Ахъушала районнизирти багьудила урегал учреждениелизир дурхIнала дуцIрумла каникултала манзиллис абхьибти, хIерила замана бамсриихъахъес ва арадеш къулайбирахъес хасдарибти лагерьти лер дузули. Илди абхьибти сари июньна бехIбихьудлизир.
Лагерьти лерти сари «Радуга» бикIуси Усишала лицейлизиб, «Орленок» бикIуси – ТIебекмахьила ва «Непоседы» бикIуси – ХIерхмахьила урга даражала школабазир, цагьакIли 100 дурхIя кьабулбирути, илдазир лерти сари кIикIел смена. «Надежда» бикIуси – Усишала хIябъибил номерла, «Дружба» бикIуси – ГIялиханмахьила, ва «Рассвет» бикIуси – Ургубамахьила урга даражала школабазир лерти сари, цагьакIли илди хIябалра лагерьлизиб 60 дурхIя кьабулбирули саби, илдазирра кIикIел смена лерти сари.
ГIядатли бетаурливан, гьар бархIи лагерьтазибти дурхIнала савли зарядкаличибад бехIбирхьули саби. ГIур бархIиахъайчи дурхIнани жура-журала хIязаназир, спортла шайчирти абзаназир, суратунала ва цархIилтира конкурсуназир, викторинабазир, делхъани дирули, далуйти дучIули, назмурти дурули, шадлихъуназир бутIакьяндеш дирули саби. ДурхIнани иштяхIличил замана буркIули саби.
ДурхIнас лагерьтазир гIяхIти шуртIри акIахъубли сари, халаси замана тIабигIятличиб буркIули, илар жура-журала хIязанира дурадуркIули. Лагерьтазир воспитательтани гьар бархIи жура-журала далдуцуни дурадуркIули сари. ДурхIни хIерила замана бихIути саби, илаб илди кIина дуббатлира балха.
Каникултала манзиллизиб замана заяли хIеберкIили, дурхIнас ва илдала бегIтас халаси гIяхIдеш саби дурхIни воспитательтала хIерудилиуб биъни, чула бегIтачибад гьарахъхIебикили, пайдаличил замана буркIни. Каникултала манзиллизибра педагогуни дурхIнала багьуди ва пагьмурти имцIадиахъес, гьалабяхI башахъес къайгъилизиб саби. ДурхIнани чус бахъал сагати юлдашуни бургу, вайти анцIбукьуназибадра мяхIкамдеш бетарар. Чус разидешра, сагати пикрумира, цаличил ца дирути ихтилатунира, арадешра гIяхIбиахъубли, каникулти дурадуркIу.
Вайти анцIбукьунази хIебикахъес багьанданра, воспитательтани дурхIначил дахъал ихтилатуни дурадуркIули сари, сегъуна мяхIкамдеш барес гIягIнисил иргъахъули гIямрулизир къаршидикес асубирути вайти анцIбукьуназибад.
БиштIатачил гьунибиули саби духIнарти къуллукъунала отделла хIянчизартира, илдани ихтилатуни дирули саби цIализибад, гьундурачиб, телефонтазирти, Интернетлизирти вайти секIултазибад сегъуна мяхIкамдеш бирес гIягIнисил иргъахъути.
Сархибдешуни диаб чула баркьудилизир! ДурхIнала лагерьтачила гIяхIти гьанбикунира калаб!
Роспотребнадзорли лагерьтазирти тяхIяр-кьяйда ахтардидарибти сари. ДурхIнас кIакIрумазибад мяхIкамдеш бетаахъес багьандан, лагерьтала алавчарти мер-мусаличир, хасти дармунти чахьдарили, урехи агара.
Сабият ГIябдуллаева
