Поэзия вавалибяхъибси галгаличи мешули саби. Ил мурхьбикIнила ва чеахъбикIнила даражаличи хIерикIалли, уркIи разибирули саби.
Иш къиянси заманаличи хIерхIеили, поэзиялизир бамсриагарли рузули сари Хайдакьла районна Чумлила шилизир акIубси ва халараибси, бусягIят МяхIячкъалализир хIеррируси Мисей Рабадановна ГIябдусаламова.
СанигIят хIясибли ил математикала мугIяллим сарли хьалли, илини даргала поэзиялизи мекелли халаси пай кабирхьули сари. Назмурти лукIес Мисей Рабадановна жявлил рехIрихьибсири, авъибил класслизир ручIухIели белкIунсири илини сунела цаибил назму.
Чумлила урга даражала школализир гехIел класс тамандарили, илини сунела белчIуди Мажалисла районти-ургабси школализиб даимбариб ва ункъли ручIули илра 1978 ибил дуслизиб хъараахъур. БелчIудиличи гъаргъси рурси Дагъиста пачалихъла университетла математикала факультетлизи карурхули сари. СтудентхIелла заманара ил поэзияла хъучир сабухъчерли рузусири, итхIели «Ленинна байрахъ» бикIуси республикала газетализир назмурти дурадулхъутири. БусягIятла замана цархIилтачил дарх дураибти жузала дурарад, сунелацун илала шел жуз дурадухъи сари. Илкьяйдали районна газетабазир, «Гьалмагъдеш» ва «Дагъиста хьунул адам» журналтала ва «Замана» газетала бяхIяназир Мисейла гIяхIцад назмурти ва далуйти дурадухъи сари. Илала прозала журала чумал произведениера лер.
90 ибти дусмазир районнизиб акIахъубли лебсири поэзияла ва литературала «Хайдакьла урунжуни» бикIуси цалабяхъ, илар мурталра шягIирти цалабиркули, сагали делкIунти назмуртас кьимат кабалтули, жагати гьунибаъниби дурадуркIи.
Мисей ГIябдусаламова гIяхIцад дусмазир сари акIубси Чумлила Д.ГIялибековла уличилси шила урга даражала школализир мугIяллимли, завучли, 12 дус директорли рузули калун, илкьяйдали цазаманализир мякьлабси ХIуллила школализирра рузес бажардириркусири. Илини сунела гIямрула вархкья ХIусен ГIябдусаламовличил пергер хъалибарг абикьур. Илдала шелра рурси Жувайратли, Хасайбатли, Саратли, Сидратли ва Сарабикени чебяхIси даражала багьуди касиб. Илдазибад Жувайратра, Саратра, Сарабикера гIилмуртала кандидатуни бетаур. Рурсби халаси хIурматличил чеббикIибси санигIят хIясибли бузули саби. БегIтиван илдира арагIеб даргантала пахру саби.
БусягIятла замана Мисей ГIябдусаламова МяхIячкъалала 59 ибил школализир математикала мугIяллимли рузули сари. Сунела къиянси хIянчиличи хIерхIеили, илини назмурти лукIес ва мез гьаладяхI ардукес, ватсаплизиб акIахъубси «Даргала анкъи» бикIуси жамигIятла хIяракатлизир жигарла бутIакьяндеш диресра замана бургули сари.
Мисей ГIябдусаламова назму жагали каргьахъес балуси, уркIила хIяланани сюжет гьалабяхI арбикуси поэт сари. Мисейла творчестволичи халаси асар бариб С.Есенинна, А.Пушкинна ва цархIилти классикунала назмуртани. Кагибси мягIналичилти ва мурхьти пикрумачилти сари илини делкIунти назмурти. Мисейла поэзиялизир имцIаливан хасси мер бурцули саби ахIерси нешличила ва сари акIубси шиличила темаби. Поэтли ВатIайчи диги даим мяхIкамли дихIес, мицIирли лералцадхIи илдас марли калес гIягIнили биъни марбирули сари.
«ИкрамрикIулра, ванза
РиштIахIелил белкунси,
Белхагар дурхIядешла
Гьар савли сурбируси».
Мисей Рабадановнани хъали-цIа чIянкIли дигайла хьулчиличирцун акIес хIяжатли биъни ибси пикри марбирули сари. Дигайра хIурматра агарли гIергъи мурул-хьунул бахъхIи цахIнаб кахIевлан.
«Ура дурхъали саби
Мерла наб хIу акIубси,
Дунъяра батли саби
Мусаниб хIу вашуси.
БурхIни талихIла сари
ХIу вагьурла деркIибти,
Дусмира шадти сари
ХIу шулгIивли дашути».
Поэзия гIямруличи сецад гъамли биалра, илцадра ил жагали бирар. Поэтли дигайла ва карцIайла назмурти хIелукIес вирули ахIен. Гьарли-марси поэзияла кьадри хIебубкIуси биъни марбирули сари. Ил жи иргъули саби Батирайлис хасбарибси назмулизибад.
«Къяба Даргала шими
Чугурличил сархуси,
Вайти гъубзни балтIули
ГIяхIгъабза ахъурцуси.
Далайра верхIна далай
ХIуни батур хазналис,
Далай верхIцIайна далай
Ил пагьмула биънилис».
Сунела назмуртазир автор гIямрула гьарил бархIи хайриличил пайдалабирахъес, нешла хIурматбирахъес жирикIули сари. Поэтла неш гIямрулара дунъялара аслу ва ислачи сари — нешла паргъатдеш дунъяла паргъатдеш саби.
«РелхIунрив, ахIерси неш,
Сен саррив бацла шала,
Сена хIела арадеш?
Саламти хIед рурсила».
Сецад гIямру ардукьялра нешличи диги детихъути ахIен – илала назмуртала игит дахъал къиянти чедаибси, хIялалли гIямру деркIибси ва лебилра сунела кулпет бархьси гьунчибад башахъес бурсибарибси, пергер неш ГIяйшат Абузаева лебилра шантала пахру рирусири, сунела бунагь-хатIаличивад Аллагь чевверхабну.
Мисей ГIябдусаламова сабухъчерси поэтцун ахIенну, пергер хала нешра сари. Сунела рурсбала акIубтази мурталра халатала хIурматбирахъес, кумекбирахъес махрикIули рирар ил.
ГIямрулизиб хIела поэзияла зурхIяб мурталра ухаб! ГIурра бугабикIаб хIела кьалам!
Кьади ГIялисултIанов
