ШалгIеббухъунси дусла ноябрьличиб нунира ГIямар ХIяписовлира берхIила сягIят чебаэс ибси мурадличил ГIяйнихъябла шилизи архIя дураберкIира.
ГIяйнихъяб ЧебяхI Убекила сельсоветлизи кабурхуси ши саби. БерхIила сягIят лебси мерличи гьуни чебаахъиб ЧебяхI Убекила шилизивадси ХIусен Расуловли. ГIяйнихъябла мер-мусаличи гъамдиубхIели, лесла удиб мерлабиубси биштIаси ши чебаира. Шилизир Совет хIукуматла замана делшунти, дуркьа юртани тIашлири. БерхIила сягIят лебси мерличи аркьуси гьуни ил шилизибад сабри. Ил лесла хъар кьамаличи ацIес гIягIнилири. Ши-алавси тIабигIятли нуша хIяйрандирулри.
Гьуни кабуцили дашули, шурличи адаира. Илаб ца адам карцеси гъярцIа тIярхъи лебри, суненира шурла хъар кьамаличи аркуси. Ил гъярцIа мерличирад дашули, ца ургъанни душма гIяскар тIашаэс вирни аргъира. Къаркъала сягIятличи адаили, алавчарли хIердизурхIели, дурес хIейэсти, жагати дубуртала сиртани, мурхьти къадурби, Къуппала, Хажаламахьила, УбяхI ва ЧебяхI Убекила, Чунила, ЦIухтала шими дай хъатларван чедиулри. Гьалабла замана ил мер душмайс къаршидеш дирнилизиб пайдалабирусири. Дубурла гIела шайчирти катругти мер-мусаличир дахъхIила луцрала хьулчни лерри.
ГIурра ахъли черяхIдикили гIергъи сабри нушани берхIила сягIят чебаибси. Ил 50х60 сантиметрла бухъяндешличилси, сунезирра алавчарли 40 чукъла ва дайлаб 17х17 сантиметрла барг лерси календарь сабри. Ил нушала Дагъистайс гIядатли бетаурси календарьличи мешубиркулри. Илала кумекличибли мерличибти адамтани берхIи гьаббакIни ва гIелабиркни, ризкьи делгIни, дуги-хIери цугдикни белгидирутири сягIят кьяйдалира бузахъусири.
Къуппала бац-берхIила календарьличил цугбуцибхIели, ГIяйнихъябла календарь аргъес гьамадси саби.
Геологияла-минералтала гIилмуртала доктор М.Исрапиловли Къуппала календарь 13-14 азир дус биубси биъни кабизахъурли саби, ГIяйнихъябла сягIят-календарь чум дус биубсил багьес дурадуркIути ахтардлуми гьачамлис ахирличи дикили ахIен.
Ит бархIи илар нушани даргибти гачIла тIалхIяналичила гъайикIалли, илди жура-журала лерри: цIудара лугIянти, хIунтIена гъуршраддикибти, шалати, Балхъарла тIалхIяналичи мешути. Илдачибли багьеслири илди мер-мусаличиб даршдусмадли адамти хIербирни.
ГIяйнихъябла шилизиб баргибси урхIмешуахIенси сягIят-календарьли Лавашала ва Ахъушала районтала музейти чедирцIахъу.
Нушаб кумекбарибти ва къугъати гIяхIялдеш дарибти Кь.Рабадановлисра ХI.Расуловлисра баркалла багьахъес дигулра.
Шамил ГIямаров, «Къуппала край руркънила, археологияла ва палеонтологияла музей» МКУК-ла заведующий, тарихла гIилмуртала кандидат
