СВО-ла бутIакьянчиби гIеб­бурцуси Дагъиста регионна «Дубуртала асил­деш» би­кIу­си жамигIятла ор­га­низациялизи Из­бер­башлизивадси сержант Мурад Кьур­банович ГIумаханов керхур.
Илини 2020-ибил дусла августла 26-личибад Ярагъладарибти ЦIакьанала къяяназиб отделениела командирла къуллукъуни гъабзадешличил, рухIла дебадешличил, жавабкардешличил тамандирутири.
2025 ибил дусла августла 12-личиб, минала баргберд бетаурли, ил декIли вяхъибсири. Сай вяхъили виалра, мякьлавси сунела юлдашла гIямру дерцахъесра илини имканти даргиб. Балуй кьяшлизивад декIли вяхъибхIелира, мукIурхIекIиб, сунела къуллукъуни дузахъули калун.
ДР-лизибси СВО-ла ветерантала Ассоциацияла ва баягъи «Дубуртала асилдеш» бикIуси организацияла председатель МяхIяч Шамиловли сай илизи керхнила хIекьлизибси удостоверение Мурад ГIумахановла някълизи бедиб.
Балбуцлизир бутIакьяндеш дариб Избербаш шагьарла бекIла кумекчи, шагьарла СВО-ла ветерантала Ассоциацияла председатель БяхIрам МяхIярамовли. Илини, цалабикибтала гьалав гъайулхъули, илдигъунти гьунибаъниби СВО-ла ветеранти саби-ургаб уржахънилис мягIничерти диъниличила буриб.
«Мурад — гьарли-марси игит сай, лерилра къияндешуначи хIерхIеили, илини улкалис мардешличил къуллукъбариб ва сунела юлдашунас кумек гIеббаахъиб. Илала баркьуди гъабзадешла ва асилдешла лишан саби. СВО-ла гьарил бутIакьянчини улкала гIямрулизир жигарла бутIакьяндеш дирули сари», — викIулри МяхIяч Шамилов.
«Дубуртала асилдеш» организацияла къяянази Мурад ГIумаханов керхурли виънили бегIлара къиянти шуртIразибра бургъанти саби-ургаб цабалгнилис ва илдала ургарти узидешлис бикьридеш дирули сари.
Мардешличил къуллукъбирути ишбархIила бургъантани ватIан балтахъантала сагаси наслу уркIичеббиру.