Шилтахъчибани, макрукьябани чула вайти пик­ру­ми-кьасани детерхахъес, адамти бир­гIя­бир­гили, гьамадти арц дарес дакIудирути къайгъни че­диу­хIели, тамашахIейэси тяхIяр ахIен.
БархIиличи-бархIи илдала аварали, шикьатIалали адамтала гIямру къияндулхъахъули сари, хаслира – халабетаибтала. СенахIенну гьести гIямрула адамтас Интернетличил ва ишхIелла гьаркьяти технологиябачил дархдасунти масъулти аргъес гьамадли ахIен. Итира бара телефонти дяркъес бурсибиубти илди гьамадли макрукьябала «тIимкьлизи» биркули саби.
ХIера, гьалабван шилтахъчибани балбуцибси цагьатIи тяхIярличила багьурхIели, кахриубра. Арц дарес гIелабадкабикибти вайнукьабани гьанна илцун саби пикрихIебарили калунси или гьанбикиб. Чумал дус Украинализиб нушала улкали дурабуркIуси дявила хасси балбуцра илдани чула зулмурти даимдарес пайдалабирули саби. Секьяйдали или хьарбиадалли, СВО-ла мер-мусаличибти бургъантала гъамтачи зянкъбикIули. Сецад хIейгеси биалра, дявила майдайчиб къел-хIерзи агарли беткахъибтира леб. Илдачила баянти дургнилизиб «кумекчибили» бетаэс кьаслизиб макрукьябани итира уркIи кьакьати бургъантала гъамти биргIябургули саби. ГIяхIцад замана я зянкъ, я багьахъни агарси чула гъамси ургъанничила багьес къалабати, гIяхIличи хьулбикIути адамти, шакалра хIебикили, вайнукьабала душилизиб уббулхъули саби.
Илцадра убяхIси баркьуди дурабуркIу уркIби къаркъааурти адамтаницун. Цар­хIилван буресра хIейрар итира къиянти дявила анцIбукьунала асурти илкьяйдали шилтахъчидешлизир пайдаладирутас.
ХIурматла газета бу­чIан­т­и, мурталра мак­рукья­базирад сахъли ди­ре­ная! Белгили ахIенси но­мерличибад зянкъбикIутала дугьби ахтар­ди­хIедарили, хIуша-дегIти баянти гьаламадирхьидая.

Салимат ГIялиева