Ахъушала районнизибадти бахъал гIяхIгъабза бургъантани бутIакьяндеш дирули саби СВО-лизир. Гъабзадешличил бургъули, гьунарти чедиахъули, ахъти шабагъатуначи лайикьбиркули саби. Илди-ургаб камли ахIен дявила авлахъличир чула жан харждарибтира, арадешлизир нукьсандешуни детаурли хъули чарбухъунтира.
ГIямрулизибад жявли арбякьунти гIяхIгъабза бургъантачила лукIес дебали къиянни саби, гьатIира къиянни саби камти гIямруличир чула жан дедибти уршбачила лукIес. Илдазивад ца сай 20 дусла гIямруличив дявила авлахъличив алхунси Кавкамахьилизивадси жагьил урши ГIялиев МяхIяммад МяхIяммадович.
МяхIяммад акIубсири 2004-ибил дусла мартла цаличив гIядатла хъалибарглизив. БегIтани гIяхIси бяркъ бедибси, халатала хIурмат бирес балуси дурхIя сайри ил.
Кавкамахьила урга даражала школа таманбарили гIергъи ВатIайс къуллукъбарес арякьунсири. ВатIа гьалабси чеблара ахъили, мардешличил къуллукъра барили, хъули чарухъес замана баибхIели, МяхIяммадли вягIда къулбасбарили, СВО-лизи арякьунсири. ВатIайс къуллукъбирули, халкьла челябкьла даршуси биахъес багьандан пай кабирхьули, МяхIяммад гъабзадешличил ургъулри. 2024 ибил дусла ноябрьла 21-личив дявила авлахъличив ил жагьил урши къел-хIерзи агарли веткахъиб.
2025 ибил дусла январьличив алхунси урши варгиб ва сунела хала бегIтала, минала мер-мусаличи хили, хIяривихьиб.
МяхIяммад ГIялиев гIямрулизивад арякьи гIергъи, РФ-ла оборонала Министерствола шайзибад илала бегIтази «Гъабзадешла орден» бедиб.
Аллагьли Гьалжанализи хьуравараб сай, бегIтас Аллагьли сабур бедаб, чула жагьил дурхIяла анцIкьи-децI дихIяхъес, сецад къиянни биаллира. Чисалра кьадармабараб, гIямрули хIебелкъунти, чула ахIерти дурхIни хIярибихьес! Аллагьли лебилра бургъанти мицIирли чула бегIтачи, хъалибаргуначи, дурхIначи чарбухъахъаб!

Сабият ГIябдуллаева