Ахъушала урга да­ра­жала С.Ки­ровла ули­чилси цаибил шко­ла­лизиб леб бахъал пагь­мучебти, гIяхI­ти кьиматуначил бучIути, олим­­пиадабачир ва кон­кур­суначир бу­тIакьяндеш дирути бахъал бучIанти. Илди-ургар лер 11 ибил «б» класслизир ру­чIу­ли МяхIяммадова ПатIимат Мя­хIям­­­ма­довна. ПатIиматли шко­лала гIям­рулизир жигарла бутIа­кьян­деш дирули сари. Жу­ра-журала шко­лала ва районна духI­нар де­тур­хути конкурсуназирра, олим­пиа­­да­ба­зирра бутIакьяндеш ди­ру­ли, гьаларти ме­рани кайсули сари.
Арбякьунси дусла майличиб Ахъушала культурала КIялгIялизиб бетерхурси «Успех» бикIуси пагьмучебти дурхIнас хас­барибси фестивальличирра ПатIимат чумал Грамоталичил ва Дипломличил шабагъатларариб.
ДР-ла багьудила ва гIилмула Министерствола шайзирад Па­тIимат МяхIяммадова республикала кьад­рила яргаличилси 2024-2025-ибси бел­чIу­дила дуслизиб бетерхурси, мерла ва миллатла (нешла) мезла шайчибси олимпиадаличир призер ре­таънилис Дипломличи лайикьрикиб.
«Ахъушала район» МО-ла администрацияла шайзирад ХIурматла Грамоталичи ва савгъатличи лайикьрикиб ил олимпиадаличир призер ретаъни багьандан. Илкьяйдали, олимпиадаличир бутIакьяндеш дарнилис ПатIимат Грамоталичил шабагъатларарибсири «Ахъушала район» МО-ла администрацияла багьудила управлениела шайзирадра.
Иш 2025-2026-ибил белчIу­ди­ла дуслизибра республикала кьадрила нешла мезла олимпиадаличир ПатIимат МяхIяммадовани 1-ибил мер сархили сари ва урус мезла лебил Россияла кьадрили олимпиадаличир призер ретаурли сари.
Урус мезла олимпиадаличир призер ретаънилис ПатIимат Мя­хIяч­къалализир ДР-ла дурхIнала ихтиюрти далтахънила шайчирси вакил Марина Ежовани ДР-ла багьудила ва гIилмуртала Министерствола шайзирад Дипломличил ва 10 азир къурушла Сертификатличил шабагъатларариб.
Ишдусла майла 13-личиб­ра Ахъушала шилизибси культу­ра­ла КIялгIялизиб бетерхурси «Ус­пех» бикIуси пагьмучебти дурхI­нас хасбарибси фестивальли­чибра Ахъушала районна бекI МяхIяч ГIяб­дул­каримовла шайзибад бахъал дурхIни ХIурматла Грамотабачил ва савгъатуначил шабагъатлабариб. Илди ургар-лерри ПатIимат МяхIяммадовара. ПатIимат районна бекIла шайзирад кIел ХIурматла Грамоталичи лайикьрикиб, нешла мезла ва региональный яргализиб чедибдеш сархнилис ва литературала шайчибси олимпиадаличир призер ретаънилис.
«Ахъушала район» МО-ла багьудила управлениела начальникла къуллукъуни заманалис дузахъу­си Муслим Муслимовла шайзирад Грамоталичи лайикьрикиб, республикала кьадрила школабала бучIанти-ургаб бетурхуси нешла мезла литературала ва Дагъиста географияла олимпиадаличиб чедибдеш сархнилис.
ПатIимат МяхIяммадовала неш­ла мезла учительница ва бу­чIанти олимпиадабачи хIядур­би­руси сари дахъал дусми школалис ва дурхIнази багьуди кайсахънилис харждарибси ГIялиева Майя Айгубовна.
Гьаннала гIергъи ПатIиматлис гIяхIти кьиматуначил белчIудира даимбарили, конкурсуначирра, олимпиадабачирра гьаларти мерани дурцули, чебяхIси даражала багьудира касили, гIяхIси санигIятличира регIриэс кьадарбиаб!

Сабият ГIябдуллаева