Нушала Дагъистай­зиб бахъал леб гIяр­тист­каби. Зуль­фия Ильясова нуни жявхIейчирад ра­лу­си сари. Гьанбиркур итди гьарахъти дусмазир Амирбег Кьа­дибяхIяммаевлис юби­лейный вечер барес нуша пи­сательти, журналистуни, илала гьалмагъуни гьай­диуб­тири Ахъушала район­низи.
Нуша-ургаб лебри Сулайбан Рабаданов, Дагучпедгизла директор ИсмягIил ХIясанов, ГIяхIмад Ибрагьимов ва цархIилтира. Гьаланачи Лавашала ва Ахъушала клубанази гьардакIира, дарган далайла устни нушачил барх арбукес дигули. Баргира Алпият Шапиева ва Зульфия Ильясова. Гьунчиб илдира далуйтани бучIахъули, адаира СирхIяла дубуртази. Тамашала гIяламат сабри, нушачи сирхIянти чус дигути узби-рузби дакIиб­хIе­ливан разибиубтири ва шадти дяхIличил гьунибаибтири. Бемжур нушала сяхIбат-байрам. Амирбегла творчество гапбирули лерилра ярга-яргали гъайдухъунра. Далуйта бучIиб нушала гIяртистунира. Ахир аги ил шадлихъла, дуги баайчи калунра. ИтхIели сарри нуни Зульфия бегI гьалар чераибсира: жагаси, жагьси, хIерамсурли далуйта ручIуси. Гьаннара ил гIяхIли рарсриубли ахIен. Илизиб адамти сунечи битIикIуси пагьра леб. Ил кумекбарес къалабали рирар къияндикибсилис. Зульфияни дирутачи адам тамашаирар.
СВО бехIбихьибхIели, ила­ла паргъатдеш буун. ДуцI­ри­кIули балути ва хIебалути хIякимтачи нуни се барес рирусирал бурая или дугьаризур. Сунени бурни хIясибли, МяхIячкъалала Ленинский районна бекIличи, Дагъиста хьунул адамтала Союзла председатель Интизар Мамутаевачи (сунела бунагь-хатIа уркадуц), Дербентла коньякла заводла директор Мурад ХIяжиевличи ва цархIилтачира дугьаризурсири. Илдани Зульфия гIерруциб, дургъбазибти нушала уршбас кумек гIеббаахъес арц дучиб. Илди арцлис берк-бержла продуктуни, палтар асили ракIибсири Хасавюртла бекI Жамал Сулаевличи. Илинира Зульфияла пикри гIеббуцили, 20 тонна секIал дучибтири.
— Даширая, рузби, дила машиналичи кадиирая. Херсоннизи бетаайчи нуни иш лебкис, гьуниббалтехIе дехличилси машина. Дила машина дурхъаси биалра, наб дила Дагъиста уршбала гIямру дурхъали сари, — ибсири Зульфияни сунечил барх лебти Хасайбат Валиевази ва Интизар Мамутаевази.
Гьайбиубли бетаили саби Херсоннизи. МЧС-ла дурхIни гьунибаили, илабси больницализи арбукили саби. Амма, илди гIела­бяхI чарбухъахъес ба­­турли ахIен душма дронтани. Дугила за­мана далуйти дехIдихьили са­ри. Лебилра бургъанти чукур­бикили, илала далуйтачи лехIирхъутири. Амма Зульфияс дигуси, сари-регIси далай леб. Ил саби «Дузеная, узби!», Россияла Игит Мя­хIяммад НурбяхIяндовлис хасбарибси. Бургъантани кIина-хIяйна бучIа­хъу­ли бирар ил далай.Ил Зульфияла цаи­бил архIя сабри бургъантачи. Илис гIергъи гъайна рякьун сунечил рарх рикули Сия­сат Халадаевара. Зульфия хIе­раибси мер кахIелун – Запорожье, Херсон, Донецк… Чина рукьялра сунела далайли разидеш бихули сари бургъантас.
«Чедибдешла кумекчи­би» хIяракатлизир жигарла бутIакьяндеш дирути са­ри илини. Ил багьанданра Зуль­фия гьунириули рирар Че­бяхI­си ВатIа дергъла бутIа­кьян­­чибачилра. ХIера, ишди бурхI­назир ил ракIиб 102 дус виубси Муса Багьаутдинович­личи. Сабукили музыкантунира, Сиясат Халадаевара, дел­чIи далуйтира, ветеранни­зи дергъличила хабуртира дура­хъи­ли гIяхIси гьунибаъни дура­бер­кIиб илаб. ЧебяхIси ВатIа дергъла бутIакьянчибас кумек гIеб­баахъес нушачи хъарси биъниличила буриб Зульфияни. «Зульфия чуйна ра­кIалра, дацIти някъбачил хIе­рашар. Сасили хIяким­та­зирад арц набра лерху, амма нунира дуртIути сари илди зягIипти дурхIнас, мижитлис ва мискинтас. Сулайбан Керимовлира наб 5 миллион гиб. Нуни илдира дутIира», — буриб Муса Багьаутдиновичли.
— Ну Пачалихъла Думала депутат Мурад ХIяжиевла кумекчи сарра, илинира дергъла бу­тIакьянчибас халаси кумек гIеб­биахъу, — аргъахъиб Зульфияни.
Зульфияла гIямруличила бурасли, илини Москвала ГИТИС таманбарибси саби. Амма, ру­зес ила хIерякьун. ДурхI­нала искусствобала 8-ибил школализир рузули сари ил. ДурхI­начилси илала хIян­чи сабухъчебси саби. Илар дуза­хъули сари делхъла, дам бирхъянтала, суратбикIнила ва цархIилтира кружокуни.
Чинар дурхIнани бу­тIа­кьян­деш диралра, мурталра че­диб­дешличил чарбулхъути са­би. Илдани чуйнара Гран-п­­ри, грамотаби, илкьяйдали 8-ибил классла учIанни В.Пу­тин­­на уличилси савгъатра касиб.
Зульфияла савгъатуналара ахир агара. БегIлара дигуси савгъат саби Москвализиб бедибси А.Твардовскийла уличилси медаль. Ил жамигIятла уркIила гьав ахъбирахънилизи искусствола ва культурала хIяракатчибани кабирхьуси пайлис бедлугуси шабагъат саби. Зульфия Дагъистайзирад цаибил хьунул адам сари илгъуна медальличи лайикьрикибси. Медальти диршахъес пиджакра гиб. Ил пиджакличи даршили дила медальти па­радличи рашусира рикIар Зульфия.
ЦагьатIи нуни пикри бяхI­чиаибси илала баркьуди. Зульфияла неш ПатIимат Ильясова сари акIубси Гьебала шила школализир 47 дус учительницали рузули калун, илдазирадли 37 дус – школала директорли. ЧIумаси ва тIалабкарси П.Ильясовани назмурти лу­кIиб: шиличила, школаличила, шантачила. Зульфияни неш­ла белкIани кагъуртазир ка­хIе­ла­хъес, жузи дураиб. Шилизиб илди жузала презентация барили, шанти тянишбарес къайгъилизир сари гьанна Зульфия.
Ил назикси хьунул адамли бургъантас гIеббиахъуси кумекличила багьурхIели, илис игитла у бедес лайикьли биъниличила бурира.
Арали ратаби, дила дарган булбул чатIа. ХIела далайли сагъбиахъаб бяхъибти бургъанти. Гьардизаб хIела ар­хIяби, пикруми-кьасани, ди­ла Зульфия!
Сунела нешли белкIунси «Дила Зульфияс» бикIуси назмура газета бучIантас гьалабирхьулра:
«Игъбарла пай баили
АкIубри, гIязиз рурси,
Сен наб дунъя салхIунал
Аргъибмад тIама чIярла.
ИлхIелил якьинбиуб
ХIу гIядатла хIериъни,
ГIямру черяхIдирули,
ГIялам гьанни хIеррирни.
Марли цаибил чIярра
ХIела макьам бархсири,
Нура ручIира хIела
Гардкабирули сири.
Гушли хьалли аргъадри
Далай хIу шипIриргIяди,
ЛукIусиван аргъайзи
Макьам биштIал уркIили.
Адамра ретаади
ГIяхIцад дарга дигуси,
ДецIлизивси чеадли
УркIи цIали игуси.
Кьамла ва абзур шила –
ХIу акIни къакъбяхъеси.
Сегъуна игъбар сабил
Дила, хIу арикьурси».

Аминат ГIябдулманапова,
Дагъиста халкьла поэт