Нуни балусири, акаде­ми­ческий жураличиб урус мезличи Дурхъаси Кьуръан шурбатурси, машгьурси дарган гIялим левниличила.
Ил биалли, МяхIяммад-Нури ГIу­с­­манович ГIусманов сай. Ми­цIир­тала ургав ил агарвиуб­хIей­чирад, ишдус вецIал дус диркули сари.
Интернетла авлахъличир иличила баянти даргес умцIухIели гIур­ра ца дарган гIялимла биография гьарг­биуб. Ил Мя­хIяммад-Ну­ри ГIус­ма­новичла узи Мя­хIям­­мад-Загьир ГIус­манович ГIус­ма­нов сайри.
Узби ГIусмановхъалани Дагъис­та ва ду­нъя­ла гIилмулизи кабихьибси пайличила гъай­икIалли, газе­тала статьяличил, ил баян­барес хIей­рар, амма даргантани чула мил­­латлизиб акIубти гIялимтачила багьес чебси саби. Ил багьандан, илдала биографиябазирти баянти бучIантас гьаладихьес пикрибарира.
Филологияла гIилмуртала док­тор, профес­сор, ДГУ-ла исламла динна гIил­муртала Инс­титутла директор, РФ-ла гIил­мур­тала Урибси хIянчизар, Иорданияла Пачала исламла гIилмуртала институтла член-корреспондент, Дурхъаси Кьуръан урус мезличи шурбатурси МяхIяммад-Нури ГIус­ма­нович ГIусманов 1924 ибил дуслизив Ха­жаламахьилизив, Граждан дергъла игит ГIусман ГIусмановла хъалибарглизив акIуб­сири.
Илини 1941 ибил дуслизиб, шула кьиматуначил МяхIяч­къа­лала 2-ибил школа таманбариб ва Москвала Пачалихъла Университетла филологияла факультетлизи учIес керхур. ГIяхIти кьиматуначил университет хъа­раахъур ва аспирантурализиб белчIуди даим­бариб. 1951-1954-ибти дусмазив ас­пирантурализив учIухIели Персияла поэт Фир­доусила «Шах-Наме» бикIуси поэмали лебилра Персияла литературализиб буцибси мерличила гIилмуртала кандидатла диссер­тация бетерхахъур.
1954-1997-ибти дусмазив Москвализив Вос­­токла литературала институтлизив узули ка­лун. БегIла гIергъиси, илаб бузахъуси къуллукъ бекIливиубси гIилмула хIянчизарла сабри.
1970 ибил дуслизиб «9-10-иб­ти даршдусмала Персияла поэ­зия» бикIуси хIянчи белкIун ва гIил­муртала докторла диссерта­ция бетерхахъур. 1987 ибил дус­ли­зиб биалли, профессорла у сархиб.
1984 ибил дуслизив Иорданияла Пачала Институтла член-кор­респондентли ви­кIибсири.
1997 ибил дуслизив ил МяхIяч­къа­ла­ли­зи вакIиб, РАН-на та­рих­ла, археологияла, эт­ног­рафияла Инс­ти­тут­ла бекIливиубси гIил­му­ла хIянчизарли узес ве­хIихьиб. Цазаманализив, ДГУ-ла исламла гIил­мур­тала институтла ди­рек­торли, Иранна ва туркла мезла филологияла факультетлизив профессорли узусири.

Илини 250-чирра им­цIали гIилмула хIян­чи делкIи сай, илдала лугIилизир мо­нография­бира. Дахъалгъунти хIянчурби Пер­сияла литературала тарихличила, бухI­набуцличила ва мезличила сари.
1959 ибил дуслизиб «ГIямар Хайям – гIямру ва сагадеш акIахъни» бикIуси монография бел­­кIун. Ил дуслизиб белкIун «Фир­­доуси – гIямру ва бузери» би­­кIуси хIянчира. 1971 ибил дусли­зиб, 11 ибил даршдусла цаибил байхъайзив хIериубси Персияла поэт Абул Кьасим Унсурила поэзиялизир имцIаливан къаршидиркути дугьбала словарь балкьаахъур. Илкьяйдали 1970 ибил дуслизиб дурабухъун «9-10-ибти даршдусмазиб Персияла ва Таджикунала поэзияла ариндеш» бикIуси жузра.
Амма илала гIямрула бекI­ли­биуб­си­гъу­на хьарахъудли бетаур 1995 ибил дуслизиб дуракаибси, урус мезличи шурбатурси Дурхъаси Кьуръан.
Илини шурбатурси Кьуръан гьаннала заманала урус мез далути бусурмантани аргъести, гьамадти мезличил белкIниличил, Кьуръайчила, делкIи лерти, дахъал тафсирти пайдаладарниличил цархIилти урус мезличи шур­датурти Кьуръантазибад де­кIар­бул­хъули саби.
М.-Н.ГIусма­нов­ли шурбатурси Кьу­ръай­чила Санкт-Петербургла па­чалихъла уни­верситетла востокла факультетла профессор А.До­­ли­нани гIергъити дугьби делкIи сари: «Кьу­ръан дебали чебетаахъили, академияла жураличиб шурбатурли саби. М.-Н.ГIус­­мановли шурбатурси Кьуръан, гьан­на чуйнара-сера, сагали дуракаили саби. Илини дахъал Кьуръа таф­сирти пайдаладарили сай. Бу­рес чебиркур Крачковскийли Кьу­ръан шурбалтухIели, тафсирти лерти ахIенри. Илини, урусла чер­­ди­кIибти дугьбачил Кьуръан шур­­батурли сай, Кьуръайзир агарти дугь­бира илар пайдаладарили, мягI­­на аргъес гьамадси бетаахъурли сай».
М.-Н.ГIусмановли шур­батурси Кьуръа табтурти 1999 ибил ва 2007-ибти дусмазир сагали дурадухъунтири.
М.-Н.ГIусманов академияла жураличиб шур­батурси Кьуръан багьандан ва ил баянби­рути гъай багьандан гIилмула ва техникала шай­чибси, РФ-ла Пачалихъла премияличил 2002-ибил дуслизив шабагъатлаварибсири. 2003-ибил дуслизиб биалли, илис «РФ-ла гIил­мула урибси хIяракатчи» ибси у бедибсири.
ГIямрула гIергъити дусмазив, Дурхъаси Кьуръан шурбатни гIуррара гIяхIбул­хъа­хъули узули калунсири.

КIиэсил узи, МяхIяммад-За­гьир ГIусманович ГIусмановли 1954 ибил дуслизиб МГУ-ла тарих­ла факультет таманбарили сай ва лерилра сунела гIямру Дагъис­та тарих руркъули деркIили сай. Да­хъал дусмазив РАН-ла Дагъиста гIил­мула центрлизи кабурхуси тарихла, археологияла, этнографияла институтлизив бекIливиубси гIил­мула хIянчизарли узули кали сай. Илра тарихла гIилмуртала док­­тор, профессор, РФ-ла ва Да­гъис­­­та урибси гIилмула хIянчизар сайри.
М.-З.ГIусма­нов­ли 1964 ибил дуслизиб «19-20-ибти даршдусмазиб дарганти хIербирути мер-муса ва илдала юрт-муса» бикIуси гIилмуртала кандидатла хIянчи бетерхахъур. 1985 ибил дуслизиб биалли, «19-20-ибти даршдусмазир Дагъиста халкьли хIяйван-къача адилкьнила гIя­да­туни ва тяхIяр-кьяйда» би­кIуси гIил­муртала докторла хIян­чи бе­тер­хахъур.
Илини лерилра 150 гIилмула хIянчи делкIун, илдала лугIилизир 9 монографияра.
М.-З.ГIусма­нов­ли Дагъиста ва Рос­сия­ла гIилмула далдуцуназир жи­гарла бу­­тIакьяндеш дирутири. Хал­кьани-ур­гарти, лебилра улкала, Дагъис­та гIялимтачилти гьунибаъниба­чи вашусири, гъайулхъусири, ба­хъал гIя­лим­тачил вархвалгунсири. Аспиран­тунала, докторантуна­ла белчIуди къел­гIеб­бикусири, сай узу­си институтла гIя­лимтала ва дис­­­сертациябала советунала член сайри.
Илини 1963 ибил дуслизиб, Москвализиб, востокла литературала издательстволизиб, урус мезличи шурбатурли ва гьалагъай белкIи «Даргала хабурти» бикIуси жуз дуракаиб.
1967 ибил дуслизиб, цархIилти автортачил варх узули «Даргантала яшавла культура» бикIуси жуз МяхIячкъалализиб дуракаиб.
1967-1973-ибти дусмазиб Д.М.Атаев­­ли­чил варх узули «Дагъис­та тарих» бикIуси жуз балкьаахъур. Иш белкIлизир гьан­хIе­душибти, илини хIядурдарибти гIяхI­цад гIилмула хIян­чурби гIур­рара лерал.
Илини ДАССР Верховный Советла Президиумла, СССР-ла гIил­муртала академияла Президиумла, багьуди бедлугути хIян­чизартала профсоюзла ЦК-ла ХIур­матла Грамотаби, ва цархIилти ша­багъатуни сархибтири.
Ил 2007-ибил дуслизив 77 дусла гIям­­руличив итил дунъяличи арякьунсири.
Хажаламахьилантани ва лебилра даргантани чула миллатлизиб акIубти, Да­гъиста машгьурти, гIялимти — узбачила хъум­хIерту.
Ну биалли, М.-Н.ГIусмановли, улкала гIядатла адам­тани аргъести, урус мезличи шурба­турси Дурхъаси Кьуръан асес биркниличи хьул­рикIуси ахIенри, амма масани дурхьуси тукейзиб дигусилис асес вирар или реклама баргира. Багьара азир къурушличи баили ахIенри. Асес вирарал балули ахIен­ра. Илини шурбатурси тяхIярли, Кьу­ръан Ин­тернетлизиб гьамадли баргес вирули сай.
Шурбатурси Дурхъаси Кьуръайзибад чус багьуди касес имкан­ба­кIибтани, илгъуна хIянчи барибси гIялим гьаниркахъули балга-дугIя дирниличи рирхулра.

Муъминат Хаттаева