Дарганти жявхIейчибад гъабзадешличил ва ламусличил машгьурти саби. ИшбархIила къиянси заманаличи хIерхIеили, илдигъунти къиликъуни чузир лерти дарганти нушала ургаб бахъал леб.
Илдала лугIилизив гьанушес дигулра хабардерхурси спортсмен, Къаякентла районнизи кабурхуси Первомайское шила собраниела депутат, районна депутатунала собраниела председательла кумекчи ва баркьудила адам МутIалимов МяхIяммадсалам МутIалимович. Ил гIяхIгъабзачила дахъал хабурти аргъира нуни иличил барх бузутазирад. МяхIям­мадсаламли спортлизир сархибти чедибдешуначила хIергъибси, мажахIят, левли виэс дарганти-ургав.
Ил чумал журала спортла абзаназир бутIакьяндеш дирес бажардииркули сай. Гьаланачи боксла журализив узули виалра, бусягIятла замана илини грэпплинг ва ММА журала спортла абзаназирра бутIакьяндеш дирули сай. Дагъиста духIнар дурадуркIутицун ахIенну, Северный Кавказла ва Россияла чемпионатуназир бутIакьяндеш дирули, чедибдеш сархули, жигарчевли гьалавяхI вашули сай.
Илкьяйдали илини биштIати декIар-декIарти спортла журабачи бурсибирули сай, илдала диги им­цIа­диахъес багьандан, мурталра абзани дура­дуркIу, имцIаливан сунела харжаначил.
Спортлизирцун ахIи, МяхIяммадсаламли жами­гIят­ла гIямрулизирра жигарла бутIакьяндеш диру. Ил багьандан сайри ил, шантани игьдибар бихьили, шила собраниелизи депутатли викIибсира. Илкьяйдали районна депутатунала собраниела председательла кумекчи сайливан, район гьалабяхI арбукесра халаси пай кабирхьули сай.
ВиштIахIейчивад илизиб адамтас кумекбарес иб­ти пикруми дири ва мурталра къияндикибсилис кумекбарес гьалакли вири. Илдигъунти къиликъуни ва кабизалачебдеш нешла ниъличил дарх илизир минадиубти сари. ИшбархIира ил, хIядурли вирар сунела шантас кумеквиэс, сунени чесибти детерхахъес. Мурталра шила активличил гьуниваили, илдала челукьути суалти аргъили, илди арзес гьалакли вирар. Сунела шилисцун ахIен илини кумекбируси, заб-маркали зарулти дарибхIели, къияйзи бикибтас илини кумекла някъ гьабатур. МяхIяммадсаламла гIямрула бетуц — къияндикибсилис камси-биалра кумекбарни, ил гIевуцни. Иш къиянси замана илдигъунти адамти лебни нушала халаси игъбар саби. Дирхулра илдигъунти адамти гIурра нушала ургаб имцIабирниличи.
МяхIяммадсаламлис ва илала хъалибарглис гIямрулизиб талихI ва арадеш дулгулра. Гьаман халкьлис кумекикIахъес ахърира арадешра имцIадиаб. Мурталра хIела багаласи баркьудилизив гьалавяхI вашули гIямру деркIаби!

Кьади ГIялисултIанов