ВатIан саби вегI акIуб­си мер — адамли су­нела цаибил ганз кацIибси, шко­лализи вякьунси, гьалмагъуни бар­гибси.
Ну акIубсира жагаси Ахъушала шилизир. Ишаб дила бегI­тира акIубти саби, дила гъам­тира хIеркабирули саби.
Ахъуша ибси дев цалабиркули саби «ахъу» — чедибси, «ша» — ши ибти дугьбазибад. Дила ши мерлабиубли саби дубуртала дайлаб. БусягIтла замана илаб хIербирули саби авал азирлим гехIдарш адам. Илди лебилра дарганти саби, сабира нешла мезличил гъайбикIути.
Дила шилизир чучи хасси пикри битIакIести мер-мусара лер: Хала Мижит, Ядала вацIа, Мя­гIярала дубурти, къаркъуби адилтIуси мер, музей, мадраса…
Ахъуша цалабиркули саби 6 къатIлизибад: Цаэсил Дайша, КIиэсил Дайша, Хъарша, Хьарша, Панжи и Семга.
Ахъуша ца мерличиб тIашли бу­ули ахIен, ил бархIиличи-бар­­хIи гьалабяхI башули саби, жа­­мигIят­ла гIямрула шуртIри гьа­чамичир-гьачам гIяхIдул­хъа­хъули сари.
Ахъушала шилизибад гIяхI­цад писательти, поэтуни ва машгьурти адамти дурабухъунти са­би. Илдазивадси ца Писки МяхI (МяхIяммад ГIябдуллаев) сай. Ил лебил даргантани вала ва илала назмурти гьар мерлар дучIа. Илдазибад ца саби ахъушантачила:

Сабурлара яхIлара
Ургьур цIацIали бурцу,
Дила ахъушантани
Уркурли гIяра бурцу.
Се балагьли булъалра
Дарган ламус хIебирцу,
Дила ахъушантани
Уркурли гIяра бурцу.
Вайси пикри, нясси кьас
УркIилизи хIедурцу,
Дила ахъушантани
Уркурли гIяра бурцу.
ХIялалсила някъ бурцу,
ХIярамси гьалмагъ хIерцу,

Дила ахъушантани
Уркурли гIяра бурцу.
ГIяхIси далай гIеббурцу,
Рушбат дукла хIебурцу,
Дила ахъушантани
Уркурли гIяра бурцу.
Ахъушала шила шанти ряхIятти, гIяхIти ва бузери дигахъути адамти саби. Ил багьандан Писки МяхIлира ахъушанти гапбирули сай.

ПатIимат ГIябдуллаева,
ДГУ-ла филологияла факультетла 3-ибил курсла студентка