Нушала улкализир гьанна кадиркути анцIбу-кьуна­ни вайнукьабачил барх вершабира уржили биъни чебиахъули саби.
Ил гIячихъбирниличила бурули саби дявила хасси балбуцла бутIакьянчибанира. Илдала гъайлизибад иргъуливан, нушала улкала бахъал вершаби леб. Илдани нушала мягIничерти объектуначила, машгьурти адамтачила баянти душмантази дурули сари. Гьайгьайрагу, кIинайс миллатчибани илди чула вайти кьасанала мурадунас пайдаладирули сари. Буралли, вершабани душмантас гьар се-секIайзир гьамаддешуни алкIахъули сари.
Гьаннала замана вершаби белгибаресра дебали къиянси баркьудили уббулхъули саби. ИшбархIи илди хIечил ихтилатбикIули, уркIилизи атIесли гъайбикIули, гIергъила бархIи къакълизи ханжал бурхIили, кабирули саби. Ца кьямлизивад укунси адам нушала дагъистанлантани сунела даргла узизи кьабулвирули вирар ва илгъунали сунес селра вайси хIебиру или гьанбиркур. Амма тяп илкьяйда вяшбикIули, чучи бирхауди бихьахъили, кIинайс душмантази нушала бургъантачила баянти дурули, миллатчибала шаликарти бахъал саби.
Камли ахIен вершаби нушала улкала декIар-декIарти регионтазибра, шагьуртазибра. Илдира душмантачил бузули, илдани ибси бирули, адамти бачабархахъес, гъузгъалдибиахъес халаси къайгъи дакIубирули саби. Вершабала гьир-кусличира, гьайгьайрагу, бирхарутира камли ахIен. Иличирли нушала гIямрулизир тIягIямагарти анцIбукьунира кадиркули сари.
Ил багьандан нушаб гьар-чинаралра мяхIкамли дирес, тянишли ахIенти адамтази мягIничерти баянти хIедурес чебиркур. СенахIенну жагIялла бархIи илдани нушани дурибти нушачи къаршили каэс асубирар.
Вершаби мурталра бирутири, жявхIелла дусмачибад бехIбихьили. Амма илдала къуйрукъ мурталра къантIсили уббулхъули бирар. ВегIла улкалис вершадеш дарибтачи, дила пикрили, душманталара халаси-декIар бирхауди хIебирар. Чус хIяжатси хIянчи барахъили, илди агарбарес къайгъилизиб бирар. ХIебиалли, сен пикрихIебулхъутира вершаби чула баркьудлумачила? ИшбархIи арцлис вегI акIубти мер-муса дицибхIели, жагIял чучи мешутанира саби илкьяйда бицес асубирниличила? 

Салимат ГIялиева