Кьади ГIус­ма­но­­­вич Ими­нов 1961 ибил дус­ла январьличив Дахадаевла район­на КьярбачIимахьилизив акIуб­си сай. Илис бегIтани Че­бяхI­си ВатIа дергълизивад чар­­­хIевхъунси нешла дудешла у бедибси саби. Лебилра шан­ти бикIуливан, сунела ха­ла ду­­­­дешгъуна, са­бур­чев­сили, дахъал гъай агар­си­ли, бурибси чилилра уб­хIе­бир­хъусили ветаурси сай Кьа­ди ГIусманович. Ил цаи­бил класслизивад ве­хIи­хьи­ли шула кьиматуначил учIу­си­ри, чедирти классуназир фи­зи­ка­личи, математикаличи диги им­цIадиуб. Илди пред­метуни, цар­хIилтазивад декIа­рул­хъули, ункъли далутири.
Шилизибси школа гехIел классла сабри, 9-10-ибти классуни илини Уркухъла 1-ибил школализир делчIунтири.
Школа таманаили гIергъи 1979 ибил дуслизив ДГУ-ла фи­зикала математикала фа­ку­ль­тетлизи учIес керхурсири. 1982 ибил дуслизив ДГУ-ли­зивад Ленинградла А.А.Ждановла уличилси Пача­лихъла университетла физикала факультетлизи учIес шу­ру­хъун. 1986 ибил дуслизиб илаб белчIуди хъараахъур. ДГУ-ла аспирантура 1990 ибил дуслизиб таманбариб.
ГIулухъахIейчивад илини сунечиб биштIати уз­би-руз­бас бар­кьудилизиб, бел­чIу­ди­ли­зиб гIиб­рат чебиахъу­си­ри ва гьарил шай­чибад бегIтас ку­мек­би­ру­сири.
Кьади ГIусманович илцадра сунечила гапхIейкIуси, ха­ла­хIерхуси, халкьла ургав валгунси сай, ил дила гъамси тухум виалра, (нушала хала дудешуни узбикьурти сабри, дила уршила рурсбас ил хала нешла узи сай), гIилмулизир ва бузерилизир илцадра халати сархибдешуни лерниличила нунира бархли хIебалули калира.
Нушала жагьси редактор Рабадан БяхIяммадовли даргала гIялимтачила лукIахъес хъархIебарибси биалри, гIурра хIебалули калесра асубири.
Интернетли илис гIергъиси кьимат кабалтули саби: «Россияла халаси гIялим, физик, фи­зикала-математикала гIил­мур­тала доктор, профессор, дахъал дусмазив ДГУ-ла физикала факультетла преподаватель. Физикала дурабадра, гьаннала заманала багьахънибала технологияби ва компьютерная графика студентунази руркъяхъули узуси гIялим сай».
ГIилмулизив узулицун ка­хIели, илини дебали жаваб­карси администраторла хIян­чи­лисра бекIдеш дирули сай. Ил ДГУ-ла багьуди бедлугнила да­ража къелгIеббикуси Управлениела начальник сай.
Кьади ГIусманович Ими­нов­ли ил управлениялис 2010-ибил дусличирад бекI­деш дирули сай. Гьанна бу­ся­гIят бузули лебсигъуна ка­биз хIя­­­дур­­бирухIели управлениелис бекIдеш дирес ве­хIи­хьиб­сири, ва чеветаили, гьар секIал къелгIердикули узусири. Илала бекIдешлиуб управлениела кабиз гьачамцун ахIи барсбиуб.
Багьудила даражалис кьимат бедлугули бузуси ДГУ-ла уп­равление, халкьани-ургар кадизахъурти багьуди бедлугнила бяхIчибизуни хIясибли ка­сибси сертификатличил гIеб­бу­­цили саби.
Управлениели студентунала багьудлумас ахъти кьиматуни кадалтни, ва дедибти кьиматуни дархьти диъ­ни гьарил бар­­хIи­ла бузериличил гIеб­бур­цули саби.
Илкьяйдали профессортала ва преподавательтала бу­зе­рилис кьимат кабалтнила тя­хIяр-кьяйдара чIумали кадиза­хъур­ли сари.
Илгъуна чебетаибси бузериличила гIергъити далилтани бурули саби.
Лебилра ДГУ-лизиб бузути авал кьукьяличи бутIили саби: профессорти, доцентуни, халати преподавательти, преподавательти. Илдала бузерилис кьимат чула кьукьнала бухIнаб кабалтули саби. Иличибли гьарил узусила бузерила сархибдешуни дархьли кьиматладарес имканти алкIули сари.
Нуни Кьади ГIусманович вални хIя­сибли, илала паргъатти хIял-тIабигIятли ва мурхьти багьудлумани имкабикIахъули са­би ДГУ-лизибси багьуди бедлугнила дара­жа ахъсили калахъес ва багьудлумас бед­лугуси кьимат мурталра бархьсили биахъес.
Илини кабизахъурси гIилмуртала кандидатла хIянчила у дарган мезли белкIес тяхIяр агара. ХIянчи плазмаличил, нано-секундла разрядличил, щелевый катодличил, гелийра аргонра дархдяхъибси газличил бархбасунси саби. ГIилмула хIянчи илини 1994 ибил дусла апрельличиб, ДГУ-ла базаличиб кабизахъур ва ил физикала-математикала гIилмуртала кандидат ветаур.
Суратуначил дархли, гIил­му­ла хIянчили 150 бяхI дуцили сари, ил хIянчи гIурлизиб бетерхахъурси гIилмуртала докторла хIян­чилис хьулчили бетаурли саби.
ГIилмуртала докторла хIянчи 2001-ибил дусла декабрьла 28-личиб ДГУ-ла конференц-заллизиб бетерхахъур. ГIил­мур­тала докторла хIянчи дахъал дусмазир дура­деркIибти хIя­лумцI­лабала хьарахъудли бетаур. Илди хIя­лумцI­­лабазир сархибти баянти, дархьаначи, гьаннала ахъти технологиябазир дузахъули, багаладирули сари.
2018 ибил дуслизиб илис «Физи­ческая элект­роника»-ла сани­гIят­ла профессорла у бедиб.
Илала дахъал гIилмула хIян­чурби сунечил барх бузути ДГУ-ла гIялимтачил дарх делкIунти са­ри, имцIаливан профессор — Н.А.ГIяшурбековличил. ХIян­чур­би фи­зическая электрони­калис, плазмала фи­зикалис, инертный газанас, наносекунд духъяндилтIути хутIла разрядунас хасдарибти сари. Илала бузери ДГУ-ла физикала факультетла физическая электроникала ка­федраличил цIацIали бархбасунси саби. Илини жигарчебли педагогла ва методикалашалси хIянчира бузахъули сай. БекIлидиубти бяхIчи­би­зуни сари багьахънибала технология­би ва программирование, компьютерная геометрия ва графика, физическая электроника, плазмала физика. Илини гьарахълабадси (дистанционное) ва лугIурбала шай­чибси багьуди бедлугни гьалабяхI арбикули сай.
Кь.Иминов ДГУ-ла гьаннала заманала багьуди бедлугути тех­нологиябала порталлизи кадихьибти интерактивный элект­ронно-методологический комплексунала автор сай. Иличибли студентунани гьарахъларад компьютерная графикала шайчирти багьудлуми касес бирули саби.
Профессор Кь.Иминовла вы­пускникунала квалификацион­ный хIян­чур­ба­ла темаби, ма­гистр­тала диссертацияби физи­кала технологиябала факультетла, физикала электроникала кафедрализирти гIилмула бяхI­чибизуначи чекадизурли далдикахъибти сари.
Студентунани ва магистртани илала бекI­деш­лиур чер­ди­­кIибти кIел бяхIчибиз хIя­сиб­­ли хIянчурби лукIули сари: плаз­мала экспериментальная физика ва багьахънибала технологияби дузахъни. Гьар дус илала бекIдешлиуб студентунани дипломла хIянчурби лукIули сари ва белчIуди та­манбирули саби. Леб иличил барх ва илала бекIдешлиуб гIимулизиб жигарчебли бузутира, гIилмула журналтази статьяби кадирхъутира, мисаллис гьанбушалли Г.М.Юсупова, К.Т.Таибов ва гIяхIцад цар­хIил­тира.
Кьади ГIусманович физический факультетлизив, чекайзурси, тIалабкарси, бархьси кьимат кабатес балуси, сунени кабирхьуси предмет мурхьли бяркъурси педагог сайливан студентунани кьабулирули сай.
Ардякьунти дусмала выпускникунани им­ти­хIянтачив илала чекайзурдешличила, багьуд­лумас кабалтуси кьиматла бархь­дешличила бу­рули саби.
Сегъунтилра халаверхурдеш агарси, шабагъатуни касес хьул­хIей­­кIуси, сабухъчебдешличил узес­­цун балуси виалра РФ-ла багьуди бедлугнила шайчивси хIурматла хIян­чизар ветаурли сай, РФ-ла багьуди бедлугнила Министерствола ХIур­матла Грамоталичил шабагъат­лаварили сай, ДГУ-ла хIурматла хIянчизар сай, дахъал дусмазибси асилси бузери багьандан ДГУ-ла гIялимтала Со­ветла хIукмуличил бедлугуси кор­­порацияла хIурматла лишан ка­­сибси сай.
2011 ибил дуслизив РФ-ла чебяхIси даражала багьуди бедлугнила шайчивси хIурматла хIянчизар сай. 2021 ибил дуслизив «Багьуди бедлугнила шайчибси пачалихъла политика бетурхахънилизи кабихьибси халаси пай багьандан» — бикIуси медаль касили сай. Ил гьанна 35 дус чеветаили, лерилра багьудлуми ва цIакьани кадирхьули Дагъиста Пачалихъла университетлизив узули сай. Хъалибаргла гIяхIси бекI сай. Илини кIел рурси халабаахъили, багьудлумачил бегIбарили гIям­рула гьунчи дураиб. Сунела нешла у бихуси Са­ли­­хIят юрист сари, Москвализир рузули сари. Риш­­тIалгъунани, неш Райсатливан тухтурла са­ни­гIят касиб. Ил Москвализир ординатурализир ручIули сари.
Кьади ГIусмановичли дебали хIян­чилизи вар­хили виалра, вайтира, гIяхI­тира анцI­бу­кьу­назив шанти-тухум­та­чил варх виэс замана бургу.
Иличила белкIес пикри­ба­рибхIели чумал суалра хьардаибтири. Илини чардарибти жа­вабти селра барсхIебарили бу­чIантас гьаладирхьулра:
1. Илала хIянчилизиб бегIлара къиянси, студентунази аргъахъес, чус ахъси даражала багьуди касни дебали мягIничебси биъ­ни, илини чула челябкьла лай­икь­си, хIурмат-кьиматласи бета­ра­хъу.
Буралли, гьанна лугуси гIялимтала, преподавательтала алапалис студентуни ункъли бучIахъес гьамадли ахIен;
2.ГIялим ветхIеурси виалри, илис тухтурли узес дигусири.
3. Илала уркIи арадешли ва сунела гъамтала гьарбизунани разибирули саби.
4.Сунела хъулиб дигуси баркьудилизи ахъибхIели, чилра диргалахIелхъуси мерличиб, юлдашунала, сайван пик­ри­би­кIутала ургаб гIяхI­бил­зули саби.
5. ИмцIаливан санигIятла литература бучIули сай, замана лебли биалли тарихла литература белчIес дигахъули сай. БегIла гIергъи Л.Троцкийли белкIунси «Сталин» бикIуси кIел томла жуз белчIи сай.
6. Адамлис бегIлара дурхъати арадешра багьудира сари, илди арц дедили асес хIейрар. ХIушала арадеш ахIерабарая, багьудлуми къиян кабихьили кайсес бурсидиирая, ил хIушала дурхъаси хазна саби.
7. Илис волейболли виркьес ди­гахъули сай. Илдигъунти хIя­за­нани дахъал хIяжатагарти пик­руми ардихули сари, чархла хIял-тIабигIят гIяхIла шайчи дарс­дирули сари.
Россияла халаси гIялим, шан­тала ва тухумтала пахру ва хъарихъ, Кьади ГIусманович Ими­новлис чIумаси арадеш, хъалибарглизиб талихI, бузерилизир гIурра дахъал сархибдешуни диубли, лерилра пикрумира, кьасанира гьардизурли дигулра.