Гьалабван Ахъушала шилизибси культурала КIялгIялизиб «Успех» бикIуси пагьмучебти дурхIнас багъишлабарибси фестиваль бетерхур.
Илаб «Ахъушала район» МО-ла администрацияла ва багьудила управлениела шайзибад Ахъушала районна школабазибадти олимпиадабазир, конкурсуназир ва спортла шайчирти абзаназир сархибдешуни диахъубти дурхIни ХIурматла Грамотабачил ва савгъатуначил шабагъатлабариб.
Балбуцлизир бутIакьяндеш дариб «Ахъушала район» МО-ла администрацияла бекIла цаибил заместитель МяхIяммад КаримхIяжиевли, заместитель Эльвира ХIясанхIусейновани, районна депутатунала Собраниела Председатель СягIид ХIяжигIялиевли, багьудила управлениела начальникла къуллукъуни заманалис дузахъуси Муслим Муслимовли, илала заместитель Башир Чартаевли, методкабинетла заведующая Наида ХIусеновани, школабала директортани, педагогунани, бучIантани, учреждениебала, организациябала руководительтани ва жавабла хIянчизартани.
Фестивальличиб районна бекIла шайзибад лебил Россияла, мерла кьадрила олимпиадабачи, конкурсуначи бучIанти хIядурбарибти, чедибдеш сархахъес къайгъибарибти мугIяллимтира шабагъатлабариб. Илди-ургаб лебри Майя ГIялиева, Аматуллагь ХIямзалагIялиева, Рукьият Рабаданова, Фатима ГIябдуллаева, Хадижат ГIябдуллаева, Зульфия МяхIяммадова ва гIуррара бахъал пагьмучебти, чула гIямру школалис ва дурхIнас харждирути мугIяллимти.
Балбуцличив гъайулхъули МяхIяммад КаримхIяжиевли буриб:
– ИшбархIи иш заллизи учибикибти районна бегIлара гIяхIил бучIути дурхIни саби. ХIуша нушала челябкьла саррая! ХIушала багьудлуми имцIадикIахъес къайгъибарая! ХIушала белчIудилизир ва гIямрулизир сархибдешуни имцIадикIаб!
Илкьяйдали, пагьмучебти дурхIни ва илдала педагогуни мубаракбариб СягIид ХIяжигIялиевли, Эльвира ХIясанхIусейновани, Муслим Муслимовли. Илданира дурхIнас сархибдешуни диубли дигни аргъахъиб.
– ХIушала сархибдешуни – илди хIушала чедибдешуницун ахIен, илди районна пахру саби. Ил чедибдешличирад дехIдихьили, гьаннала гIергъира хIушала сархибдешуни имцIадикIаб, – рикIи Эльвира КьурбанисмягIиловна.
Пагьмучебти дурхIнани жагати делхъ дариб, жура-журала сценкаби чадаахъиб.
Сабият ГIябдуллаева
