Жагьдеш — гьар адамла гIямрулизиб хасси манзил саби. Ил манзил гIямрулизир дахъал анцIбукьуни кадиркули сари. Жагьилтала сагати гьаргбаркьуни, пикруми-сиптаби ва хьулани дирар, илди дунъяличира бархли цархIил тяхIярли хIербикIар. Бурес вирар, жагьил наслу нушала халкь гьалабяхI башахъуси, саби-алав дунъя барсбируси наслу саби.
Гьаннала заманала жагьил халкьли жамигIятла декIар-декIарти далдуцуначир жигарчерли бутIакьяндеш дирули сари, цацабехIтани биалли — илди чулира пикридарили, дурадуркIули сари. Далдуцуни спортличил, гIилмуличил, пагьмуличил дархдасунти дирар. ГIергъити дусмазир имцIадикIули сари саби-гIяхIъулали кумекбирутала организациябира, иларра имцIаливан жагьилтани бутIакьяндеш дирули дирар. ЦархIилтас икьалабирули, илди рухIлашалра гьалабяхI башули саби.
Ил манзил адамли сай чи ветаэс дигулил чеббикIили, ил бетуцлизир сегъунти-биалра сархибдешуни диахъес халаси къайгъи дакIубиру. Гьаннала жагьилтас дахъал гIяхIти имканти лер, гьарил кьялилизи гьундури абхьили сари. ХIебиалли, чус дигусигъуна бяхIчибиз чеббикIесра имканбикIур. БегI гьалаб – къияндешуназирад уруххIекIули, мурталра гьалавяхI вашес ва вегIла цIакьличи вирхес гIягIнили саби. Чула хьулани детаахъес багьандан, илдас жавабкардеш дихутили, мурад сархес кьасличилтили ва бузериличи дигичебтили биэс чебиркур.
Ахирлизиб лебилра жагьилти чула БархIиличил мубаракбарес дигулра. Сегъунтилра къияндешуназирад уруххIекIули, хIушала кьасани детаахъес къайгъибарая.

Ханум ГIялиева