Районна больницала чейхъути излумала отделлизиб бузути хIянчизартас дарести камдиубси замана бекIлил биэс хIебирар или гьанбикесли саби: аргъ бугIярхIели — гриппла авара; ванабиалли — цIедешлизибад агъулабиубти, се-биалра кьацIбикунти, кьаркьа чехIейсудеш (аллергия) дакIубухъунти ва дахъал цархIилти сабабтачиблира дигалли халати, дигалли биштIати больницализи биркули саби.
Ил отделлизиб бузути хIянчизарти бахъал агара, хIябал адамли илцад дахъал хIянчи бекIдирниличи тамашахIейэслира ахIен. Чучи мурт ухIнаухъаллира—дяхI шалали бирар, сегъунти баянти хIяжатлил газетализи делкIес, итмадан хIеръили кайсули бирар.
Отделла заведующий сай жагьил тухтур, сунела санигIят ункъли бяркъурси ва чекайзурли дурабуркIуси МяхIяммадгIялиев МяхIяммад ХIясанович, чебетаибти хIянчизарти саби иличил барх бузути медсестраби ГIисаева Разият Пирбудагъовна ва Баркакьадиева Раисат Расуловна.
Ишди бурхIназирра ну ил отделлизи гьарракIира ва хIянчи сен-сен бетурхулил ихтилатбарира. Нуни чедаира декIар-декIарти дахъал отчетуни сарира отделла хIянчизартани гьар базлизир далкьаахъурли, республикала арадеш бихIнила Министерстволизи дурхьути.
Нуни илдазибад ца отчет някъла касили, хIербарира ва чебаира вакцинаби дирнила шайчиб районнизиб дурабуркIуси хIянчи сегъуна агиличиб сабил. Отделли хIерудибирути ва чейхъути излумачи къаршили дирути авцIанну цара журала прививка лерли дуили сари! Илдазибад гьарил чейхъуси изайчи къаршили чум адамлис, хаслира биштIатас прививка барес гIягIнилил дусла бехIбихьудлизиб план балкьарахъули саби, ва ил таманбарес чебетаибси хIянчира бирули, ургаб замана арбякьунхIели тикрардирутира кьанхIедиахъубли дарахъес хIядурбирули саби.
2026 ибил дуслис барибси план хIясибли, хаслира имцIали саби ревакцинация (вакцина тикрарбирни) ишдигъунти излумачи къаршили: столбняк, дифтерия, полиомиелит, аринж, хIунтIена дакIри (краснуха), эпидемический паротит, туберкулез, вирусный гепатит, грипп, бруцеллез, пневмококковая инфекция.
Дахъал агара диалра, прививкаби дирули сари сибирская язваличи, багьбиъниличи (бешенство) ва цархIилтира камли къаршидиркути излумачи къаршитира.
«Прививкаби дирахъни къиянбулхъулив?» хьарбаибси суайс отделла хIянчизартани жаваб гиб. «Къиянбулхъуси заманара лебри, гьанна цакьадар гьамаддеш леб, халкь-ургаб дурабуркIуси иргъахънила хIянчи жигарчеббарнила гIяхIдешличибли».
Ил сабабли бургар прививкаби дирнила шайчибси хIянчи ириъличиб ишдуслизиб гIяхIцадла къулайбиубси. Отчетлизирти лугIурбачи хIерикIалли багьесли саби планнизир чедаахъибти хIянчи гьунчидиркахъули диъни. Мисаллис буралли, гIяскуртазиб къуллукъбарес аркьути жагьилтас прививкаби дирнила шайчибси дусла план июньна цалис 75 процентла кьадарлизир таманбарили саби; цархIилти чейхъути чедир дурибти излумачи къаршили прививкаби дирнила шайчибси планра 45-50-процентла хъараахъурли саби.
Ил отделла хIянчи, гьайгьайрагу, прививкаби дирниличилцун ахIен бархбасунси, ишаб бузути хIянчизартани гIурра дахъал секIал къелгIердикули сари ва лерилра илди ца белкIлизир гьандушес хIейрар.
Мисаллис буралли, гьар базлизиб башули саби шимазирти медицинала учреждениебази, ахтардибирули саби илаб бузути хIянчизартани чейхъути излуми тIинтIхIедиахъес багьандан бируси хIянчи; ахтарди дурабуркIули саби районна больницала отделениебазиб. Барибси хIянчила черкад 12 журала отчет кьанхIедиахъубли дурхьули сари республикала Министерстволизи. «Ин ша Аллагь, гIурра къаршидиркехIе, хIушала къайгъначила сагали лукIехIе, жигарчерли дузахъес хIушаб арадеш габ!» — или дурарухъунра.
ПатIимат Маллаева
