Нушала хала бегIтала ва бегIтала арадешла да­ражара аги-хIялра де­бали къулайтили урдулхъули сари, гьанна нушалаван ахIи. Сен или хьарбиадалли, сенахIенну илдани дукути лерилра берк-бержла масани дармунти ва хими­катуни гъудурхIедарибти сархIели: чула някъбани дакIахъиб­ти, би­зити, гьарли-марти. Илдигъунти про­дук­тунани, гьайгьайрагу, ара­деш­ли­чира гIяхIси асар бета­ра­хъу­си саби.
ИшбархIи нушани биалли сегъунти продуктуни дукулрал лебтасалра якьинси секIал саби. Ил багьандан арадешла даражара бархIиличи-бархIи гIяшсили бетарули чебиур. Ил къулайбиахъес багьандан бахъалгъунтани кьялши бицIили дармунти дужули сари. Илди держибхIели, кьяшмачив вашуси, хIедержибхIели, ухьалав вируси адамла арадешла даража къулайси саби викIес вирару, гьатIи? Сеналра хIейрар. Дила пикрили, дармунтанира адамла арадеш заманалис къулай­бирахъули саби, амма инсан тамай аравирахъули ахIен. Ил­кьяйда биалра бахъалгъунти гьести гIямрула адамтас, чула ара­дешла бекIлидиубтигъунти хьулч­ни гIердуцес багьандан, ца­ца­дехIти дармунти къяббердни агарли дужесра чевкъули са­би (ми­саллис, кьаркьайзирти им­цIати шин дурайути, уркIила башри гIеббурцути ва цархIилти биркIанталара дахъхIи диубти излумачи къаршити).
Дармунтала замана асар че­би­ухIели, бусягIятла чеалкIуси нас­лули имцIали пайдаладирули сари хурегличил дарх дужути, кьаранала хьулчиличир акIахъубти БАД-ни. Гьарли-марли, илдани, гьанна берк-бержла даража гIяш­си замана, кьаркьала хIяжатти витаминтачил, микроэлементуначил къулайли гIеббурцули саби. Илди дужес дехIдихьибхIели, нушани арадешла аги-хIял ункъдиънира хIисаббирулра. Амма илди-ургарра къалпти диэс асубирар, ил багьандан сахъдеш дакIудиресра чебиркур. Хасси документ лебси яра лебтасалра тянишси компанияли дурайуси БАД чеббиркIес къайгъибиреная. ГьатIиралра гIяхIси — гьар бархIи нушани дукути продуктуни, дармунти гъудур­хIедарили, вегIла хъумачир дашахъути диалли. «Нуша цаладиркутира нушани дукути секIайзирад», — бикIули бирар исламла диннизиб. Ил багьандан нушаб къулайси арадеш биахъес дигули диахIелли, букуси хурегличира алавчарти шуртIрачира пикри бяхIчииэс чебиркур. Илди диахъес биалли, вегIлира къайгъи дакIубирес гIягIнили саби.