Хайдакьла районна Жавгъатла ши­лизивадси Салавутдин ХIя­са­нов РФ-ла пачалихъла ша­ба­гъат­личил – Жуковла уличилси ме­даль­личи, илкьяйдали «Дявилизив де­кIа­ру­хъни багьандан» ме­дальличи лайи­кьи­киб. Дявила хасси балбуц бетурхути цаиб­ти бурхI­назирал илини Россияла Ярагъ­ла­дариб­­ти ЦIакьанала къяя­­назир дявила къул­лу­­къу­ни таман­дирутири.
Жавгъатла шилизив акIубси С.ХIясановли, илабси урга даражала школа таманбарибхIели, 2006-ибил дуслизив экономикала ва правола институтлизи керхурсири, «финансы ва кредит» санигIят хIясибли багьудлуми касиб. Амма кIинайс илини сунела кьисмат дявила къуллукъуначил бархбасахъун. Сунела хIянчи ункъли тамандируси дарган командованиели чуйнара Грамотабачил ва Баркаллала кагъуртачил шабагъатлаварибси сай. Бархкьябани ва командиртани иличила, жавабкардеш дихуси, кадизахъурти тяхIяр-кьяйда дузахъуси, къиянти аги-кьяйдализив вяшикIес балуси ургъан сайливан, бурули саби.
2016 ибил дусличирад С.ХIясановли дявила къуллукъуни Калининградла областьла Советск шагьарлизир тамандирулри, 2020-ибил дуслизив виалли, ил Гусеевлизив къуллукъличив ахъуциб. Кьанни илини Михайловский дявила артиллерияла академия хъараахъурли, офицерла багьуди ва лейтенантла звание касили сай.
2022 ибил дусла февральличивад СВО-лизивси Салавутдин ХIясановли дявила хъарбаркьуни тамандирнилизир устадеш чедиахъули сай. Илала сахъдешличил Россияла гIяскурти мерладиубти мер-мусаличила ва дявила техникаличила баянти душмантази дедлугуси мерличивси адам белгиваресра имканбакIиб. Гьанна офицерли артиллерияла дивизионнис хъарбаркьуни дедлугули сай.
Ургъанна хъалибарг иличила секьяйдали кьакьабикIулил бурули сари илала хьунул Марьям Мурадовани: «Илини СВО-лизир бутIакьяндеш дирути гьалар-гьаларти бузри, илис кьяйдали, нушабра дебали къиянтили урдухъун. Бархбасуни кадилзахъес мурталра-декIар бетарули ахIенри, хаслира – дявила хасси балбуцла бехIбихьудличир. Гьанна ихтилатдикIести имканти имцIадиуб, аги-кьяйдала ва детурхахъути хъарбаркьуназибад дигахъуси биъниличилара хъумхIертули. Баралра имканбакIалли, отпускра бедлугули саби. ЦацахIели дусли кIина кIел жумягIлис хъули вакIес биркули саби, амма бамсриихънила бетуц гIелайзи арбухес хIяжатбиркути анцIбукьунира къаршидиркур. Нушани иличи пахрубирулра ва мурталра хъули чарулхъниличи хIерлира».
ИшбархIи лейтенант Салавутдин ХIя­санов дявила хъарбаркьуни тамандирес даимвиубли сай. АхIерси Жавгъатла шантас илала гIямрула гьуни чеббикIибси баркьудилис мардешла, жавабкардешла ва къияндешунас мутIигI­хIекI­нила гIя­чихъси мисалли бетарар.
Хайдакьла районна бекI Запир ХIясановли Игитлис дявила къуллукъуни тамандирнилизир гъабзадеш дакIудирнилис баркалла балахъули сай: «Районна администрацияла ва лебилра хайдакьлантала шайзибад Салавутдин ХIясановлис баркалла балахъулра, дявила чебла ихъухIели гъабзадеш ва игитдеш дакIудирнилис. Илис чIумаси арадеш, гьарбизуни дулгулра, жяв-жявли хъалибаргличи ара-сагъли чарухъаб! Илкьяйдали баркалла багьахъес дигулра хьунул Марьямлисра ХIясановхъала арагIебли хъалибарглисра, ургъаннис икьалабирнилис, сабур дакIубирнилис ва иличи бирхауди бихьнилис. ХIушала хъулиб мурталра даршудеш, баракат ва разидеш диаб, нуша, районна адамти биалли, нушала игитуначи пахрумани диркьехIе ва илдачи хIерли дирехIе».
Хайдакьла районна администрацияла пресс-служба