Ишди бурхIназиб ректоратла конференц-заллизиб ДГУ-ла ректор МуртазагIяли Рабадановличил бахъал журналистуни, бучIес каберхес хIядурбикIути дурхIнала бегIти, абитуриентуни гьунибаиб.
ГIядатли биубли гьарил дус дурабуркIуси пресс-конференция, ишдуслизибра ВУЗ-лизиб бучIес каберхес дигутала гIярзаби ва документуни кьабулдирни бехIбихьнилис хасбарибсири.
ДГУ-ла багьуди бедлугнила шайчирси проректор А.ХIясанхIяжиевани лябкьуси белчIудила дусла лерилра сагадешуначил цалабикибти тянишбариб.
Илдазирад мягIничертигъунти дила белкIлизир гьаладирхьулра:
— 2026-2027-ибил белчIудила дуслизиб пачалихъла харжаначил бучIахъес ДГУ-лизи 1257 абитуриент кьабулбиру. Ириъ илдигъунтала лугIи 1158-личи халбиубсири.
— ВягIда хIясибли, ДГУ-лизиб чебяхIси даражала багьудила программабазиб 2400 абитуриент бучIес каберхес бирар.
Физико-технический, информатикала ва багьахънибалашалти технологиябала факультетунани сагати программаби сари:
— «Робото-техника и системное программирование», «Программная инженерия», «Вычислительная физика и информационные технологии» дикIути санигIятуначи студентуни хIядурбирути программаби ишдуслизир дузес дехIдирхьули сари. Сагати программабани, чихъти технологиябачил бузес бурсидеш лебти специалистуни хIядурбарахъес имканти алкIахъу.
РАН-на ДФИЦ-личил бархли «Прикладная информатика в инженерно-физических иследованиях» бикIуси программа хIядурбарили саби ва ишдуслизиб ил бузес бехIбирхьур.
Университетли дахъал шалубазиб бузес устадеш лерти экономистуни, юристуни, учительти, гIурра гIяхIцад санигIятунала бегIти специалистуни хIядурбиру. Илар цазаманализиб бучIули кIел диплом касесра имканти акIахъубли сари.
Ишдуслизив учIес кархуси студентли шел вузлизи документуни дедес, сунени чеббикIибси санигIятлизирти бяхIчибизунала шел программабазив учIес вирар.
ДГУ-лизи документуни дедес вирар: хасли приемная комиссиялизи, Госуслуги ва «Поступление в вуз онлайн» бикIути порталтала кумекличил.
Ириъличил цугдуцибхIели ишдус вузлизи керхес имкан лугути бегIлара камти баллани бара имцIадарили сари; информатикала – 46, обществознаниела – 45, урус мезла, математикала, физикала, химияла, биологияла, географияла, историяла, литературала, дурала улкнала мезла – 40 балл.
ДГУ-лизи бучIес каберхес дигутала документуни июньна 20-личибад бехIбихьили кьабулдиру. Июльла 25-личиб ил хIяракат ахирличи биркур. БучIахъес кьабулбарибтала сияхI июльла 27-личиб кабирхъу. ДГУ-лизив учIес дигуси абитуриент августла 1-личив, сягIят 12 дикибхIейс кьабулварили виэс гIягIниси сай. УчIес кьабулбарниличила хIукмурти августла 7-личир дуракаили дирар.
Цалабикибтала, ва бучIес каберхес дигутала бегIтала, журналистунала ДГУ-ла ректорлизи хьардиути дахъал суалти лерри. МуртазагIяли Хулаттаевичли лерилра суалтас чедетаахъибти жавабти дедиб.
Ректорли абитуриентуни республикала бегIлара халаси ВУЗ-лизи бучIес каберхахъес жибирулри, илаб багьуди ва бяркъ касес гIяхIти имканти лерниличила бурулри: «БучIес кабурхутас хасдарибти лерилра тяхIяр-кьяйда, чедетаахъили делкIунси багьахъни нушала сайтличиб леб. Илди тяхIяр-кьяйдала шайчир сегъуналра ташмишдеш яра бархибдеш диэс хIедирар».
Муъминат Хаттаева
