Чумал бархIи гьалаб дила узи СултIангIяхIмадли иб: «Сен хIушани дила юлдаш ХIяжи Рабазановличила хIелукIулрая. Илини СВО-ла бутIакьянчибас ва илдала хъалибаргунас халаси кумек бирулигу!»
Гьанбикиб цагьачам Усишала шилизи дякьунси замана, — районна бекIла заместитель, районна хьунул адамтала Советла председатель Эльвира ХIя­сан­хIусейновас, социальный бяхI­чи­бизлизиб адамти гIеббурцуси управлениела хIянчизар Ба­рият ГIисаевас ва наб дебали гIяхIси, гьарил адамла ур­кIилис кьабулбикеси балбуц чебаэс кьадарбиуб.
Ил яшавла шуртIри гIяшти хъалибаргуназибадти, бегI гьалаб школализи аркьути дурхIнас хIяжатси секIал асахъес кумекбирнила шайчибси балбуц сабри. Кумек гIеббаахъибсири «Усиша» СПК-ла руководитель ХIяжи Рабазановли. Чебаибсири нушани, сецад разибиубтирил дурхIнала нешани ва секьяйда уркIи-уркIилабад баркалла бикIули, булгутирил.
Гьаннара нуни ХI.Рабазановла гIяхIти баркьудлумачила чуйнара бакьили хьалли, ихтилатбарес бетхIерули лебалсири, — ХIяжи дебали бузерилизи вархибси адам сай, дигалли дубуртазир, дигалли диркьаличир илини дахъал хIянчи бекIдирули вирар. Ил сабабли иличил къаршиикесра гьамадси баркьуди ахIенри. СултIангIяхIмадли тиладибарибхIели, районна газетала редакциялизи ухIнаухъунси ХIяжила баркьуди, бархьли бурасли, дебали гIяхIбизур.
…ХIяжи Рабазанов «Усиша» СПК-ли (гьанна илис «Агрофирма» бикIули саби) бекIдеш дирули 1994 ибил дусличивад узули сай. Пикриухъалли, халаси манзил саби ил — 32 дус шила хозяйстволизиб бузуси организациялис бекIдеш дирес, хаслира — дубурла мер-мусаличир, сенахIенну ванзурбира цаличирад ца гьарахъти, чумал мерличи дутIибти сари, тIабигIятла тяхIяр-кьяйдара чумра жураличи дикес дирули сари, шанти кьабулли биахъесра гьар бархIи вегIличи вегI чекайзес чараагарси саби.
— БусягIят нушала хозяйствола 4 азирличи гъамли мазала мас лер дихIули Ногъайла районна мер-мусаличир, урегал бригада дузули сари мицIираг адилкьули, — буриб ХIяжини. Дебали гIяхIбизур илини сецад халаси хIурматличил дурибал илаб бузути, бригадабас бекIдеш дирути адамтала уми: Замов МяхIяммад ГIяхIмадович, ГIябдуллаев МяхIяммад ГIябдуллаевич, ГIямаров Ибрагьим МяхIяммадович; мицIираг адилкьнила агиличи хIеруди гIеббурцули сай сунела заместитель, хIяйвантала тухтур Булатов Шамил ГIябдулмажидовичли.
Дубурла мер-мусаличиб 49 дуслис районна администрацияличил вягIда барили, ижаралис сасибси ванза леб бузахъули. Бригадир сари ПатIимат МуртазагIялиева. Дугени хIядурдаресигъуна мер агарли, илди исути диъниличилара буриб ХI.Рабазановли.
— Хозяйство бузахъули гIергъи, илала шайзибад кумек агарли биэс асубируси ахIен. Чи левал шила ухIнав зягIипикибси, яра шилизиб сегъуна-биалра балбуц дурабуркIухIели, мисаллис буралли, ХъубяхIрумала байрам, икьалабарес къайгъибирулра. ХIера, гьалабванра кумекбарира зягIипти кIел биштIати медицинала Центрлизи букахъес, — даимбариб сунела буруси ХIяжини.
Гьар дус Чедибдешла БархIила хIур­мат­лис Усишала шилизир дурхIни-ургар шахматунала, шашкабала шайчир абзани ду­радуркIули сари ва гьалабикибтас агрофирмала шайзирад савгъатуни дедлугули сари.
Усишала шилизибси дурхIнала анхъ мерлабиубси юрт гапла хIебиъни пикрибарили, «Усиша» СПК-личи белкIунси ванзализибад гIягIнисила кьадар декIарбарили, дурхIнала анхълис сагаси юрт барахъес ва биштIатасра, бузутасра гIяхIти шуртIри акIахъес кьасличил районна администрацияла ихтиярлизи беднира ХIяжи Рабазановла гьайгьайрагу, баркаллаличи лайикьси баркьуди саби.
СВО бехIбихьибхIейчирад «Усиша» СПК — агрофирма кумекхIебарили шайчиб кавлули ахIен. Бургъанти гIеббуцили саби арцличил, берк-бержличил, медицинала гIягIниахълумачил. Дявилизир хIя­жат­диркути секIал асахъес гьаларван 400 азир къуруш дархьиб. СПК-ла бухгалтер Хамис ХIянаевани сунела шайзирад асили, 100 кьацI дархьиб. Куркила школала завучли узуси Хамисла урши Ихинданов Руслан Ихиндановичра дебали гьарилличи чеветаибси, халкьла баркалла сархибси адам сай.
ХIяжи Рабазановли баркаллаличил гьандушиб сунечил барх СВО-ла бургъантас кумек гIеббурцутала умира. Илди саби ХIерхмахьила СПК-лис бекIдеш дируси МяхIяммад МяхIяммадов, «СирхIя» СПК-лис бекIдеш дируси Рабазан СалихIов, Гьебала — Мухтар ХIяжиев, ХIинтIала — ХIяжи ГIялимяхIяммадов.
— Лебталалра уми делкIес хIейрар, бургъантас кумек хIебируси Ахъушала районнизиб цалра хозяйство агара, — викIи ХI.Рабазанов. — Нушаб ил шайчиб гIибратли бетаурли саби районна шила хозяйствола управлениела начальник Дауд­хIяжи Даудов ва илала заместитель МяхIяммад ГIи­саев.
ХI.Рабазановли Дахадаевла районнизивадси дарган гъабза МутIалим МутIа­ли­мовли бекIдеш дирули бузуси интербригадаличил бархбас кабизахъурли, илала баркьуди гIеббуцили, уржили хIянчи дурабуркIули биъниличилара буриб. Гьалабван кумекбариб шин чедидухъи, зарултази бикибти Мамедкъалала халкьлис. ГIяли-АсхIяб МяхIяммадовла бекIдешлиуб жагьил адамтала кьукья ил мерличи бякьун ва мер-муса далдирули бузули калун, продуктуни, генераторти духиб. ЦархIилти хозяйствобазибадра илдас гIяхIцадла кумек бетаур.
— ГIяли-АсхIяб дила узикьар сай, баркалла викIеси баркьуди саби илини дурабуркIусира, —буриб ХIяжини.
СВО-ла бургъантас кумек гIеб­буцнилис, ГIяли-АсхIяб Мя­хIям­мадов кьяйдали, ХIяжи Рабазановра Баркаллала кагъуртачи ва хасти шабагъатуначи лайикьвикили сай.
— МутIалим МутIалимов гIяхI­гъа­бза адам сай, Афганистайзив калунси, гIямрулизир чIумати дебш касибси. СВО-лизив левсири илала урши, тухтур, бяхъибтачи хIеруди бирули узуси. Дебали децIагиб ил агарвиънила хабар бакьибхIели: душмантани госпитальлизи игьубли буилри, — децIличил буриб ХIяжини.
Марлира, дургъбани мяштI­ви­руси агара чилра. «Дявила анцI­бу­кьуни жяв-жявли ахирличи дикалри — Россияли пикрибарибси тя­хIярл­и» или дикIес саби кавлусира.
… Нуни ишди бурхIназиб белчIунра «Комсомольская правда» газетализиб дурабухъунси СССР-ла ВегIла гIергъиси маршал Язовла макьала. Илини лукIули сай Горбачевла ва Ельцинна бархьагарси политикаличила, чулира халаси, кьуватси пачалихъ тIутIубиахъубси. «Владимир Путинни Россияла пачалихъ берцахъиб, илала мерличив гIякьлуагарси адам виалри, Россияла пачалихъ бекIлил агаркабиэс асубири», — белкIи сай маршалли. Нушачибра чебсили бетарули саби Россияла Президентла баркьуди гIеббуцес ва ахърибикIуси тяхIярли бургъантас кумекбирес, —буриб ХI.Рабазановли ихтилатла ахирлизиб.
Ишди бурхIназиб Ахъушала районна администрациялизиб бетерхурси балбуцличиб баркалла багьахъурли, шабагъатлабариб СПК-бала руководительти ва предпринимательти, чулира шимазибти халкьла гIямрула даража ахъбуцес къайгъибирути ва СВО-ла бутIакьянчибасра илдала хъалибаргунасра кумек гIеббурцути. Илди-ургав леври ХIяжи Рабазановра. Гьаннала гIергъира диаб сунес ара-сагъти гIямрура халкьла баркаллара!

ПатIимат Маллаева