Иш суратлизиб хIушани чебиути рурсби бузути саби Ахъушала районна больницализиб. Илдани халкьла бухIнаб хIурматра сархили, илдала баркаллаличира лайикьра бикили саби.
Разият Чупановна акIубси сари Усишала шилизир, хIурматла хъалибарглизир. ГIяхIти кьиматуначил медучилищера таманбарили, медсестрала санигIятличи регIриубли, гIяхIцад дусмазир сунени касибси санигIятлис марли районна больницализир рузули сари,. Разият ГIялиханова чумал ахъси даражала шабагъатуначи лайикьрикили сари. Илди-ургар лер: дахъал дусмазир жавабкардешличил рузули хIялалси, уркIецIичебси хIянчи бирни багьандан «Россияла ХIунтIена Къанч»-ли бедибси ХIурматла Грамота, «Ковид-19» бикIуси чейхъуси изайчи къаршиси хIянчи бетерхахънилис, илизибад халкь берцахъес къайгъибарнилис ва сунени касибси санигIятлис мардеш чедаахънилис ДР-ла БекI В.Васильев узухIели бедибси Баркаллала кагъар, Дагъистан Республикала арадеш мяхIкамбирнила Министерствола шайзибад бедибси ХъумхIертнила Грамота, «Ахъушала район» МО-ла администрацияла шайзирад дедибти ХIурматла Грамотаби.
МухIела шилизирадси ТагIяева Па­тIимат ГIямаровнани Каспийск шагьарлизибси медицинала училище таманбарили, дахъал дусмазир рузули сари Ахъушала районна больницализир. Илала бу­зерила стаж 40 дусличи абики­ли саби. ПатIимат реанимацияла анестезиологияла отделлизир ха­лалгъуна медсестрали рузули са­ри. Иличил ну тянишриубсири 2000-ибил дуслизиб дила хала дудешлис инсульт бетаурли, больницализи каркьес чебуркъубхIели. ИлхIейчибад ПатIиматличила дила гIяхIси пикри акIубсири, сена­хIенну, илини зягIиптачи бируси чебетаахъибси къуллукъ ва хIе­руди чедаибхIели. Сегъуна ур­кIе­цIиличил, масхуртачил, зя­гIипти уркIичеббарес малхIямли гъай­рикIули, ихтилатрикIули, хIеруди бирулрил илини. Бурес гIягIнили саби ПатIиматли Ковидла замана урехиагарли халкь берцахъес барибси къайгъиличилара. БегIла къиянси манзиллизир, больницализибти ил изайзи бикибти зя­гIиптачира хIеруди барили, хъали-хъайгIи рашули, ПатIиматли ка­пельницаби кадилзахъули, уколти дирули берцахъибти, сагъбиахъубти адамти багьандан илини халаси баркалла сархиб. ПатIимат чумал ахъси даражала шабагъатличи лайикьрикили сари. Илди-ургар лер: Дагъистан Республикала Правительствола, РФ-ла арадеш мяхIкамбирнила хIянчизартала ДР-лизибси профсоюзла организацияла, «Ахъушала район» МО-ла администрацияла шайзирад дедибти ХIурматла Грамотаби.
Бутрила шилизирадси Исмя­гIи­лова Мадинат ГIялибе­ковнани 1983 ибил дуслизиб МяхIячкъала шагьарлизибси Дагъиста медицинала университет хъараахъурсири. Мадинатли «Къалабаси кумек»-ла машиналичир рузули, 40 дус хIянчи барили сари. Мадинат илди дусмазир бахъал зягIиптачи раибсири. Дуги-хIери цадарили, рузули ва изала белгибирули илини бахъла гIямру дерцахъибти сари. Ковидла заманара ил урехиагарли зягIиптачи рашусири, сунени касибси санигIятлис марли калун. Пачалихъла шайзибад бузери кьиматлабарили, чумал шабагъатличи лайикьрикили сари ил.
Зилмукьмахьилизирадси Мя­хIям­мадова Зулайхат ХIиз­буллаев­нанира сунечи хъарси хIянчи чебетаахъили, жавабкардешличил бе­турхахъули сари. Зулайхатли Ставропольла медицинала колледж таманбарибси саби. Ахъушала районна больницализир рузули, илини гьанна 11 дус хIянчи барили сари.
Разият ГIялихановачила, Па­тIи­мат ТагIяевачила, Мадинат Ис­мя­гIиловачила ва Зулайхат Мя­хIям­мадовачила бахъал саби гапбикIути адамти, зягIиптачи чебетаахъили хIеруди бирули саби или. Чучи хъарси хIянчи жавабкардешличил ва устадешличил бекIбирули саби илдани. Чули касибси санигIятличи балбикибти, хIурмат сархибти, илди цархIилтас гIибратли бетаурли саби.
Чус чIумаси арадеш, гIямрулизир ва бузерилизир сархибдешуни диаб, гьарилла хъалибарглизиб балгундеш ва баракат имцIадикIаб! Чула дурхIнани ва дигутани разибирули хIербиэс кьадарбиаб!

Сабият ГIябдуллаева