Улкала жамигIятли лерилра чула цIа­кьа­ни ва пикруми дявила хасси балбуцличи дяхI­чиаили сари. Гьарил гъазализив сай нушала Чедибдешлизи бел­гиси пай ка­бихьес.
Дагъиста Халкьла Собраниела де­путат, ДГУ-ла профессор Узлипат ХIя­са­новара ил шайчир жигарчерли рузули сари. Баягъи Узлипат ХIясановала бекI­дешлиуб гьанна чумал дус бузули саби бургъантас дебали гIягIнити чус «маскировочные сети» или ирути ваяхI дурайуси центр. Ил балкьаахъурли саби «VIP Кулинария» бикIуси берклуми дирес бурсибируси Центрла юртлизиб.
Гьалабван Дагъиста халкьла поэт Аминат ГIябдул­ма­на­­по­вачил барх «Замана» га­зетала коллективра ила гьаб­­бакIиб ва бегIлара дяви бемжурси мер­личир ургъанна мяхI­кам­дешлис де­бали хIя­жат­ти сетани душнила хIян­чилизир бутIакьяндеш дариб.
ХIяракатла руководитель Уз­­липат ГIусмановнала гъай хIя­­­сибли, «маскировочные се­­ти» нушала бургъантани хас­­­­­лира тIалабдирутигъунти ваяхI­­­­­лизи кадурхули сари. Ил ба­­­­гьандан илди, нушани сецад да­­хъал дарахIеллира, дахъ­хIе­ди­р­ар.
«Ишди сетаназиб диги­ли­чил бигьунси гьарил гIянд­ли­зиб ил бигьунси хьунул адамла ванадеш кавлули саби. Ил ванадешли биалли СВО-личир нушала бургъантала гIямру уцахъули сари ва Че­дибдеш гъам­бикIахъули саби», — ри­кIи ил.
Гьанна «VIP Кулинария»-лизи сетани дирнила хIянчи барес жура-журала организациябала хIянчизартала кьукьни, студентуни, школабала че­дирти классунала дурхIни башули саби. Илкьяйда биалра, дузути някъби камли сари.
АхIерти гьалмагъуни! Да­ширая, сетани дирнила хIя­лал­си, нушала бургъантас ва улкалис чараагарли хIяжатси баркьудилизир бутIакьяндеш дирес бажардибирехIе. «VIP Ку­­линария»-ла жагаси центр­ли­зиб, хIерели дакIили, бар­хIи­­ахъайчи дузра дузули, чяйлара бужули, замана беркIес ди­рехIе.
Адрес: МяхIячкъала, Имам Шамилла уличилси кьакьа, 1Е ибил юрт, 3-ибил дерхI.
Дагъиста Халкьла Собраниела депутат, гIялим ва ДГУ-ла профессор Узлипат ХIясанова, бургъанти гIеббурцули, илдас гIягIнити ваяхIли дицIахъибти машинаби дурхьули, школабазир «Игитла Парта»-би ибхьнила, мармар къаркъала уркьли диршнила ва цархIилти мягIничерти масъултас хасдарибти далдуцуназир жигарла бутIакьяндеш дирули, рузуси адам сари.
Узлипат ГIусмановнала дахъал шабагъатунира, Баркаллала кагъуртира лер. Илди-ургар — 242 ибил МСП-ла командир, гвардияла полковник Л.Щет­кинна шайзибадси Баркаллала кагъар, 73641 ибил гIяскарла частьла командир А.Стрепковла шайзибадси Грамота, «За оказание помощи участникам СВО» бикIути медальти ва цар­хIил­тира.
«Дявила хасси балбуцличир, гьар бархIи къиянти дявилати къуллукъуни дура­дур­кIули, гьаларти къяя­назиб бургъантас илди хъум­хIерт­ни ва гIеббурцни дебали чараагарси саби.
ХIед чIумаси арадеш, гIяхIдешуни ва бузерилизир ахъти сархибдешуни диаб.
ХIуни кабирхьуси пайла ва хIела гъирачердешла гIяхI­д­ешличибли ну­шаб цаси Чедибдеш гъам­бирули саби» или цабутIаван белкIи саби командованиела кагъуртазибад цализи.
Бурес гIягIнибиркур, СВО-ла бу­тIа­кьянчиби-ургаб Узлипат ХIя­са­но­валара гъамти леб. Се­цад хIейгеси биалра, илдала лугIилизиб алхунтира леб.

ПатIимат Казимова