Къиянси заманаличи хIерхIеили, баркьудилизи ахъибти ва кумекла някъ гьабалтути дарганти бархIиличи-бархIи имцIабикIули саби. Ил дебали уркIи разибиэси анцIбукь саби.
СирхIянти жявхIейчибад ламуслис ва кумеклис някъ гьарзати адамти биъниличибли машгьурбиубти саби. Бахъал леб заманала башриличил барх, вачарла биаб, хъулри тIашдалтнила биаб, баркьуди гьалабяхI башахъули, фирмаби акIахъубли, гIялам ахъси даражала продукцияличил гIеббурцути ва гIяхIбаркьла баркьудилизи ахъибти сирхIянти. Илдигъунтазивад сай Цугнила шилизивадси Маллаев МяхIяммад МяхIяммадовичра.
Илала бегIти гIядатла дубурланти бири, чула бузериличил халаси кулпет абикьурти ва бархьси гьунчи дураибти. Илди мурталра шантачил цабалги барх бузули бири. Чула гIяпабаркь, жявли гIямрулизибад шалгIеббухъун. ЦIуръали халаваибси, кьацIла багьа балуси МяхIяммадла дудеш, учительла курсанира делчIи, Цугнила урга даражала школализив узули калун. ГIур шилизиб кьацI дуцIуси пекарня абхьибхIели, шантани ил хIянчиличи гьалаихьибсири. Илаб илини дахъал дусмазиб хIялалси хIянчи бариб. Неш ГIяшура биалли, халаси хъалибарг абилкьнила дурарад, колхозла хIянчиличира раши.
Илдала хIябал урши ва кIел рурси леб, чулира бузахъули чеббикIибси санигIятра, хъалибаргуначил жагали хIеркабирути. Наб ишаб бурес дигуси хъалибарглизивад бегIлара виштIалгъуна МяхIяммадличила саби.
Шила школа белчIи гIергъи ил, халати узбачил варх стройкала декIар-декIарти хIянчи дирули узес вехIихьиб. СанигIятла чихъти устадеш лерни багьандан, бахъал сабри иличи хIянчи барахъес башути. ГIергъити 10 дусра-сера МяхIяммад прорабла санигIят бузахъули, хьулчиличирад дехIдихьили хъалчличи бикайчи лерилра хъулразирти хIянчи дирес вехIихьиб, хIянчизартасра бекIдеш дирули. 2023 ибил дуслизиб илини цархIилтачил барх строительная фирма акIахъубли, ахъти дерхIанала юртани тIашдалтули узули сай. Бахъал дагъистанланти, илдала лугIилизиб — гIяхIцад цуглантира, хъулрачил гIеббуциб.
Илала дурабадра МяхIяммадли шилизир дурадуркIути лерилра далдуцуназир жигарла бутIакьяндеш диру, детурхути билхъабачи вашар ва арцла шайчиб кумекбиру. Дебали дигеси анцIбукь саби илдигъунти адамти шилизиб лебни.
ГIурра кумекбирахъес ахърира, арадешра имцIадараб Кьудратла ВегIли сунес!
Кьади ГIялисултIанов
