ГIямрулизиб мекелли халаси мер бурцули саби газетаби-журналтани ва жузани. Илдани адамла рухIла давла чебирцIахъуси саби.
Дила пикрили, мягIна гьатIиралра дурхъасили кабилзан илди нешла мезла диалли. Гьанна гьар-чинаралра урус мез дузахъухIели, вегIла нешла мезличил дурадулхъути газетаби-журналти, поэтуни-писательтала жузи лерни нушала игъбарлизи халбарес вирар. Нешла мезли пикривикIесцун ахIи, илди дузахъесра имканбикIули, иличибли рухIла давлара чебирцIахъухIели, талихIлизи бейгIесра вираргу.
ГIяхIцад дусми гьалабра, белкI-белчI хIебалухIелира даргала шягIиртани назмурти цаладирхъутири, халкьли илди цализи цали дурули, нушачира кам-гьамли биалра даахъиб. Илдала бухIнабуцлизибад нушани пасихIдеш, гIякьлула мурхьдеш иргъулра.
ГIямрула хIял-хIякьикьат сари лертиван сипатдирути нушала даргала машгьурти поэтуни-писательтала произведениеби дучIухIелира рухIла давла чебирцIни якьинси секIал саби. СенахIенну илдазиб учIанни игитунала кумекличил вайсира гIяхIсира балули саби, зараллати къиликъунала бегIтазибад тяйдибиубли, адамтас гIяхIдешуни дарес гьалактачил гьалмагъбикес гьуцIбикIули саби. ХIебиалли жузи, газетаби нушала гьарли-марти насихIятчибилира детарули сари, чулира сегъунти-биалра аги-кьяйдализиб секьяйдали вяшикIес гIягIнилил гIеббурути. Ил багьандан дигахъаси гьаннала жагьилтани нешла мезла жузи, газетаби, журналти дучIули, илабад чус багаладиэсти гIякьлуми дургули. Бургьаб нушала рухIла давла ва ил кьиматлабиранти имцIабикIаб!
Салимат ГIялиева
