АхIерти дарганти, га­зета бу­чIанти, наб иш ма­кьа­ла­лизиб бурес дигулра гьарли-марли адамтачи дигили вицIибси, яхI-ламус сунезир лерси дубурлан, Гиппократлис бедибси хъялис марси тухтур ШяхIбанов ШяхIбан МяхIяммадкьадиевичличила.
Тухтурла адамтала арадешлис къарауйчи кайзни хьулчилибуцибси санигIят саби. Арадеш къулайбирнила дурабад, цацахIели гьанбиркур, илдани адамла рухIла даражара гIяхIбулхъахъа или. Хаслира сунела уркIила ванадешличил, малхIямдешличил адамтачил ихтилатикIуси тухтурли. Дила макьалала игитра илгъуна виъни аргъира нуни ил бегI гьалав чеваибмад. Сунечи дугьабизуртала зугIлуми илини итмаданал сунелаван чедиулри, ва илдас хъярхъли кункдеш биахъес гьалаклири.
ШяхIбан МяхIяммадкьадиевич акIуб­­си сай Дахадаевла районна Хъярбукла шилизив. 1978 ибил дуслизиб шила школа таманбарили гIергъи, ил Мя­хIячкъалала мединститутлизи кархули сай. 1984 ибил дуслизиб илра хъа­­раахъурли, мурхьти багьудлумачи ве­­­гIиубси Ш.ШяхIбанов направление хIя­­­сибли Волгоградла областьлизи те­ра­певт-тухтурли узахъес урхьули сай. Илар илини санигIятлашалти устадеш касиб.
1990 ибил дуслизив ил Дагъистайзи чарулхъули сай. Бузерилизивад къябхIердили, илини Лавашала районна Хажалмахьила шилизиб участковый тухтурла хIянчи къелгIердикес вехIихьиб. 2000 ибил дусличивад гьанна бикайчи ШяхIбан МяхIяммадкьадиевич Лавашала районна Лавашала шилизив мануальный терапевтли узули сай.
Иличила бахъал адамтани аргъибси саби, бахъли ил валра валуси сай: сунени иза мягIна балуси, тухтурличи хасти, мурхьти багьудлуми лерси, зягIиптала баркаллаличи лайикьикибси. Нушала даргантани бурули бирар малхIямси девлира зягIипси адам аравирахъуси сай или. Тяп илгъуна сай ШяхIбан МяхIямадкьадиевичра. Дебали малхIямли гъайикIули, зягIипсила мягIни-хIял итмаданал иргъу, иза сабаб баргили, арадеш къулайбиахъести тяхIурти далдурцу.
Мурталра иличи гьар мерличибад, имцIатигъунти анцIбукьуназиб, дурала мер-мусаличибад дугьабилзути зягIипти бахъал бирар. Нушанира ил вагьурла 15-20 дус ардякьи сари. Иличи башар някъби-кьяшми, къакъ, бекI, уркIи изути адамти. Тяп илди излуми лер нушала хъа­либарглара. Дусла духIнар нуша или­чи кIина-хIяйна дугьахIедизурли бет­хIе­рар, илала кумекличил, арадеш къу­лай­барили, разили хъули чардулхъули ди­рехIе.
ШяхIбан МяхIяммадкьадиевичла ка­бинетлизир лер адам витIикIуси (вытяжной) гIягIниахъала, банкаби, массаж дирути ва цархIилти пайдалати секIал. Илдала кумекличил тухтурли мануальная терапия бируси саби. Илкьяйдали иличил дугьабилзули бирар экг барахъес, холтер баршахъес. ЗягIиптас хIяжатли биалли, илини плазмара бирули вирар.
Адамтала бусягIятла замана дахъал излуми къаршидиркули сари къакъла чIала зараллизи бикниличил дархдасунти. ХIера, илдира арадарес тухтурли халаси къайгъибирули сай. Ил къакъла чIалала излуми (остеохондрозы, грыжи) кункдирахъуси гIягIниахъалаличил (аппарат) узули сай. Ил гьаркьяси, ишхIелла тIалабуначи балбикибси, хасси гIягIниахъала саби, суненира операция агарли декIти излуми черардукахъес кумекбируси.
Гьаннала замана бахъал саби зягIипти, илдас кумекбарни, арабарни дебали халаси кирила ва адамтала шайзибад баркаллала хIянчи саби.
ШяхIбан ШяхIбановлис кумекбирули, сайгъуна, адамтачи дигичерси илала хаб­чаб Салимат МяхIяммадхIяжиевнара ру­зули сари. Мурул-хьунул ца дякьличи­бад ганзбикIухIели лерил секIалра ункъли детурхути сари бикIар. Илкьяйдали са­би ишдала пергер хъалибаргра. ДукI­ли­зи дабгибти кIелра унцван, цали ца гIеб­бурцули, дугьабизурти зягIиптала ара­деш къулайбиахъес лерилра цIакьани дяхI­чииули сари гIямрула кIелра бархкьяли.
Наб, дила хъалибаргла шайзибад, дебали халаси баркалла багьахъес дигулра адамтас гIяхIдеш барес гьалакси, уркIецIичевси, чекайзурси тухтур ШяхIбан МяхIяммадкьадиевичлис. Гьардизаб хIела пикруми-кьасани, Кьудратла ВегIлира мурталра гьарил баркьудилизив гIевуцаби! Бахъбааб хIугъунти, халкьла хIурмат сархибти тухтуртира!

Зубалжат ЖабрагIилова,
ГIяялизимахьила школала мугIяллим