Сергокъалала районна бекI Арсен МяхIяммадов дявила хасси балбуцла бутIа­кьян­чиличил гьуниваиб.
Муниципалитетлис бекIдеш дирусиличил ихтилатбарес илала кабинетлизи ацIиб отпускличи хъули вакIибси, мотострелковый взводла командир Ибрагьим Каримов. Росгвардияла къяянази керхурси илини Донецкла мер-мусаличир сунела дявила къуллукъуни асилдешличил тамандирули сай.
Ихтилатла дазурбазиб илини дявила анцIбукьуни детурхути мер-мусаличила, иларти аги-кьяйдаличила буриб. СВО-лизир бутIакьяндеш дарес гьалар Ибрагьимли сунела дявила къуллукъуни Чечнялизир тамандирутири.
Сунела яргализиб районна бекI Арсен МяхIяммадовли гIяхIяйзи гьар секIайчила хьарбаиб, Дагъистайзибадти бургъантачилти бархбасуначилара багьес дигули ахъиб. Илини илкьяйдали Чернобыльла АЭС-личиб кабикибси бехIемцIла асурти агардирнилизир жигарла бутIакьяндеш дарибси Ибрагьимла дудешлисра саламти дархьиб ва илдала хъалибарглизир ВатIайс къуллукъбирнила гIядатуни мяхIкамли дихIниличила цIакьбарили буриб.
Гьунибаънила ахирличиб Арсен Мя­хIям­мадовли Иб­рагьимлис гьарбизуни далгун ва гIяхIси гIядат хIясибли савгъат пешкешбариб.
Сергокъалала районна багьахънибала центр