ИшхIелла манзиллизиб Украинализиб бетурхуси дявила хасси балбуцлизир бутIакьяндеш дирути нушала бургъанти лебтанилра гьар шайчибад кумекличил гIеббуцес халаси къайгъи дакIубирули саби. Илдала лугIилизиб лебил Россияла ветерантала организацияла Дагъиста регионнаси отделениелира, илала председатель МяхIярам ГIялиджановла ва илаб бузути хIянчизартала бутIакьяндешличил.
Бургъантас кумек бурхьуси «1999 ибил дусла «Интербригада» халкьла ополчение» ДРОО-ла кьукьяличил вархикес илцад-декIар гьамадси хIянчи ахIен. СенахIенну илала командир М.МутIалимовли илизи каберхес дигули хьалли, гьарил адам кьабулвируси ахIен. Илини чекайзурли бегIлара черикIлати декIарбирули вирар. Дявила майдайчирти дазурбачи базличи-баз организацияла дай уркIили бетаурти, заманали ахтардибарибти адамти саби арбашути. Илдигъунтазивад ца сай ГIялиасхIяб МяхIяммадовра, суненира сегъунти-дигара двигательти ремонтдируси, лебси мерличиб тIашаили, бячунси машинала сегъуна-биалра гIягIниахъала балбарес вируси. Иличил варх гьанушес вирар серхурси Салават Солтамутовра, суненира Къарабудагъкентла районнизиб авал дусра-сера бургъантас фронтлизи гуманитарияла шайчибси кумек бучес къайгъибируси. Илкьяйдали ГIябдулманап Манаповра къияйзи бикибтас кумекбарес бусягIят музаулхъуси сай. Дагъистайзир шин чедидерхнила анцIбукьуни кадикибхIелира илини сабри бегI гьалаб халкь умути шинничил гIеббурцес вехIихьибси.
Ишди бурхIназиб «1999 ибил дусла «Интербригада» халкьла ополчение» ДРОО-ла командирла заместитель ГIялиасхIяб МяхIяммадовли фронтлизи яргаличилси 30-эсил кумекла дех бархьес багьандан, хасси кьукья акIахъуб. Илизи бахъал гIяхIгъубзни каберхур: М.Куруцов, Ч.Чамкуров, Гъ.Рабазанов, С.Солтамутов, ГI.МяхIяммадов, ГI.Манапов.
Гьанна авнайс кумек цалабирхъухIели, сунела шайзибад халаси къайгъи дакIубариб Каспийскла биштIатала пагьмуртала Центрла директор Лейла МяхIяммадовани ва преподавательти Зугьра Ражабовани, Алена Видяйкинани. Илдала къайгъначибли бургъантас багаладирути маскировочный сетанала гIяхIцад километрти демхур, бургъантас «берубси хIямам» хIядурбарили, хIяжатдиркути секIал цаладяхъиб.
— «Берубси хIямам»-лис букIула шинижан — дорнит хIяжатбиркур, сабира хозяйстволашалси тукейзиб бирцуси, — бурули саби илдани. —Нушани ил халали ахIенти бутIни хIясибли кьицIбирулра, илис гIергъи умудеш бируси, хасси хьамхьаличил бухIналукъахъулра, сабира шинничил бирцес гIягIнидеш агарси, чумал къатлизи бергурли, халали ахIенси зип-пакетлизи кабирхьулра. Илис гIергъи цархIил пакетлизи букIуласи полотенцела исла, секьяйда пайдалабирусил гIеббуруси кIапIи (инструкция), нушани хIядурбарибси баягъи шинижан кабирхьулра, илабад гьава аркьяхъулра. Илгъуна шинижанничил бирцибси кьаркьа кам умубирули саби, цIапIалкули ахIен. Авлахъличирти аги-кьяйдализиб илгъуна секIал дебали хIяжатси саби.
Дявила хасси балбуц бехIбихьибти цаибти бурхIначибадал гуманитарияла шайчибси кумек цалабяхъес ва бархьес халаси кумек гIеббиахъули сай «Мебельснаб» ООО-ла ген.директор Мухтар Куруцовли. Ил дебали сахаватси адам улкала патриот сай. Илкьяйдали бургъантас кумек цалабирхъухIели, РФ-ла ДОСААФ-ла ДР-ла шайчибси регионнаси отделениела председатель Шамил ГIялиевли, ДР-ла Халкьла Собраниела депутат ГI.КьурбангIялиевлира гьар даим кумекбирули бирар.
ХIямид ХIямидовли мурталра СВО-ла бутIакьянчибас берубси диъ, капуста ва цархIилти овощуни хIядурдирули сай.
СВО-лизи кумек чуйна бархьили биалра, мурталра илизи чула шайзибад пай кабирхьули саби МяхIячкъалала 62 ибил школала педагогунани ва бучIантани. Илдани посылкаби дурчули саби, фронтлизибти бургъантас хасдарибти кагъурти лукIули сари.
«Память гор» жамигIятла цалабяхъла СМИ-ла отделла начальник, машгьурси блогер ТIагьир МяхIяммадовли СВО-лизи кумекла дехличил вякьунхIели акIубти сунела пикруми дурули сай:
— Авал дус, чулира нуша лерилра дарсдарибти. Дявила хасси балбуц гьарил хъалибаргличи къячбилкули саби. Тухумдешла бархбасуни дузахъути нушала дагъистанлантачи хIерикIалли, цалра илди анцIбукьуначивад гьарахъли кахIелун. Лебтанилра нушала улкализир бекIлидиубти анцIбукьуназир бутIакьяндеш дирули саби, цабехIти ВатIа хъархIерагардеш багьандан бургъули, цархIилтани илди кумекличил гIеббурцули. Жагьилтасра ил дебали гIяхIси патриотизмалашалси мисал саби.
Лебтанилра балуливан, «1999 ибил дусла «Интербригада» халкьла ополчение» ДРОО-ли СВО-лизи дурадеркIибти кумекла архIябачил цаибил мер бурцули саби. СВО-лизи кумек бурхьнила дурабад, «Интербригада»-ли дявилизиб къел-хIерзи агарли беткахъибти бургъанти баргахъесра халаси кумек бирули саби ил организацияли. М.МутIалимов ва илала хIянчизартани адамтас гIеббиахъуси кумек лебтасалра гIячихъли саби. 2022 ибил дусличибад илдани бургъантас, илдала бегIтас кумекбирули саби.
Бурес чебиркур, кумеклис дархьибти гIягIниахълуми-ургар лерри: квадроцикл, генератор, берк-бержла продуктуни, шинна 8 тонна, дармунти, палтар-кьяш, маскировочный сетани, гьанкIлис ва бамсриихънилис хасдарибти ваяхI – 200 бурушла ваяхI, чятирти, умудеш бирути гIягIниахълуми, газла балонти, печани ва цархIилти секIал. Фронтлизи кумекла дехани дурхьес бумсули ахIен нушала меценатуни. Илдала лугIилизир Султанум Амировара. Илини бургъантас бегIлара хIяжатдиркути секIал дурхьули сари: дармунти, берк-бержла продуктуни, маскировочный сетани ва цархIилтира.
Гьалавван Ахъушала районна бекI МяхIяч ГIябдулкаримовли ва Усишала, МухIела, ХIинтIала шила шантанира СВО-лизи кумек бархьахъес чула шайзибадси пай кабихьиб. «Усишинский» СПК-ли, ХIинтIала шила бекI Зубайдат БяхIмудкьадиевани ва Ахъушала районна хьунул адамтала Советла председатель Эльвира ГIисаевани халаси кумек гIеббаахъиб.
СВО-лизи кумек бурхьутала лугIилизир гьандушес вирар ДР-ла хьунул адамтала Союзла председатель Хасайбат Валиевала, дурхIни биркьуси 2-ибил Юртла бекIлириубси тухтур Зарема Мажидовала умира.
Лебтанилра СВО-лизибти нушала бургъанти гIеббуцес чула цIакьани дяхIчиаили сари. Илди сегъунтилра шабагъатуначи хIерли ахIен. Биалра, илдира камдирули ахIен. Дявила частанала шайзибад илди ХIурматла Грамотабачил, Баркаллала кагъуртачил шабагъатлабирули бирар. БегIлара саберхурти кумекчиби МутIалим МутIалимовлира шабагъатлабарес хъумуртули ахIен. БекIлибиубсигъуна, нушала халаси улкала лебилра халкь СВО-лизиб бургъути нушала узбани, дурхIнани дудешунани чараагарли чедибдеш сархниличи бирхни саби, илкьяйдали бетра бетарар.
Ибрагьим Гъапуров
