БегIтала дурхIяличи ди­ги умцес сегъунтилра умц­­лабачил хIейрар или гьанбиркули саби. Бара акIуб­ти диштIати жан илдас чула гIямруличирра ахIер­тили ка­дилзан.
ВиштIаси кьяшмачи кайзурхIейчивад, халаваили, сунела хъалибаргра акIахъубхIелира, бегIти ил хIерудиличил ва дигиличил гIевуцес гIелумхIебилзан. Илис къияндикибси замана мурталра мякьлаб бирар.
ГъайикIес бурсивиуб­хIей­чивад дурхIяли сунела бегI­тази лугIилашал дахъал суалти хьардиу. Дунъя багьес, ил бяркъес пикриличил, виш­тIасини бегIти чула суалтачил бумсахъу. Амма халатани гьачамалра илизи «анцIукьирину, вахъ суалмайкIуд» яра «чуйна хIези тикрарбируси» или, сабурлизибад бухъи, дебали гIя­сибиубли чехIебиис. Зумали къаршидиркур ур­гIерти аги-кьяйда: халакабаили, чулара хъали-цIа дуцибти дурхIни, бухънабаибти бегIтани, хIергъули, гьачам бурибси секIал тикрарбарахъалли, дурхIни дебали сабурлизибад булхъан, гIясибирар. Тамаша ахIену, илцад халаси дигиличил айкьурси дурхIяла лихIбазибад гIянцIбиубти бегIтази чебетаахъили секIал аргъахъес илцадра сабур хIебиъни. ДурхIяла гьарил баркьуди гIеббуцес, илала челябкьла ша­ла­сили биахъес дуги-хIери хIеили бузули, лерилра чула гIямру биштIатас хасдарибти бегIти илгъуна жавабличи лайикьлив?
Иш дунъяла къакъличиб бегIтачиб дурхъати адамти лебти ахIен. Ил багьандан къайгъибиреная дируцад илдала мякьлар диэс, хIерудиличил ва дигиличил алавбурцес, илдала уркIи разибарести дугьби дурес, хIергъуси секIал сабурличил иргъахъес. ИлхIели хIуша-ургарти бархбасунира уржибтили детарар, дигира имцIабирар.

Салимат ГIялиева