Индира ГIямаровна БяхIяммаева устадешчерси педагог, наси­хIятчи ва творческий адам са­ри, суненира 25 дус багьудила бетуцлис харждарибси. Илини Дахадаевла районна учительтас методикалашалси кумек гIеб­биахъули сари.
И.БяхIяммаевани сунела санигIятличил дархдасунти де­кIар-декIарти конкурсуназир мурталра жигарла бутIа­кьяндеш диру ва гьаларти мерани дурцу. 2021-2025-ибти дусмазир республикала, регионти-ургарти, лебил Россияла конкурсуназир бутIакьяндеш дариб ва призер ретаур. Илдигъунти конкурсуназирадли сари «Жагьилти гIилмуличил бегIбирули саби», «Сагаси наслу руркъулра» ва «МугIяллимла рухIласи гьунар».
Индира ГIямаровна акIубси сари 1976 ибил дусла майла 23-личир Хайдакьла районна Мажалисла шилизир. Илала бегIти Дахадаевла районна ХудуцIла шилизибадти саби. Мажалислизиб ва кIинайс Дербентлизиб урга даражала багьуди касили гIергъи, Индира 1988 ибил дуслизир Дербентла педучилищелизи карерхур. 1995 ибил дуслизиб илаб белчIуди хъараахъур ва школала гIямруличи ахIебаибтала учреждениебазир воспитательли ва бехIбихьудла классуназир урус мезла учительли рузес ихтияр касиб.
1999 ибил дуслизиб Дагъиста пачалихъла педагогический университет ункъли ручIули, хIунтIена дипломличил хъараахъур. «Педагогика ва психология» ибси санигIятличи регIриуб. 2003-ибил дуслизиб кандидатла диссертация защититьбариб.
Индира ГIямаровнани Дербентлизир дурхIнала анхълизир ва школализир рузули сунела бузери бехIбихьиб. 2003-ибил дуслизиб аспирантура таманаили гIергъи, ДГУ-ла цахIнабси ва социальная педагогикала кафедрализир преподавательли рузули сари. Илала кумекличил кафедрала педагогунани санигIятлашалти конкурсуначир гьаларти мерани дурцули сари. Дахадаевла районна мугIяллимтас сунечил варх узуси ДР-ла багьудила урибси хIянчизар Мурад ХIяжимурадовличил барх методикалашалси кумек гIеббиахъули сари.
Жагьилтас мурхьти багьудлуми ва гIибратчебси бяркъ бедлугни багьандан гьаларван ил Дагъистан Республикала Правительствола ХIурматла Грамоталичил шабагъатларариб. 2023 ибил дуслизиб Индира ГIямаровнас Дагъистан Республикала багьудила ва гIилмула Министерствола, 2024 ибил дуслизиб ДГУ-ла ректорла ХIурматла Грамотаби дедиб.
Илис музыка, волейбол, тIабигIят дигахъу ва адамтас кумекбирес мурталра хIядурли рирар. Илала гIямрула вархкья вебкIибси сай ва авал дурхIя суненицун абилкьули сари.
Дахадаевла районна администрацияла пресс-служба