Нушала корр.

Гьалабван Сер­го­къа­лала район­ни­зи кабур­хуси Крас­­нопар­тизанск­лизиб ил ши­­ла урга даражала школала вы­­пускник, дявила чебла ихъули алхунси БяхIяммадов ГIяб­­дуллагь МяхIяммадовичла хIур­матлис гьанбикунала ур­кьули ибхьнилис хасбарибси бал­буц бетерхур.
ГIяхIгъабзани Украина­лизиб бетурхуси дявила хасси бал­буцлизир жигарла бутIа­кьян­деш дирутири, амма душма хIярхIя ламартсили уббу­хъун: ВатIайс марси уршила гIямру къябаиб. Илис багъишлабарибси уркьули абхьнира, илала гьунарличила чеалкIуси наслулизи хъум­хIертахънила лишанра саби.
Баягъи школала мугIяллим, балбуц къелгIеббикуси Насибат ХIяжиевани ишхIелла анцI­букьуначила гьанбушиб: «Дергъ – дебали уре­­хиласи дев саби. Илини, гьай­гьай­рагу, гIядатлати адамтала гIям­рулизи децI-шишимти дихули дирар. Ук­раинализиб нушала улкали ду­рабуркIуси дявила хасси балбуцлира, сецад хIейгеси биалра, бахъла гIямру къябаиб. Амма илдани чула асилси чебла ихъули, Россиялис мардеш, ВатIайчи диги чедаахъиб. Илдачила хъумартес нушаб сеналра асухIебирар. Чула жан ахIерахIедарили, илдани гIямрула бегIла гIергъиси гьигьличирра, миллатчибазибад ду­нъя балтахъули, гъабзадеш да­кIу­­дирулри…»

Балбуцличир бутIакьяндеш дариб Сергокъалала ва Ахъуша­ла районтала дявила комиссар Ша­мил Чу­па­лаев­ли, Сергокъалала районна ха­­латала Советла пред­се­датель Мя­хIяммадсалам Мя­хIям­мадовли, ХIур­­хъила шила бекI Мажид ГIи­саев­ли, илала заместитель Мя­хIям­­мад Даудовли, илкьяйдали алхунси ургъанна неш Умуриза Бя­хIям­­мадовани, узи-рузини ва гъам­­тани.
Гъай­­булхъунтани ГIяб­дул­лагь БяхIям­мадов­ли­чила ша­лати пик­руми дуриб. Илала ца­ибси му­гIяллим Зу­байдат ХIу­сейновани ил школализи учIу­хIели сегъуна вирибал гьанби­ка­хъиб. Школала директор Нур­бяхIянд Нур­бяхIяндовлира, гъабзадеш чедиахъули, Красно­пар­тизанскла шилизибад бу­сягIятра дявила хасси балбуц­лизир бутIакьяндеш дирути гьа­тIира уршби лебниличила ва илдачибад гIибрат касес гIягI­нили биъниличила багьахъур.
Балбуцличир школала бу­чIан­тани назмуртира дел­чIун. Ил­ди-ургаб лебри Насибат ХIя­жиевани дарган гIяхI­гъаб­зас хасбарибси назмура (ил белчIун школала ручIан Раисат Ильясовани).

ХIу нушаб пахру сайри!
АтIунгу децIла урги
Нешла дай уркIилизи,
Бац-берхIи диси дурги
Духъи уркIецIи хIечи.
ТIимкьлизир кьакьадешла
Гьар даим цIумрикIулри,
Марзла гIязиз уршила
ГIябдуллагь-у айхъулри.

АхIен уршби бубкIути
ВатIайс жан харждарибти,
ГIералгьангу хабурти
Гьунарти гьандуршути.

Сен рисуда хала неш
Сай жагали айкьурси,
Чедаахъиб гъабзадеш
Гьунаргу ил чебяхIси!
Мармар къаркъа пахрула
ИшбархIи тIашбалтулра,
Багьа нушала шила
Ахъбурцнира балулра!

Булгули саб нешани
Тамандиахъес дургъби,
Чарбухъахъес мицIирли
Чучи ахIерти уршби!

Илдигъунти дал­­дуцуни ВатIан батахъес дурабу­хъун­ти игитуначила гьан­­би­­куни ка­ла­хъес ба­­­га­ла­дирар. Ил­­дала гъаб­за­деш­ла гьа­лаб ик­рам­би­ре­хIе!