Апрельла 6-личиб Сергокъалала районна Сергокъалала шила дайлаб, «Буровой»-ла мер-мусаличиб ЧIакала сипатличилси скульптура кабизахънилис хасбарибси балбуц бетерхур. Ил кабизурси саби районна центр жагабарес кьасличил. Балбуц дураберкIибсири ВатIан балтахъанна Дусла дазурбазиб.

Ила цалабикилри Сергокъалала халкьцунра ахIи, «Сергокъалала патриотуни» ва «Сергокъалала туристуни» бикIути жамигIятла кьукьнала вакилтира. Илкьяйдали жибарилри хIурматла гIяхIлира: ДР-лизивси адамла ихтиюртала шайчивси уполномоченный Запир Алхасов, ДР-ла ЖамигIятла палатала вакил Рабадан МяхIяммадов, ДР-ла жагьилтала Парламентла председатель ГIялигъалбицI ХIусейнов, ДР-ла вацIала хозяйствола министрла заместительли узули калунси (экс-заместитель) Улахъай Улахъаев.

Районна бекIла шайзивад гъайухъи, илала заместитель Баркакьади Мажидовли цалабикибтас саламла дугьби дурили, илгъуна балбуцла мягIничебдешличила аргъахъиб.

Сергокъалала районна ЖамигIятла палатала председатель Заира ГIябдулманаповани сунела пикруми дуриб, «Сергокъалала патриотуни» кьукьяла бутIакьянчиби Индира ХанбяхIяндовани ва ГIяйшат МяхIяммадовани биалли, ил балбуцла сиптакартас халаси баркалла багьахъур.

Цалабикибтала гьалав гъайухъунси халатала Советла председатель МяхIяммадсалам МяхIяммадовли ил анцIбукьли нушала культуралис сегъуна мягIна иргъахъулил буриб.

ЧIакала скульптурали районна центр жагабарилицунра ахIи, нушала халкьла цадешла ва чIумадешла лишанни бетаур.

Сергокъалала районна багьахънибала центр