БерхIили ванадиру
Ванзала чедир гIямру,
МалхIямдешли сагъдиру
Кьисматли дячун гIямру.
Адамла зугIлуми гьунчидуршес ва изала-зугIяла агардирес багьанданра ЧевяхIсини чеввикIили караматдеш хьурадарибси инсан виэс хIяжатси сай. Дигеси саби, илдигъунти гIяхIбаркьла адамти камли биалра, нуша-ургаб лебни. Хаслира адамтала арадешлис къарауйчибти-ургаб илдигъунти багьадурти къаршибиркни нушала игъбар саби.
ДР-ла «Арадеш къулайбируси больница» ибси ГБУ-лизив узуси Дахадаевла районна ДейбукIла шилизивадси МяхIяммадов ГIялиших ХIяжиламяхIяммадовичличила умутличил бурес вирар, бикIуливан, хIяжатбикибхIели гIягIниси мерличив къаршиикибси адам сай или. Абзурли республикализибадли някъби-кьяшми ва цархIилти биркIанти излумала чябхъинтаур тамай инжитдиубти адамти цалабиркули саби ил больницализи. Инсультлизи ва бехIемцIлизи бикибти, бухъянси манзиллизиб букIмала ва цархIилти излумани инжитбирути адамти гIяхIдеш бетарниличи хьулбикIули, башули саби. ГIяйсначил, коляскабала кумекличил ва илди агарли халаси къияйчил башути адамтачи хIерикIалли, гьайгьайрагу, уркIи кьакьахIебакIес тяхIяр агара. Илаб леб дигалли жагьилти, дигалли гьести гIямрула адамти. Палестинализибадти адамти бархли лебри илаб. Иларадси 15-16 дусла гIямрула рурсила ца кьяш чеббяхъили чебаибхIели, дила хIулбазирадли нургъби гердухъун. Илкьяйдали децIли берцIибти, излумани цIакьани керасибти, кьисматли инжитбарибти адамтани сабри имцIаливан ил больницализи гьуни баргибти. СВО-лизир бутIакьяндеш дирухIели бяхъибти жагьил бургъантира камли ахIенри илаб. Илдазибадли лебтасалра, бегI гьалабси яргализиб, баркьудиличил, малхIямси девличил, дармунтачил кумек гIеббаахъес хIяжатлири. Илгъуна кумек гьарилличи чебетаахъес къайгъилизибтазибадли ГIялишихла у бегI гьалаб гьанбушес лайикьли саби. СенахIенну абзурли больницализибти медицинала хIянчизартира зягIиптира иличила гIяхIти гъай дурули, уркIи-уркIилабадли баркалла бикIулри. Тухтур ветаурли гIергъи, илгъуна хIурмат сархес хIейалли, илис гьарли-марси тухтур сай викIес хIейрар.
ГIялиших ХIяжиламяхIяммадович акIубси сай ДейбукIла буркьа шилизив.
— ИтхIели нушала шилизир 150 хозяйство дири, — гьанбиркахъули сай илини. — Шилизиб гехIел дусла школа сабри лебси. Илаб цаибил класс таманаибхIели, дудешли ну хIулбазиб нукьсандеш лебни багьандан, Избербашлизи хасси школализив учIахъес вархьибсири.
Избербашлизиб белчIуди хъараахъурли гIергъи, ГI.МяхIяммадов Дагъиста мединститутла лечебный факультетлизи керхур. 1998 ибил дуслизив тухтурла санигIят касибси дубурлан урши, Ханты-Мансийскла областьла Мегион бикIуси шагьарлизи узес арякьунсири. Илав «къалабаси кумек»-ла кабизлизив 15 дус узули калун ил ва чумра зягIипсилис кумекбарес бажардиикиб. ИтхIели сабри илини Санкт-Петербургла Сеченовла уличилси институтлизиб спортла ва ЛФК-ла тухтурла санигIят касибси. ИлхIейчивадли цазаманализив «къалабаси кумек»-ла ва ЛФК-ла реабилитологли узули калун.
2021 ибил дуслизив Каспийсклизи чарухъи, сунела къуллукъ даимбариб.
— КIинайс Москвализи укьес хьулухъунра ва илавра «къалабаси кумек»-ла кабизлизив узескайира. Вызовличи вякьунхIели, итзамана итцад халаси шагьарлизиб дарганти къаршибикибхIели, ну илцадра разивиубсири. Нешла мез аргъибхIели, итхIели дила ахIерси ДагъистайзивхIеливан бизур, уркIи ца гIяжаибли хIулбукIиб, — итхIелла анцIбукьличила гьанбикахъибхIели, ГIялишихла дяхIличиб гьаннара хIулбукIрила зурхIяб ухескабииб ва, сунела узи-рузичила гъайвикIухIеливан тIама малхIямли зайбухъун. — Жагьил хъалибарглизив урши зягIипикилри ва «къалабаси кумек» жибарилри. ДурхIяла дудеш дявила частьлизив узулри, неш — биалли, счетная палатализир. ИтхIейчирадли нуша тяништили детаурра.
Наб Москвализиб гIяхIхIебизур. Илаб 4 баз хIянчи барили гIергъи, 2022 ибил дуслизив кулпетличил варх Дагъистайзи чарухъунра. БегI гьалав ЦМК-лизив (Центр медицины и катастроф) узескайира. Нуни гIяхIил балуси хIянчи бузахъес дигулри ва илав камси заманалис сайри узули калунси.
ГIялиших ХIяжиламяхIяммадович илкьяйдали ДР-ла «Арадеш къулайбируси больница» ибси ГБУ-лизив ЛФК-лизив реабилитологли узескайиб. Амма иличил цархIилти специалистунира биэс хIяжатлири, сепайда камси алапа сабхIели илаб жагьилтас бузес дигули ахIенри.
Илав бусягIятал дубурлантала гIямру къиян-жапализи гIеладушибси дяхIягарси изайчи къаршили ургъес вехIихьиб. Ил тухтурличила адамтани дурути иргъухIели наб ишгъуна сурат гьалабизур: зурбаси галга хабарагарси хъябхъяли ванзализирадли дайхъала хIячмира къябдарили, ца шайчи бикахъилри. Ил кабикили, тамай бебкIес яра кумекбируси ахъалли, сунела мерличи тIашкабизурли, хIербиэс хIядурлири ва цIиркIси дягIли кьялуби вяшардикIахъулри. Хапли илхIели илала мякьлав адам вагьарвиуб ва сунела зурбаси цIакь пайдалабарили, ил ахъбурцес вехIихьиб. Багьла-багьлали ил галга адамли сунела мерличи тIашбатур ва чIянкIдиубти хIячми гIянжиличил кIапIдариб… ХIера, адамтала излуми-зугIлумала кадиркути «галгуби» чула мерличи тIашдалтуси специалист сай ревматологра.
Сунела бузерила мерличив ил ца минутла манзиллисалра паргъатли кайили чеэс хIейрар. ДекIар-декIарти излумани кьакьабакIахъибти ва иличи гъамбирути адамти бахъал бирар, илдас кумек гIеббаахъес сайра гьалакли вирар. Гьайгьай, илдала къугънира камли хIедирар, амма илини гьарил адамличи сабурличил гъамиэсти имканти дургу ва зягIипси паргъатвирахъу. Ил зягIиптачил вархибси замана ахIи варгес хIерируси ну иличила макьала белкIес ибси кьасличил, чумал гъай дурахъес или гъамриубра. Ил разихIейкиб. КIинайс, илини сунела баркьуди зягIиптас хасбарибси манзил цархIил тяхIярли пайдалабарес асубируси ахIен или баянбариб. «СанигIят яра давла-мас хIясибли ахIен адамличи хIеруди бируси, — викIулри ил, — тухтурлизир бегI гьалабси яргализир, адамдеш ва сабур-яхI диэс хIяжатти сари».
— Гьарил тухтур, бегI гьалабси яргализив, психологли виэс хIяжатси сай. ЗягIипсиличи вегIла неш-дудешличиван хIерикIес ва илдасгъуна кумек гIеббаахъес гIягIниси саби, — бурули сай ГIялишихли. — Иша имцIали инсультлизи бикибти бирар башути. Илдас гьар шайчибадли кумек гIеббаахъес нушара къайгъилизир дирехIе. Нушала больницализир ишхIелла манзиллизир бегIлара гIяхIтази халдирути дурхъати гIягIниахълуми лер. Мисаллис, ца аппарат 28 миллионничи абиркули саби. Илала кумекличил инсультлизи викибси адамла биркIанти дузескайути сари. Сай аравиэс багьандан зягIипсира кьаслизи кайзурли, тухтуртанира къайгъни дакIударалли, инсультлизи викибси адам аракайрули сай ва улхъести имканти алкIули сари. Бахъал бирар иша гIяйсначил бакIили, илди агарли арбашути. ХIейгеси биалра, машинабала бехIемцIлизи бикибти, къакъла лига бячунти, букIмала излумани баргибти, кьяшмала лигуби дарсдарибти бахъал башар иша. Илдас бирусигъуна кумек гIеббаахъес больницала хIянчизартира кьаслизиб бирар.
Тухтур, гьайгьай, малхIямси виэс гIягIниси сай, амма хIяжатси мерличив къалабали масъала арзес бажардииркусили виэсра чебиркур. УркIецIидулхъули или зягIипсилис кумек гIебхIебаахъили балтуси ахIен. ЗягIипси виргIявиргили, кумек гIеббиахъуси заманара къаршибиркули бирар тухтурла баркьудилизиб.
Дила неш рирар набзи гъайрикIули ва цархIилтиван узахъес, хIериахъес маслигIятрикIули. Дила чархлис ряхIятдешра някълизиб арцра диубли дигули рургар илис. Дила пикрили, арц лерни вайси ахIен. Амма давла-масличиб адамтала баркалла дурхъасили чебиис нуни. Къияндикибсилис кумекбарни Аллагьла ва халкьла гьалаб дурхъаси баркьуди дураберкIни саби.
— ГIергъиси замана бахъал адамти инсультлизи биркули саби. Илгъуна изайзи хIейкес багьандан сегъуна мяхIкамдеш барес хIяжатли? — суалрухъунра ну тухтурлизи.
— БегI гьалабси яргализиб 40 дус виубли гIергъи дусли гьачам гьарил адамли ахтарди дурабуркIес хIяжатси саби. ЦархIилти регионтазиб адамтази илгъуна ахтарди дурабуркIахъули саби. Нушала республикализибра илгъуна баркьуди дурабуркIалри, гIяхIсири. Адам узуси виаб яра хIевзуси виаб, селичилра хIерхIеили, чебетаахъили ахтарди дураберкIес хIяжатси саби. Илкьяйда хIебаралли, вегI шакра хIейкили, инсультли ургули вирар.
КIиэсилра — арати гIямру дуркIес хIяжатбиркур. Беркайчи чекайзурли, вегIлис пайдаласицун хурег букес гIягIниси саби. Кайибси санигIят бузахъуси адам чекайзурли физкультурализи ихъни пайдаласи саби. Мурталра шадли ва разили вирес къайгъибирес, гьалакхIейкIес, сабурбирес гIягIнибиркур. Бамсриихъесра замана бургес чебиркур. ВегIла чарх гIяхIси даражаличиб биахъес гьарил адам чекайзес гIягIниси саби.
Инсультлизи викили гIергъи, тухтурличил варх зягIипси сайра сунела аги къулайбиахъес багьандан, къайгъибирес хIяжатси саби. Адамла бекIла мехIелизирти нейронти ца мерличир зарайзи дикили диалли, цархIил мерличирти нейронти жигарчердирули сари ва адам аравиахъести имканти алкIахъули сари. Мисаллис, зягIипсила някъ хIебузули биалли, илис нейронтани буйрухъбирули саби зягIипикес гьалаб кьяйда декIар-декIарти хъарбаркьуни тамандирахъес, беркайчил някъ кIунтIубачи гъамбиахъес, се-биалра ахъбуцахъес яра кабихьахъес.
Дахъал хIянчилизи вархибси, халкьсун гъайвикIесалра замана агарси ил чейули, нуни гIурра илизи хьарбаира:
— ПашманхIейублирив тухтурла санигIят чеббикIниличи, хIедкIун гьигьбатесалра замана агара?
— Юх, бекIлил пашманхIейубра. Гьаннала гIергъи санигIят чеббикIес хIяжатбикаллира, ну чIянкIли тухтурцун ветараси. ЦархIил санигIятличила пикриухъесалра хIейги ва тухтурла санигIят касни дила уркIили чеббикIибси чебяхIси баркьуди саби.
Ну 4-ибил курслизив учIухIели, дила дудеш зягIипикибсири ва нуша республикала центральная больницализив узуси Ибрагьим Шамовличи дугьадизуртири. Дудеш иличивадли дураулхъухIели набзи викIар «Тухтур виралли, илгъуна виэс хIяжатси сай». ИлхIели дила дудешла дяхIличирти разидешла нур ва хIулбазир алкунти умутунала зубарти хъумартес хIейрулра гьаннара. ИтхIели 70 дусла гIямрула тухтурли англияла мезличилси медицинала жузлизиб серил белчIун ва нушаб дудешла изайчила баян гьалабихьиб. Ил баркьудили чебиахъулри адам лерилра гIямрулизив учIес хIяжатси биъни.
И.Шамовла лекциябира наб лергIер пайдаладиуб. Ил духуси, пагьмучевси, хабарла тухтурлизирадли дахъал мисалти гIерасес вирусири. Илала гIяхIдешли чумра пайдалати секIайчи бурсира виубра. Нуни гIячихъли аргъира тухтур ветаэс дигусини сунела уркIила ва рухIла жи чебяхIси санигIятличил цадарес, пикруми умутили ва хIялалтили диахъес хIяжатли биъниличила.
ГIялишихла дудеш ХIяжиламяхIяммад ДейбукIла гехIел дусла школализив 15 дусцадхIи директорли узули калунсири. Илини географияла, биологияла дурсри кадирхьутири. Ил узусири бехIбихьудла классунас дурсри кадирхьулира. Илини илкьяйдали 40 дусличибра имцIали шантала дурхIни мурхьти багьудлумачи ва гIибратчебси бяркъличи биркахъутири. Илала хьунул Райгьанат МяхIяммадова школала библиотекарьли рузусири. ГIялишихла узи Идрис юртани лушан сай. Райзанат бикIуси рузи дурхIнала анхълизир рузули сари, Аминат биалли – хъали-цIализир.
ГIялишихла гIямрула марси гьалмагъ Дианани политехнический институтла экономический факультет таманбариб ва санигIят хIясибли рузес хьулрикIули сари. Ил къугъаси хъалибарглизиб акIубти 3 дурхIя леб. Амина ва Фатима школализиб бучIули саби. МяхIяммад биалли, лябкьуси дуслизив сай цаибил класслизи аркьуси.
Тамара ГIябдусалимова
