Лебтанилра балуливан, ХIурхъила шилизибад гIяхIцад машгьурти адамти дурабухъунти саби, чулара уми Дагъиста ва Россияла тарихлизир даимлис минадиубти. ХIера, илдигъунти адамтала лугIи чебирцIахъули сай цаибил классла лётчик, СССР-ла Дявила-Гьавала ЦIакьанала гвардияла майор, Совет хIукуматла лётчик-испытатель ХIямидов ГIяли ГIялиевичлира, бахълис-декIар сунела у гIяхIил тянишли хIебиалра.
Дагъиста паргъатси, ряхIятси мерличиб, дубурти закличил дархдикибси, гьава вава-кьарла тIемли бицIибси ХIурхъила шилизиб бехIбихьибсири ГIяли ХIямидовла гIямрула гьуни. Шила шантас гIядатласи жагьил адамли зубрала капарай мутIигIбирни, мажахIят, гьанбиркусири.
ГI.ХIямидов акIубсири 1929 ибил дуслизив. Илала дурхIядеш сунела зиланти дурхIналаван ардякьунтири, уршила уркIи халати гьунарти дурадеркIес ва гьарахъси архIяли дуравхъес ибти пикруми-кьасанани бицIилри. Ил арцурти самолётуначи хIяккайзурли хIерикIусири ва, уркIилизиб мегьла арцанти дикан ветарус ибси пикри гьачамличиб-гьачам мурхьбикIусири.
ХIурхъила шила школа таманбарили, ГIяли ХIямидов ВатIа гьалабси чебла ахъес, ХIунтIена ГIярмиялизиб къуллукъбарес арякьунсири. Илаб жагьил адамли сунела уркIила хьул гIямрулизиб бетерхахъес пикрибариб. Дагъистанланна халати гъирали ва иштяхIли илала гьалар дявила-гьаваличив урцнила училищела унза абхьахъибтири. 1947 ибил дуслизив ГI.ХIямидов дявила самолётуни дикутала училищелизи керхурсири ва 1952 ибил дуслизиб ил ункъли хъараахъурсири.
Багьудила заведениелизив ГIяли ХIямидовли сай пагьмучевси курсант виъни чебаахъибсири. ТIабигIятли пешкешбарибси пагьли ва бамсриагарси бузерили илизи самолёт бикнила ди­гIян­дешуни гьаргдарахъиб. ГIяли ХIямидов пергер уста, чевикIла лёт­чик ветаур. Илала у дунъяличиб машгьурхIебиубли хьалли, ил сунела баркьудилис марси, санигIят мурхьли бяркъурси адам сай­ри. Илини дявила къиянти хъарбаркьуни ункъли таман­ди­рутири, цархIилтас гIибратли ветарули ва халати устадеш че­ди­ахъули.
1947 ибил дусличивад ГIяли ХIямидов СССР-ла Гьавала ЦIакьаназиб къуллукъбирес вехIихьибсири. Кьанниван, жагьил адамли жавабкардеш дихес бални ва илала чекайзурдеш хIясибдарили, космонавтунала отрядлизи уцибсири.
УркIила мурадличи виуси гьуни илцад-декIарли гъалагсира хIебирар. Сен-биалра, ГIяли ХIямидов сунела гIямрула гьунчир къаршидиркути къияндешуни ихъес гIяхIил бажардииркусири. Гьарил къияндешли илала хIял-тIабигIятра дебшладирулри.
Челябкьлализиб Советский Союзла Игитунили бетаурти В.М.Комаровличил, Б.Б.Егоровличил ва К.П.Феоктистовличил варх 1964 ибил дуслизив космослизи дураухъес хIядурвикIуси илис арцес кьадарбиубси ахIенри. Ахтардлуми дурадуркIуси S-13 самолёт халбарес арцурси гвардияла капитан ГIяли ХIямидов, Казахста, Узбекиста ва Китайла дазурбачирти Тянь-Шань бикIути дубуртала мер-мусаличиб гьавала гами кабикили, сайра сунечил бархти 9 адамра алхунтири. Кьисмат кьяркьсили уббухъи, 33 дусла гIямруличир ГIяли ХIямидовла бурхIни кадерхуртири.
Ил мицIирли калунси виалри, ХIурхъила шила сунела космонавт ва СССР-ла Игит вирусири. Илгъуна ахъси даражала уличи лайикьбиркутири космослизи арцурти адамти. Амма, сепайда…
СССР-ла Верховный Советла Президиумла 1963 ибил дусличибадси «Дявила самолёт халбирухIели гъабзадеш ва игитдеш дакIударни багьандан» ибси ХIукму хIясибли, гвардияла капитан ГIяли ХIямидовлис, алхи гIергъи, пачалихъла чебяхIси шабагъат – Дявила ХIунтIена Байрахъ ибси орден бедибсири. Илкьяйдали илис майорла ура бедибсири алхи гIергъи.
ИшбархIи, ГIяли ХIямидов гьаниркахъули, нушани гIядатла лётчик ахIенну чейуси, сунела пикруми-кьасани детерхахъурси адам сай. Дунъяла къакъличибси биштIаси гIямзилавадра вегIличи вирхуси ва мурадличи ваэс къайгъни дурадуркIуси адам зубрачи ваэс вирнила гIячихъси мисал саби хIурхъан багьадурла анцIбукь.

ПатIимат Мирзаева