1945 ибил дусла февральла 8-личив, цугли 80 дус гьалав, старший лейтенант Михаил Девятаев, немецунала аэродромличибад бомбардировщик «Хейнкель» арбукили, концлагерьлизивад вебшибсири.
Я илис гьалаб, я илис гIергъи тарихлизиб чинабалра илкьяйдали урехиагардешличил бебкIала лагерьтазибад гьаббухъунти биубти ахIенри.
Девятаевличил бебшибтазибад имцIатигъунти дергълизи чарбухъи, гIурра душмантачил бургъули калун. М.Девятаев биалли, чумал баз НКВД-ла лагерьтазив ахтардивирули ватурсири. Илини дурути баянти хIясибли Германияла «сагаси ярагъ» дируси Балтила урхьуличибси фашистунала концлагерь бусягIят заябарибсири.
НКВД-ла лагерьлизивси лётчикличи Сергей Королёв вашусири. Илини лётчиклизи саби калунси концлагерьлизир дирути «Фау-1» ва «Фау-2» дуклумар ракетабачила хьарбиусири. Девятаевли Королёвлис гIягIнити баянти дурутири. Королёвли халаси къайгъи барибсири Девятаевла гьунар бегIлара ахъси шабагъатличил кьиматлабарахъес. 1957 ибил дусла августла 15-личиб М.Девятаевлис Советский Созла Игитла у бедибсири.
1940 ибил дуслизиб Девятаевли Чкаловла уличилси дявила лётчикуни хIядурбируси школа таманаиб. ЧебяхIси ВатIа дергъла цаибти бурхIназив лётчик-истребитель М.Девятаев самолёт-истребитель И-16-личив, гIур ЯК-1-личив урцусири. 1941 ибил дусла июньна 24-личиб илини сунела цаибси душмантала самолёт кабикахъиб. Лерилра илини кадикахъибти душмантала самолётунала лугIи 9-личи абикиб.
1944 ибил дусла июль базличив цIадикибси самолётличивад парашютличил тIяхIухъунхIели, бекI самолётла гIела шайчи чегили, къагъиубси Девятаев немецунани ясируцибсири. Илис гIергъи ил чумра бебкIала лагерьлизи викиб.
Заксенхаузен лагерьлизив илини душманти биргIябиргиб ва цархIил адамла уличив Балтила урхьуличибси, сунезирра дуклумар ракетаби дируси Пенемюнде лагерьлизи ваиб. Илаб немецунала сагаси ярагъ – «ФАУ-1» ва «ФАУ-2»- дурайути гIялимти бузутири.
Лагерьлизиб Девятаевли дергълизир ракетаби душмайчи иртес дихуси самолёт «Хейнкель» чебаиб ва ил, бигIи, арбукес кьасбариб. Илала ил пикри бетерхахъес 9 гьатIи лагерьлизибти ясирти разибикиб. Илдазибадти кIел нушала гIярмияла офицерри.
Бурес чебиркур: Девятаев гьалав бомбардировщикличив урцули калунси ахIенри, ва илини душма самолётуначи немецунала мезли делкIунти аргъес вирули ахIенри. Ил багьандан бурги илдани бикахъибси «Хейнкель», гьаваличи ахъбирухIели, хIилхIи калунсири кабиркули. Аммаки нушала лётчик бусягIят гьар секIайчи шакикиб ва самолёт заки арцахъур.
Фашистунани илис гIергъи чула бегIлара гIяхIтигъунти кIел лётчик бархьиб. Илдира Девятаевлис диргалабухъес хIебиуб. Гьала хили бурасли, 2002-ибил дуслизиб, диубти анцIбукьуни хьулчили дуцили, нушала лётчикла гьунарличила кино кайсухIели, баягъи ит аэродромличив немецунала лётчикуназивадси цаличил Девятаев къаршиикибсири. Гюнтер Хобом бикIусири илис.
Душмантала бигIунси самолётличиб 400 километр ахъили, ясирти нушала бургъанти лебихIи баиб. Немецунала саби бикIули, нушала ПВО-ли «Хейнкель» кабикахъиб. Чихъти устадеш чедаахъили, Девятаевли цIадикибси самолёт белгIуси хъучи кабатур.
2002-ибил дусла ноябрьла 24-личив Советский Союзла Игит Михаил Девятаев 85 дусла гIямруличив итил дунъяличи арякьун.
ХIядурбарибси — ХIяжимурад Ражабов
