Наб спорт дебали дигахъис. Спортла хIязаназибад наб бегIлара дигахъуси фут­бол­ла жура саби. Наб бегIлара гIя­хIилзуси футболист биалли, МяхIям­мадшапи Сулай­банов сай.
МяхIяммадшапи Сулайбанов Рос­сияла машгьурси футболист сай. Ил акIубси сай 1999 ибил дуслизив, МяхIяч­къала­лизив. Виш­тIа­хIей­чивад Мя­хIяммадшапи МяхIячкъа­ла­лизибси фут­бол­ла академиялизи вашусири.
2013 ибил дуслизив ил Крас­нодарла академиялизи кер­хур­сири. Гьала-гьала МяхIям­мад­шапи Краснодарла жагьилтала ко­ман­дализив футболли виркьули ка­лун. Илис гIергъи ил кIиибил командализи керхурсири. Илавра МяхIяммадшапи чумал дус калун. 2017 ибил дуслизив ил Краснодарла цаибил командализира уцибсири. МяхIяммадшапи академияла бегIлара жагьсигъуна футболистли ветаур, сайра Красно­дарла цаибил командализи дураухъунси. 2017 ибил дуслизиб илини Краснодарла цаибил коман­дализиб сунела цаибси гол бетяхъибсири. Баягъи ко­ман­дализив кIел дус хIязтавиркьули, Мя­хIяммадшапи дебали гьалавяхI арякьун. Россияла лигализир 20 хIяз дарили, илини 8 гол сархес виуб. Европала Лигализивра ил де­бали гIяхIил виркьулри. Илини 8 хIяз­лизир 3 гол дархьиб. БегIлара жагаси ва дебали хIяжатси гол илини Вален­сиялис батаиб. Ил ит дусла бегI­лара жагаси Краснодарла голлизи хал­барибсири. МяхIям­мадшапи биалли, лебил дунъяли вагьурсири. Краснодарлизив гIурра кIел гьатIи дус калун МяхIяммадшапи ва гьатIира гьалавяхI арякьун.
2021 ибил дуслизив МяхIям­мад­шапи Тур­ция­ла «Гиресунспор» бикIуси футболла клуб­лизив хIязтавиркьахъес или гIегудилис вархьиб­сири. Турция­лизив ил ца дус калун. 32 хIяз­­лизир илини 3 гол дархьиб. МяхIям­мад­ша­пини «Гиресунспор» Ли­гализиб калахъес багьандан ха­ласи кумек ба­риб.
Ижара таманбиубли гIергъи МяхIяммадшапи Краснодарлизи чарухъун, амма камси заманала ухIнав ил Краснодарли сагадан ижаралис ведиб. Иш гьакIлизив Израильла «Хапоэль» бикIуси командализи. Илавра ил ца дус калун ва «Хапоэль»-лизи Израильла чемпионатлизиб кIиибил мер буцахъес кумекбариб.
Израильлизивад чариубли гIергъи ил сагадан ижаралис ведиб — «Арис» бикIуси Грецияла командализи. Илав ил дус байхъалацадхIи футболли виркьули калун. Гьала-гьала ил ижаралис уцибсири, гIур биалли ил «Арис»-лис гIяхIизурли, Крас­но­дарлизивад асиб. «Арис»-лизир илини 51 хIяз дариб ва 7 гол дархьиб.
Гьанна биалли МяхIяммадшапи Америкала «Спортинг Канзас-сити» бикIуси командализив футболла хIязли виркьули сай.
Гьанна МяхIяммадшапи хIе­ва­лу­си адам Россияла ухIнав кали хIергар. Дунъяличибра иличила аргъхIергъибти адамти камли саби. Дила пикрили, нушани пахрубирес гIягI­ниси саби нушала дарган дур­хIя Россиялизив ва дунъяличив маш­гьурси футболист ветаъниличи. Бамсриагарли, чекайзурли узуси ва футболла хIяз дигахъуси, спортлизив гьалавяхI арякьунси МяхIяммадшапи Су­лайбанов биштIатасра халатасра гIиб­ратли ветаурли сай, сенахIенну сунела машгьурдешличи хIерхIеили, МяхIям­мадшапи дебали гIяхIси адамли кавлули сай.