Жявти замунтачирад лебтанилра балуливан, гьарил миллатли дузахъути декIар-декIарти гIядатуни дирути сари. Дузахъути гIядатуни дахъал лер, амма наб ишаб бархIибакIла ва заблигIантала гIядатуначила гьанбушес дигулра. Илди гIядатуни нушала халкьли дахъхIи заб хIедирухIели, яра гIяхIси бархIи хIебашухIели дурадуркIутири.
ХIера, ишдусла атхIеблизир Аллагьли нуша дахъал забли делкъахъунра. Гьар бархIи забли ургьулри ца мерличицун ахIи, лерилра шими-шагьуртазир дахъал заб-марка дариб. Чумал бархIи шагьарлизир гIяхIти бурхIни дакIили сари, амма шилизиб берхIи гьаббикIули ахIен, ил багьандан ишди бурхIназиб УбяхI МулебкIила шилизиб гьалабла заманаван бархIибакIла гIядат дураберкIиб.
Хамис бархIи чумал хьунул адам дурабухъи, дурхъати ШягIба шурмачир бехIцIури дерцIиб. Ила учибиркути шантани се-биалра бутIеси бихулри. Ила цалабикили бахъал биштIати, адамти лебри. ХIера, шантани лебтасалра илаб садакьа бутIиб, муридешуначил биштIати разибариб. БехIцIури дуцIукад ЧевяхIси Аллагьлизи гIяхIти дус-бархIи дакIахъес балга-дугIя дариб, дургъби тIашдизахъес, излуми черардукахъес, уркIбазиб иман чIумабиахъес, урши-рурсилизи анцIкьи-шишимъала чехIедаахъес тиладибариб.
УркIи-уркIилабад барибси балга, бутIибси садакьа Аллагьли кьабулбирниличи дирхулра. Гьарилла гIяхIдешлис кацIибси ганз Аллагьли хIушаб кирили белкIаб. ГIядат кьабулбарили гIяхIти аргъ-бархIи дакIили, баракатла сабухъли уркIби разидараб. Амин!

Анжела Мутазова