рирусира или пикририкIулри Индира. ИлхIели СВО бетурхуси мер-мусаличи сунени дарибти секIулти дурхьес рехIрихьиб. Отпускличи бакIибти бургъанти хъулиб барибси нусиличил, хIяливаличил, берубси диъличил, рудачил, салатуначил, муридешуначил, компотуначил, мураббачил, кьанцIа шиннизир дарибти помидортачил, хияртачил дявила хасси балбуц бетурхуси мер-мусаличи арбашутири.
Дурхьути секIал гьачамличир-гьачам дахъдикIулри: Индирас бахъал бургъанти бахес дигулри. Дархьес хIядурдирути секIултала сияхI бягIубикIулри. 2025 ибил дуслизиб хьунул адамли хасти техника, дронти ва мотоциклти асахъес арц дурчуси кьукья акIахъуб. Кьанниван ил кьукья къел-хIерзи агарли беткахъибти бургъанти баргес умцIлаби дурадуркIес бехIбихьиб.
МягIничебси баркьуди дурабуркIуси Индирас бургъантани «Рузи» ибси позывной бедиб. Илини акIахъубси кьукьяличил улкала декIар-декIарти мер-мусаличибадти бургъантачи уркIи изути адамтира бархбикиб. Индирачи дугьаизалли, сунени рирусигъуна кумек гIеббиахъни балусири СВО-ла бутIакьянчибани ва илдала бегIтани.
«Халати жавабкардеш сари бургъантала гьалар. ЦацахIели нургъби хIилхIи тIашиули рирус. Хаслира къиянни бирар нуни бархбас кабизахъурти бургъанти бяхъили яра кабушили саби ибси хабар бакьасли, сенахIенну наб илди лебилра узби бетаурли саби. Нуни лерилра уркIилизи мурхьли духIнадурцулра. Дилара леб дурхIни, илдира дубурлан хьунул адамтала уршби сабигу», — буриб Индирани.
Бахъал дурхIнала нешли сунела «пост» балтули ахIен – бархIи-дугилизир бургъантачил ва илдала гъамтачил бархбасуни кадизахъурли сари. Ил баркьудилизиб дурхIнани нешлис икьалабирули саби. Лебтасалра кумек гIеббаахъес хIерирнили Индирала уркIи хумардешли бурцули бирар. Бургъантани баркаллала дугьбачил бархьибси видео илини бекIлибиубсигъуна шабагъатлизи халбирули сари.
«Фронтлизибти бугъантани ну чула рузизи халрирни халаси разидеш саби. Илдани кIибяхIяндеш итмаданал белгидирули сари, саби гьарли-марли чили гIеббурцулил, чи чучила кьакьаикIулил ва кумекла някъ гьабатес чи хIядурлил балули саби. Нуша вайтIа хIердирулрав? Чила гIяхIдешличирли нуша ункъли хIердирулра? Гьайгьайрагу, бургъантала гIяхIдешличирли сарра нуша ванати хъулразир хIердирути, илдани хандакьуназир дуги-хIери дуркIухIели. Нуша азадли хIердиахъес, нушала дурхIнала челябкьла шаласи биахъес багьандан сари бургъантани чула жан кьурбандирути», — баянбариб Индирани.
Бургъантас хIяжатти секIулти дурхьес мурталра-декIар сурсатуни хIедиъниличи Индира кьакьарикIули сари, амма улка мяхIкамбирути сен-биалра гIеббуцахъес ЧевяхIсини икьалабирниличи дебали разили сари.
ЦархIилтас кумекбарес хIядурти, бургъантала уркIила гьав ахъбурцути Индирала ва илдигъунти цархIилти хьунул адамтала гьалаб икрамбарес дигулра. Индира сунела гIямрула гьунчир гIяхIцад къияндешуначил къаршириркули сари, амма илдас мутIигIхIеракIили, гьаларяхI рашули сари, чедибдеш гъамбирнилизи пай кабирхьули.
Алевтина Краснобаева
