Даргала театрла сценала гьавкьяси уста, театрла ва кинола пагьмучевси гIяртист НурбяхIянд Идрисов «ДР-ла урибси гIяртист»-ла уличи лайикьикили сай.
Июньна 12-личиб — Россияла БархIи Дагъиста БекIла къуллукъуни заманалис дузахъуси Фёдор Щукинни республикала декIар-декIарти кьялубазир сархибдешуни диахъубти хIянчизарти шабагъатлабирнила балбуц дураберкIиб. Ил бархIи СВО-ла бутIакьянчибас, мугIяллимтас, тухтуртас, гIилмула ва культурала хIяракатчибас РФ-ла ва ДР-ла пачалихъунала шабагъатуни дедиб. Регионна театрла искусство гьалабяхI башахънилизи Н.Идрисовли кабирхьуси пай хIербикIутаницунра ахIи, республикала санигIятлашалти адамтала цахIнабиклира ахъли кьиматлабариб.
Гьар рольлизир халати устадеш чедиахъули, театрлизив 24 дус узуси гIяртистличи илгъуна хIурматла ура лайикьли саби. Ил, театрла гIяртистуназивадли, урхIмешуахIенти ва лерилра журала ролани дузахъуси гIяртист сай. Илини драмабазир, дукелцIила ва дурхIнас хасдарибти сихIрула спектакльтазир жигарла бутIакьяндеш дирути сари.
«Фатима», «ИсмягIил ва Мария», «Гульжанат», «Къагъси муэр» бикIути драмабазиб Н.Идрисовли сунела халати устадешличил хIербикIути хIяйранбарибтири.
«Гелешмешуни», «Баки дила Серминазлис», «Тамашала къунбала бархIи», «Убай неш», «Магьар кабушни», «Чонайла мекъ», «Русское лото» дукелцIила спектакльтазир гIяртистли дузахъути роланира хIербикIутас дебали гIяхIдизуртири.
НурбяхIянд Идрисов санигIятлашалти устадеш мурхьли дяркъурси гIяртист сай. Сунени бурни хIясибли, спектакльтачи хIербикIутала хьулани мархIедарниличиб вайси секIал агара, ил багьандан лерилра имканти пайдаладирули сай сунела гьалаб тIашбатурси масъала ункъли бетерхахъес багьандан.
Дагъиста урибси гIяртист НурбяхIянд Идрисовлис хIянчилизир сархибдешуни, уркIила ахъси гьав, гьар баркьудилизир гьарбизуни дулгехIе. Пачалихъла ахъси шабагъат ахIерси театрла, республикала ва улкала гIяхIдешлис гьалавяхI вашнилис гьаликIли бетааб!
Маргарита Арсланбекова,
ГIямарла Батирайла уличилси Даргала театрла жамигIятличилти бархбасунала шайчирси специалист
