ГIябдуллаева Зайнаб ГIямарасхIябовна акIубси сари Уси­ша­ла ши­лизибси хIурматла хъа­ли­барг­лизир. Зайнаб ГIяб­дул­лае­вани 1989 ибил дуслизиб Ха­­­савюрт шагьар­лизибси педа­го­­гическое училищела физ­куль­турала от­де­ление таман­ба­рили, шилизи чар­рухъи, шко­ла­лизиб сунела бу­зерила гьуни бехI­бихьиб. Ил школа гьан­на лицейличи шур­ба­тур­си саби.
Зайнабла 37 дусличи гъамли бузерила стаж леб. Ил Ахъушала шилизибси дурхIнала ва гIулухъабала спортла школализир тренерлира рузули сари.
Спортличи ва дурхIначи дигичерси Зайнабли сунени физкультурала дурсри кадирхьути классунала бучIанти волейболличи бурсибирули, командаби ца­­ладирхъули сари. Илини рур­­къути дурхIнала командабани мур­талра гьаларти мерани дурцу­ли дирар. Усишала шилизибти рурс­бала волейболла команда­би районна духIнар бегIлара цIа­кь­та­зи халдирути сари.
2022-2023-2025-ибти дус­мазир детурхути абзаназир ил­ди рурсбала командаби гьаларти мерани дурцни багьандан, Ахъушала районнизиб бегI­ла­ра гIяхIтази бейгIунти саби. ГIу­­лухъабала ургаб Зайнабли руркъути рурсбани кIиибил даражала разряд касиб.
Илини халаси хIянчи дура­бур­кIули сари бучIанти волейболличи бурсибарес, бяркъчебтили халабаахъес, спортличи диги адикьес, гIяхIти кьиматуначил бучIахъес…. Зайнабли су­нела гIямрула дахъал дусми лицейлис ва дурхIнас хасдарили сари.
Зайнаб ГIябдуллаеванира район­на бухIнабти ДЮСШ-ла тренер-преподавательти-ургаб «Лучший тренер-преподаватель 2022года» ибси у касиб.
З.ГIябдуллаевани 2024 ибил дуслизир «РФ-ла багьудлум итIинтI­­­дирнила кьялилизир хIур­­матла хIянчизар» ибси ули­чира лайикьрикили сари. «Ахъу­шала район» МО-ла админист­ра­цияла, багьудила управление­ла, ДЮСШ-ла шайзирад чуйна­ра ХIурматла Грамотабачил ша­ба­гъат­ларарили сари.
Зайнабли руркъути волейболла командализибти рурс­бира районна дурхIнала ва гIу­­­лухъабала спортла школала шай­зибад чедибдешуни сархнилис дахъал шабагъатуначи, грамотабачи, кубокуначи лайикьбиркули саби. Илди волейболла командализибти рурсбачила декIар-декIарли белкIес лайикьти саби, сенахIенну гьарил шайчибад саберхурти, чедибдешуни сархути, гIяхIти кьиматуни кайсули бучIути сабни багьандан.
З.ГIябдуллаевачил ну тя­ниш­­­­риубсири чумал дус гьа­лар Кертукмахьилизибси ГI.ГIя­ма­­­ровла уличилси спортзалла мер-мусаличиб Брэйн-Ринг ду­­ра­буркIухIели. Зайнаб ила ра­­­кIиб­­­­сири сари руководитель сар­си классла бучIанти ил хIяз­ли­­зир бутIакьяндеш да­ра­хъес кили. Ил хIяз районна бу­чIанти-ур­габ бетурхусири, илала мурад — дурхIнала багьудлу­ми ах­тар­дидарни.

МалхIямси, къугъали гъай­ри­кIуси, жагати чарх-бекIла, гIяхIти хIял-тIабигIятла регI му­гIял­лим­ли­чила дила гIяхIси пикри акIуб. Усишала шила халкьла ургаб, су­нечил барх бузутала, сунени руркъути рурс­бала ва илдала бегI­тала ургаб Зай­набли халаси хIурмат сархили сари.
Зайнабли сунела гIямрула варх­­кья МяхIяммадсягIидличил барх хIябал урши-рурси абикьур, гIяхIси бяркъра бедили, ба­гьудира касахъили, гIямрула гьун­чи дураиб.
Рурсили Дагъиста пачалихъла педагогический институт бел­чIи, Англияла мезла учительницали рузули сари. Урши МЧС-ла институт таманбарили, Лавашала районнизив духIнарти къуллукъунала отделлизив узули сай, виштIалгъуна урши медицинала колледжлизив кIиибил курслизив учIули лев.
Зайнаб ГIябдуллаевани ру­чIа­хъули калунси Хамис Маллаева бикIуси рурсили, Усишала шилизивадси пагьмучевси поэт, мугIяллим БяхIмуд Булатовлизи «Нушала учительница Зайнаб ГIямарасхIябовнас багъишлабарибси назму белкIенгу дила уличибли» или тиладибарили бел­кIунси назму саби газетала бу­чIантасра гьалабирхьуси. Илизибад багьесли саби, сегъуна хIур­мат бирулил Зайнаб ГIябдул­лае­вала сунени бучIахъути дурхIнани.
ХIед багъишладарили
Ца-хIябал дев дурулра,
ХIу арали калахъес
Аллагьлизи рулгулра.

Сархибдешуни хIела
ДахъдикIаб, имцIадикIаб,
ХIянчилизиб балгундеш
Даимлис каммабиаб!

КIелра дурхъати урши
ТалихIчебти бетааб,
Уршила уршилисра
ГIямрулизиб гьарбизаб!

Рурсила къугъал къушум
Вавнани анхъван берхъаб,
ГIямрула вархкьячил дарх
ХIела гIямрура дерхъаб!

Нушаб регIла дигуси
ХIурмат халал сархибси,
Учительница – Зайнаб,
Ратаби хIу, ахIерси!
З.ГIябдуллаевала волейбол­ла командализибти пагьмучебти, спортличи дигичебти, гьа­ларти мерани сархути рурсби саби: Мариям ГIялиханова, Шагь­ри­зат ГIялиханова, Шагьри­зат Буя­минова, Разият Идрисо­ва, ХIя­писат МяхIяммадова, Ма­рьям Мя­хIяммадова, Альбина Мя­­хIям­ма­дова, Рукьият Хизриева.
З.ГIябдул­лае­вас ва сунени руркъути рурсбас гьаннала гIергъира сархибдешуни имцIадикIаб, мурталра гьаларти мераначи лайикьбиркаб.

Сабият ГIябдуллаева