ИшхIелла, технологияби гьаладяхI дашуси замана нушала жагьилтани газетаби-журналтачи ва жузачи камли пикри бяхIчииули саби.

«Пулан жузлизиб ишгъуна хабар лебригу, белчIунрив?», — или илдази хьарбаалли, итмаданал хIебелчIни иргъахъу. Ва, бусягIятал, илала электронный жура чинаб баргес вирарал хьархъардирхъу. Багьесли саби, илдани зумали телефонти ва компьютертани дузахъули, кагъарла белкIлизи кадяхъибти багьахъниби, жузи хIедучIни.

Лебтанилра балуливан, жузани жявхIейчибад адамла гIякьлу, насихIят гIеббуруси саби. Машгьурти классикунала произведениеби дучIухIелира, нушани гIямрулизиб кабикес асубируси анцIбукьлизибад сегъуна-биалра дарс кайсниличила иргъахъули бирар. Хабар биаб, повесть биаб, яра назму биаб, ил рухIлашалси давла чебирцIахъуси хазна саби. Сецад хIейгеси биалра, гьаннала жагьилтани илди кьиматладирули ахIен. Илдала цархIилти давлуми, иштяхIуни лерни марбирули саби. Амма цалра дурхъаси телефонни яра компьютерли мурхьси мягIна бухIнабуцибти белкIаначилси жузла мер хIебурцу.

Дагъиста дура вякьунхIели, мисаллис, Москва шагьарлизиб, метроличиб башути халкь нуни мурталра някълизиб жузличил чебиис. Мякьлавад шалгIевулхъули хьалли, илдани бекIалра ахъхIебурцу. Илцадра белкIанази бухIнакабикили, алавчарли кадиркути аги-кьяйдара пикрихIедарили, бучIули бирар.

Дигахъаси, нушала Дагъиста жагьилтанира илдачибад мисал кайсули, нушала машгьурти поэтуни-писательтала жузи дучIули, илдазирад чус гIямрулизир багаладиэсти ва пайдалати насихIятуни гIерисули.

ХIурматла дарганти, кьиматладиреная нешла мезличил дурадулхъути жузи, илдала лугIилизир – газетаби-журналтира!

Р.МяхIяммадов