БегIтас чула дурхIни арали ва разили халабикIули дигахъу. ДурхIнала арадешличила къайгъни бархьси беркала букахънилизиб ва гIемсни дузахънилизибцун ахIенну, чейхъути, чулира урехи алкIахъути излумазибад мяхIкамдеш бирнилизиб саби. Вакцина барахъни – зягIипхIеркнила асарчебси тяхIяр саби. Амма, цацабехIти бегIти, къянала хабуртачи бирхаурли, чула дурхIнас прививкаби дирахъес гIягIнисил ахIенал ташмишбикIули саби. Иш макьалализиб прививкала мягIничебдешличила бурулра.
ДекIти излумазибад мяхIкамдеш. Вакцинали хъехIла, биркIанти дурцахънила, аринжла, кьакла, нервабала ва цархIилтира чейхъути излумазивад мяхIкамиахъес кумекбиру. Илди излумани декIти асурти дирахъути сари, цацадехIти анцIбукьуназиб аги чулахъдешличи яра бебкIаличи бетиркахъули бирар. Вакцинабани илди излумачи къаршити антителаби алкIахъу ва изала тIинтIхIебикIахъу.
Урехиласи ахIен. Бахъалгъунти бегIти прививкали декIти асурти детарахъу или урухкIули саби. Амма, вакцина дахъал дусмазиб ахтардибарили, урехиагарси ва асарчебси биъни кабизахъурли саби.
ЦахIнабси иммунитетли лебилра мяхIкамбиру. 95 процентла кьадарлизибти адамтани вакцинаби дарахъалли, коллективный иммунитет алкIан. Илини медицинала сабабти хIясибли вакцинаби хIедарахъибти адамтира мяхIкамбиру. Вакцина хIебарахъалли, чейхъути излумани вегIлисцунра ахIи, вегIла гъамтасра урехи алкIахъуси саби.
Вакцина – экономикалашал асарчебси тяхIяр. Прививкабала кумекличил агардарес вирути чейхъути излумани дурхъати дармунти тIалабдарес асубирар. Вакцинали илдигъунти харжани хIедарахъес ва арадеш гIеббуцахъес кумекбиру.
Жагьси наслу мяхIкамбарни. ДурхIнас прививкаби дарахъниличибли бегIтани излумазибад жагьси наслу мяхIкамбиру. Вакцинаби дирахънила программаби гIямрулизир ункъли детурхахънили, чахьагъунти излуми тамай агардарес имканбакIиб. Нервабала изала (полиомиелит) агарбирнила баркьуди ахирличи биркули саби. Халкьли даарила кьадарлизир вакцинаби дирахъалли, чеалкIуси наслу урехи алкIахъути излумазибад мяхIкамбарес дирехIе.
Вакцина барахъни жамигIятли жавабкардеш дихни саби. Прививкабани ца адамцунра ахIи, арагIебли жамигIят буланра мяхIкамбиру. Вакцина хIебирахъалли, излуми тIинтIдикIар ва лебтасалра урехи алкIахъу. ВегIла дурхIяла ва жамигIятла арадешличила къайгъни бегIтани жавабкардеш дихнила бутIа саби. Прививкабала мягIничебдешличила ва ил барахъес гIягIнили биъниличила иргъни нушала ва нушала дурхIнала арати гIямруличи кацIибси ганз саби.
Къянала хабурти тIинтIхIедарахъни. Гьаннала замана вакциналичила дахъал къянала хабурти лер. Ахтардидарибти медицинала багьахънибачи дирхеная ва тухтуртачи дугьадилзеная, насихIятуни гIердурахъес багьандан.
ДурхIнас прививкаби дирахъеная. Илдала челябкьла разиси биахъес дигадалли, ишбархIи илди къайгъначил алавбуцес чебиркур. ХIушала дурхIни арали ва разили калаб!
ХIушала дурхIнала арадеш хIушала някъбазиб биъниличила хъуммартидая, хIурматла бегIти!
МяхIяммад-ГIяли ГIялибеков, Усишала тухтуртала амбулаторияла заведующий
