ГIяббасов Карим НухIович акIубси сай ХIямшимала шилизив, бахъал дурхIнала бегI, гьарли-марти дубурлантала хъалибарглизив. Илала неш Майя ва дудеш НухIли урегал дурхIя абикьуртири, халаси, хIялалси бузери барили, багьудира касахъили, бузерила кьиматбирахъес бурсибарили, чебяхIси даражала багьудира касахъили, гIямрула гьунчи дураибтири. Карим ГIяббасовла дудеш НухI ГIяббасовли дахъал дусмазиб мирхъи дихIули, варъа бурчули халаси бузери барибсири. Илини бурчуси варъа дебали гапла сабливан буйгIусири, Ахъушала районна дурарти мер-мусаличибра илис ахъси кьимат бедлугусири.
Карим НухIович ХIям­ши­мала урга даражала школа таманбарили гIер­гъи, Дагъиста пача­лихъла педа­го­гический инс­титутлизи керхурсири. 1976 ибил дуслизиб пе­динс­титутла биологияла ва географияла факультет таман­барили, чебяхIси дара­жала багьудира касили, мугIял­­лимла санигIятличи ве­гIиуб.
Карим НухIовичли сунела бузерила гьуни Лавашала районна урга даражала шко­лализиб бехIбихьиб. 1995 ибил дуслизив Ахъушала урга да­ра­жала школализиб сунела бузерила гьуни даимбариб. Гьанна биал­ли Карим ГIяббасовла бузерила стаж 50 дусличи абикили саби .
МалхIямси, гIяхIти хIял-тIабигIятла, пагьмучевси, халкьличил валгунси, сунела санигIятлис марси, халаси багьудила вегI мугIяллим сай ил. Сунечил барх бузутала, ХIямшимала ва Ахъушала шимала халкьла, школала бучIантала ва илдала бегIтала, къантIли буралли, ил валути лебилра адамтала ургаб халаси хIурмат сархили узули ва хIялалли хIерирули сай.
Ахъушала шилизив Карим НухIович хIевалути бахъал адамти хIебургар. СенахIенну илини бучIахъули калунти уршби-рурсби бахъал саби. Карим НухIовичли бучIахъули калунти дурхIни дахъал жура-журала санигIятуначил бегIбиубли саби. Илди-ургаб леб халаси хIурмат сархили, тухтурла, учительла, юристла, духIнарти къуллукъунала отделла, культурала, библиотекала, социальный хIянчизарла ва гIурра цархIилтира санигIятуначил бегIбиубли бузери бирути адамти.
Карим НухIовичли «РФ-ла цахIнабси багьудила хIурматла хIянчизар» ибси у касили сай, ЧебяхIси категорияла учительла уличира лайикьикили сай.
ДурхIнази багьуди касахъес, илдас гIяхIси бяркъ бедес узули, сунела гIямру школалис хасдарни багьандан, Карим НухIовичлис дедибти гIурра дахъал шабагъатуни лер, Дагъистан Республикала багьудила ва гIилмуртала Министерствола, «Ахъушала район» МО-ла администрацияла, багьудила управлениела шайзирад.
Ишдусла февраль базлизиб Ахъушала районнизи архIя дураберкIибсири ДР-ла багьудила ва гIилмуртала министр ЯхIъя ХIямидович Бучаевли. «Ахъушала район» МО-ла администрацияла актовый заллизиб гьунибаъниличиб дахъал дусмазиб багьуди кайсахънила шайчиб хIялалси бузери барибти, чули касибси санигIятлис марти мугIяллимти шабагъатлабарибтири. Илди-ургав леври ГIяббасов Карим НухIовичра.
Карим НухIович «ДР-ла багьудила шайчивси хIурматла насихIятчи» бикIуси лишанничил шабагъатлавариб.
«Ахъушала район» МО-ла администрацияла, районна багьудила управлениела шайзивад Карим НухIович чуйнара ХIурматла Грамотабачи, Баркаллала кагъуртачи лайикьикили сай: учительла БархIилис, белчIудила сагаси дус бехIбирхьухIели ва гIурра цархIилтира байрумтас, тарихла бяхIянас хасдарибти далдуцуначил бархбасахъи.
Карим НухIовичли сунела гIямрула рархкья Людмилачил барх шел урши-рурси абикьур, гIяхIси бяркъра бедили, чебяхIси даражала багьудира касахъили, сунела бегIтани сай кьяйдали халкьла хIурматбирахъес бурсибарили, гIямрула гьунчи дураиб. Людмила жявли гIямрулизирад аррякьун (бунагь-хатIа урдуцаб сунела). Ил багьандан дурхIнала бяркъла шайчибси хIянчи имцIали Карим НухIовичличи хъарбикибсири. Гьанна биалли илдала дурхIнира халкьла хIурмат сархили бузули ва хIербирули саби.
Илдала ца урши Тимур ГIяббасов Ахъушала районна духIнарти къуллукъунала отделлизив узули сай. Илала гIямрула рархкья пагьмучерси, малхIямси, халкьлис манпагIятси, зягIиптачи уркIецIичерси тухтур Барият рузули сари Ахъушала больницализир УЗИ бируси кабинетлизир.
Ца урши МяхIячкъала шагьарлизив ахъси къуллукъличив, рурси психологли бузули саби. КъантIли буралли, Карим НухIо­вичла уршби-рурсбани илала гIямрула бузерила гьуни даим­би­ру­ли саби.
Гьаннала гIергъира Карим ГIяббасовла гIямрулизир ва бузерилизир гьарбизуни имцIадикIаб, сунела дурхIнани ва илдачибад акIубтани разивирули хIериэс кьадарбиаб!

Сабият ГIябдуллаева