ХIурматла газета бучIанти!
Ишди сурату­на­зиб хIушани чебиулрая Да­хадаевла районна ХI.Су­лай­бановла уличилси КIишала ур­га даражала школала бу­чIан­ти, сабира лебил Россияла «Цаибтала ХIяракат» бикIуси дявила ва спортла шайчибси балбуцличиб чедибдеш сархибти.
ГIергъити дусмазиб «Зар­ница»-ли дурхIнас дявила ва патриот бяркъла шайчир лер­гIер пайдалати хIязани дура­дур­кIули сари. Гьала-гьала районна, кIинайс мер-муса хIя­сибли, гIур биалли респуб­ли­кала даражаличир.

Гьаларван дурадеркIибти мерла абзаначир лерилрара-сера школабала дурхIнани бу­тIакьяндеш дариб. Илар 1-ибил мер КIишала, 2-ибил мер Дербент шагьарла кадету­нала, 3-ибил мер Уркухъла гим­­назияла командабани сархиб.
Чула устадеш ва багьуди чедибикибси кьукьяли респуликализир детурхути абзаначирра чедаахъес гIягIнилири.
Ил хIяракат гьамадси ахIен­­­ри. Илар кадизахъур­ли тIа­­­­­­­ла­­буни лерри: бутIакьян­чи­ни сай-вегIти устадеш чедиахъни; кьукьяла командирла абз; телефонничил бархбас ка­бизахъес бални; сапёртала абз; дявила мухбирла устадеш; тух­­турла санигIят чебаахъни; штур­манна хIяракат; «БПЛА»-ла операторла багьуди.
Илдала дурар дурхIнала цар­хIилти абзанира лерри: дявиласи эстафета; политикала шайчибси теория; спортла шайчирти гьу­нар­ти-цIакьани чедаахъни; гIярмицунала низамличил ганзбикIни; тактикалашалси багьуди; ярагълизибад къяйкбикIни; РХБЗ – ла къиянти шуртIразиб бажардибиркни; дявила мер-мусаличиб ункъли дигIянбикес бални; марш-бросок ва гIяхIцад цар­хIилтира.

Гъайла къантIа, гьарил балбуцлизиб КIишала школала команда гьаркьятала командабачил ца къяйлизи дурабухъун. Абзани дурадеркIили калири Хайдакьла районна «Огонек» бикIуси дурхIнани бамсриихъуси лагерьлизир, кIинайс биалли Дербент шагьарлизир. БутIакьяндеш дариб республикала 17 командали.
Бурули бирар, чедибдешуни гьамадли сархути ахIен или. Ил хIекьли дурусси пикри саби, сабира гьанна 37 дусра-сера КIишала школализиб военрукла, ОБЖ-ла учительла, ахирра-ахир ОБЗР-ла руководительла хIянчи гьалабяхI бикуси МяхIяммадхIяжи МяхIям­ма­довли марбарибси.
Ихтилатлизиб илини къантI-къантIли аргъахъиб:
— Абзаначи бикути дурхI­ни белчIудила абзур дус хIя­дур­бирути саби. Теориялашалра практикалашалра лайикьти багьудлуми кайсахъути сари. ЧIянкIли илхIели сархибдешунира диэс дирар…
— Чебиуливан, уршбачил барх рурсбира бажардибиркули балан?
— Гьайгьай. 10-ибил класс­ла бучIанти Хамис Ка­ми­ло­ва­ни ва Марианна Мя­хIям­ма­­датаевани гьарли-марли мурхьти багьудлуми чедаахъиб, жюрила члентани илдас цауркI­­ли ахъти кьиматуни кадатур.
— Юлдаш МяхIяммадхIяжи, хIела урши Мухтарличила се бурес вируда?
— Ну разилира илини дявила санигIят чеббикIниличи. Че­лябинск шагьарла чебяхIси да­ражала штурманти хIя­дур­би­руси училище хъараахъур. Гьанна илини Подмосковьелизиб ВатIайс къуллукъбирули сай…
Сунела пикри аргъахъиб школала директор Рабазан Мя­хIяммадовлира:
— Узуси адам чинавалра че­­­хIеили кахIевлан. Ну де­ба­ли разилира, ОБЗР-ла му­гIял­лим МяхIяммадхIяжила къайгъни чедиухIели. Илини су­нела замана гIярмиялизир дя­вила дебш касибти сарри, аш­карливан, ил секIа асар хIян­чи­лизибра дакIубулхъули саби. Итира командирли гьала-гьала сунела дурхIнас гIибрат чеби­ахъес чебиркур. Юх, к­ъиян гIям­рула сегъуна гьунчиб да­кIу­барес адам бажардиикалра, ил дугIли бетхIейхъур. М.Мя­­­хIяммадович школала ад­­­­министрацияла шайзивад ша­­­­багъатлаваресра хъум­хIер­те­хIе…
Патриот бяркъ мурталра бел­чIудиличил барх школа­ба­зиб цаибил даражала ма­съала биъ­ни гIячихъси анцI­букь са­би. ЧIянкIли илгъуна хIя­ра­кат­личил нушани чеал­кIу­си наслу ахIерси Ва­тIай­чи ва адамтачи дигичебсили абикьес дирехIе.

Ибрагьим Ибрагьимов
Суратуни Арсен ХIясайниевли касибти сари.