ХIямшимала шилизибадти гъабзадешчебти бахъал бургъантани СВО-лизир бутIакьяндеш дирули, ВатIайс мардешличил къуллукъбирули ва гьунарти чедиахъули, ахъти шабагъатуначи лайикьбикили саби. Ил шилизивадси ГIябдуллаев МяхIяммадамин ШайхгIялиевичли, 2024 ибил дусла сентябрьличиб РФ-ла Оборонала Министерстволичил вягIда къулбасбарили, СВО-ла хасси балбуцлизи арякьунсири. МяхIяммадамин ургъули калун Луганскла Халкьла Республикализив.
МяхIяммадамин сай-гIяхIъулали, арадешлис ва гIямрулис урехи лебни балули хьалли, сунела ВатIайзиб чеалкIуси наслула ва халкьла челябкьла шаласили биахъес, даршуси закла удиб хIербиахъес багьандан СВО-лизи ургъес арякьунсири.
МяхIяммадамин ГIябдуллаев илав чуйнара вяхъиб. БегI гьалав дявила хасси балбуцлизив вецIал бархIи виубхIели. Ил чуйнара госпитальлизиб арадеш къулайбиахъубли ва гIур дявила авлахъличи чарухъун. МяхIяммадамин штурмовое подразделениелизивра ургъули калунсири. Штурмовой отрядуназиб бургъутала хIянчи, дявилизиб бегIлара къиянтазибадси ца саби или бурули бирар.
ГIергъиси замана МяхIяммадамин БПЛА-ла разведкала взводлизив ургъулри. 2025 ибил дусла май базличив ил декIли вяхъиб, арадешлис халаси нукьсандеш ва зарал бетаур, кIелра кьяшлизивад вяхъили. Илала кIелра кьяш урасес гIягIнибиркур ибси урехи лебсири, амма тухтуртала къайгъначибли ца кьяш берцахъиб.
Гьанна биалли МяхIяммадаминна ца кьяшла мерлаб протез саби, илис арадешлизиб нукьсандеш бетаъни багьандан 2-ибил группала чулахъдеш кабизахъурли, хъули вархьили сай. Илис вашес гьамадли ахIенгу, биаллира яхIличил вяшикIес къайгъилизив сай.
МяхIяммадамин акIубси ва халаваибси сай бахъал дурхIнала, гIядатла, ХIямшимала шилизиб хIурмат сархибси хъалибарглизив. Дудеш ШайхгIяли дахъал дусмазив бехIбихьудла классунас дурсри дирули узули калун, неш ХIяпизат патронажная медсестрали рузусири. ШайхгIялини ва ХIяпизатли шел урши-рурси абикьур, гIяхIси бяркъра бедили, багьудира касахъили гIямрула гьунчи дураили саби. Илдазивад халалгъуна урши сай МяхIяммадамин.
МяхIяммадамин СВО-лизи арукьяйчи маршруткаличив ва Москва шагьарлизив автобусличив шоферли узули калунсири.
Илала ца рузи ГIяйшат тухтурла санигIятра касили, Къизларлизибси больницализир бекI тухтурла заместительли рузули сари. Рузила кIелра дурхIяра тухтурла санигIятличи бегIбирули бузули ва бучIули саби. КIел рузини, чула дудешли кьяйдали, учительла санигIят касили саби.
МяхIяммадамин ГIябдуллаевлара леб сунела гIямрула рархкьячил барх абилкьули хIябал дурхIя.
МяхIяммадамин РФ-ла оборонала Министерствола шайзивад орденничира лайикьикили сай.
СВО-ла хасси балбуцлизибад, ВатIа хъархIерагардеш багьандан бургъули, арадешлизиб нукьсандеш бетаурли биаллира, чула бегIтачи, дурхIначи, хъалибаргуначи мицIирли чарбухъниличи шукрувикIес гIягIнили саби.
МяхIяммадаминнисра гIямрулизир сархибдешуни имцIадикIаб, чархлизиб арадеш биаб, сунела дурхIнани ва тухумтани разивирули хIериэс кьадарбиаб!
С.ГIябдуллаева
