Чуйнара бакьира Усишала шилизивадси ГIяли-АсхIяб МяхIяммадовла пергер баркьудиличила: СВО-лизиб бургъутас кумек бихули вашули виъниличила. Ихтилатбарес дигули хьалли, наб къаршихIеркулри. Чумал бархIи гьалав районна администрацияла юртла мякьлав ил чеибхIели, дебали разириубра.
— Агь, узи ГIяли-АсхIяб, хIу чеэс дигули рахъхIи саррагу! — ира. — Балулра вахъхIи гъайикIес хIела заманара агни, къантI-къантIли биалра бурили дигахъаси хIела хIянчиличила!
— Бархьли бурасли, сецад къалабаикIули виаслира, камси заманалис иша хьурабирехIе! – иб ГIяли-АсхIябли, парклизибси скамейкаличи гъамирули. Портфельлизибад «Дагестанская жизнь» бикIуси газета дурасили, наб гьабуциб ва иб:
— ХIера, иш газетализи нушала хIянчиличила чебетаахъили белкIи лебну, дарган мезличи шурбатадалли, биур.
ГIяли-АсхIяблис баркалла багьахъурли, имцIабарира:
— Ара-сагъли чардулхъабая хIушара, чедибдеш сархили чарбухъаб бургъантира!
— Баркалла! ИншаАллагь! КъаршидиркехIе, гIурра ихтилатбирехIе. ХIера, иш Зубайдатличилара гIяхIти гъай делкIесра хъуммартидая — бегIлара ахIмакьти кумекчибазирад ца сари БяхIмудкьадиева! — нуша лерси мерличи гъамриубси ХIинтIала шила администрацияла бекIла къуллукъуни дузахъуси пергер хIянчизар чериахъули иб ГIяли-АсхIябли.
…Хъули ракIибхIели ГIяли-АсхIябли гибси газетализирти бургъантала суратуначи ва белкIаначи рахъхIи хIеррикIули калунра. Илди-ургаб гьанна мицIирли агартира лебри… БекIлил балхIебалути биалра, илди вегIлис узбиван, уршбиван кабилзули саби ва пикрумазир илдала нешанала, рузбала, гIямрула бархкьябала дяхI-сипат гьанарули, илдазивад цалра марайхIейахъес уркIи булгули саби…
«Дагестанская жизнь» газетализи кабяхъибси белкIла автор Т.ХIясановани лукIули сари, «Народное ополчение. Интербригада» 1999 ибил дуслизиб акIахъубсири или, саби-гIяхIъулали бургъес дурабухъунтас кумек гIеббуцес багьандан. СВО бехIбихьили гIергъи ил организацияли сунела бузери даимбарили саби, республикала районтазибад, шагьуртазибад бучибси кумек хIяжатси мерличи биахъули.
2026 ибил дус бехIбихьибмад гIяхIгъабза адамтала баркьудира сагали бузес бехIбихьиб: камси заманала бухIнаб кумек бучили, уркIби чIумати, яхIчебти адамти сагали архIяличи дурабухъун. Ил архIя «Интербригада»-ла бутIакьянчибас сабри гъану верхIра ибил, цархIилван буралли, Дагъистан Республикализирад кумекличил дашути лерилра бригадабас гьалабикили, цаибил мерличиб саби ил лугIи.
СВО-лизи кумек архутала ургаб лебри илдас бекIдеш дируси МутIалим МутIалимов, Гъаирбек Рабазанов, ГIяли-АсхIяб МяхIяммадов, МяхIяммад СалихIов. Январьла 22-личиб дурабухъи, янила бугIярси аргълизиб, гьамадли ахIенти гьундурикад башули, авэсил бархIи бетаиб Авдеевкализи, гIур—Северодонецклизи.
Гьар мерличиб илдас сецад разили гьунибиутирил аргъес къиянни ахIен, сенахIенну кумеклис духибти продуктуназибцун ахIен анцIбукь, илдира сецад хIяжатли диалра, — бургъантани чучила ВатIайзиб пикрибикIули, къайгъи дакIубирули, ВатIан багьандан бургъанти уркIичеббарес кьас лебниличила аргънилизибра саби.
Бургъантас кумек бурчнилизиб декIарабулхъути-ургаб белкIлизиб гьанбушили саби Ахъушала районра, ишаб бузути жавабла хIянчизартира, бехIкабихьили Ахъушала районна бекI МяхIяч ГIябдулкаримовличибад, — Усишала лицейла директор КьурбанмяхIяммад ГIябдуллаев, Усишала урга даражала школала директор Муслим Муслимов, ХIинтIала урга даражала школала директор Руслан Ихинданов, «Усиша» СПК-лис бекIдеш дируси ХIяжи Рабазанов, ХIинтIала шила администрацияла бекIла къуллукъуни дузахъуси Зубайдат БяхIмудкьадиева, Хъаршала урга даражала школала директор Аматулла ХIямзалагIялиева.
Ил белкIлизиб у гьанбушили хIебиалра, СВО-ла бутIакьянчибас халаси кумек бируси руководитель сай Ахъушала районна шила хозяйствола управлениела начальник ДаудхIяжи Даудовра.
Кумеклис дучибти секIал цаладяхъили, бицIибси машиналичил гьаман бургъантачи виуси, усан ГIяли-АсхIяб сай.
— УркIи дебали разили бирар нушала Дагъистайзибадти адамти къаршибикалли. —Гьандикиб ГIяли-АсхIябличилси къантIси ихтилатлизир дурибти гъай. — Дагъиста лерилра миллатунала вакилти дигалли бургъути-ургаб леб, дигалли кумек бихули башути-ургаб къаршибиркули саби. Нушани кIинайс цали цаличил бархбас бузахъулра, кумек архухIели дарх дашуси тяхIярра бирар.
БелкIлизиб гьанбушили саби Хайдакьла районра, сунезибра районна бекI Запир ХIясановла ва Халкьла Собраниела депутат Абулмуслим КьурбангIялиевла къайгъначил халаси кумек бучили бурхьуси. Жавабкарси, жигарчерси, ВатIан багьандан бургъантас кумек гIеббуцес халаси къайгъи дакIубируси адам сайливан гьанушили сай «Интербригада»-ла член ГIябдулла БяхIяндовра.
Нуни гьалабра бакьибсири СВО-ла бутIакьянчибас халаси кумек бирули сари или СягIид Амировла гIямрула рархкьяни. Ил белкIлизирра гьанрушили сари ил, гьар даим кумек бурчухIели пай кабирхьуси сарливан. Баркалла балахъули сари белкIла авторли «Мебельснабла» руководитель Мухтар Курушевлис, ДР-ла ДОСААФ-ла Председатель Шамил ГIялиевлис, предприниматель МяхIяммадзагьир Ибрагьимовлис ва гIурра гIяхIцад хIянчизартас. Чумал мерличиб баркаллаличил гьанбуршули саби Усишавадси ГIяли-АсхIяб МяхIяммадовла ура.
Дахъал пикруми акIахъуб гIяхIгъабза адамтала суратуначи хIеррикIухIели ва илдачила делкIунти дучIухIели. Сецад къияндешуни дяхIяэс чевкъулил бургъантас ВатIа гьалабси чебла ихъухIели. Илдигъунти тяхIяр-кьяйдализиб бургъутала гьунар гIядатла гъайличил кьиматлабаресра мажахIят виэс!
Бургъанталайчиб камси гьунар саби викIес вирару дявила авлахъличи, урехила мер-мусаличи кумек бихули башуталара!
П. Маллаева
