Чула жан кьурбандарили, гIядатла адамти уцахъути полицияла хIянчизарти агарти биаллири, сегъуна аги биишира республикализиб ва арагIебли улкализиб?
Июньна 23-личир МяхIячкъалализир ва Дербентлизир ярагълабиубти къачагъунани хIиллаби дурадеркIили, лебилра халкь уркIаибтири. Низам-кьяйда далтахъути органтала хIянчизартала ва къачагъунала ургарти къалмакъарлизиб духIнарти къуллукъунала Министерстволизиб бузути 16 хIянчизар алхун. Илдазивадли ца сайри хIурхъан багьадур ХIябиб ГIялиевра.
Дубуртар Улкализиб акIубти мурул адамтани саби гIяхIгъабзала бебкIали алхни гьалаб чебиуси саби, чина-биалра дигIянбикили, чучи дукаркIахъули, хIербирниличиб. Илди душмайс мутIигIхIебикIути, бебкIала хIулбази урехиагарли хIербикIути адамти биъни чуйнара якьинбиубсигу.
Ибкьти аги-кьяйдализиб полицияла хIянчизартас сабицунра ахIи, мерличибти адамтира мяхIкамбарес гIягIнисири. Илкьяйда бариб сержант ХI.ГIялиевли. Илини такьсирчибас къаршидеш дирухIели, сунечибадли гьарахъли ахIенси юртла унза абхьили, хъа вегI жиикIулри, сержант дигIянавиахъес дигули. Илкьяйдали хъа вегIлис вяхъибси сержантлис медицинала кумекра гIеббаахъес дигулри. ДигIянавиубли сунела гIямру дерцахъес вири ХIябибли, амма илгъуна баркьудиличибли хъа вегI урехилизи виркахъниличила аргъиб ва кьабулхIейкиб. ИлхIели «Ну иткъира каршурану, хIу хъули ацIи, унза гIекIа ва дигIяники» или барх бузутас кумекличи музаухъунсири. Сунела юлдашлис ва барх бузутас кумекличи музаухъунси сержант, ламартла хIярхIяли варгиб. Вайнукьабала хIярхIяли ХIябибла юлдашла гIямрура къябдердахъиб.
«Урехиласи анцIбукьлизив гьарил адам сунечила пикриикIули вирар, амма ХIябиб, илгъуна анцIбукьлизивра, цархIилтачила сайри пикриикIуси. ХIебалас, адамти сегъунти пикрумачил, сегъуна уркIиличил дурабулхъутил сабигъунти адамти кабушес.
ХIябиб халасигъуна узи сайри, нушала виштIаси узира левси сай. Школализив учIути дусмазив ХIябибли нуша кIелра жагали бекIдирутири. БегIти чина дурабухъалра, нешла уркIи паргъатли бири, ХIябибли нуша гушли яра милигли хIедалтни, ну школализирад, виштIаси узи дурхIнала анхълизивад леркни балули. Ил нушачи дебали уркIи изуси узи вири. Гьаннала жагьилти дурхъати телефонти, машинаби асес гъазализиб саби, ХIябиб биалли, илдачи хьулхIейкIи. Ил нушаб хIяжатти секIултачил гIердуцес къайгъилизив вири», — буриб ХIябибла рузи Саидани.
Вайси анцIбукь кабикес гьалар бегIтачи зянкъдяхъили, смена таманбиубхIели, хъули лявкьяс или багьахъурсири ХIябибли. Сепайда, чумал сягIятла бухIнаб кабикибси кахси анцIбукьли бара хъилизи дизурти сержантла гIямрула ги къяббердахъиб.
«Ну иткъира каршурану, хIу хъули ацIи, унза гIекIа ва дигIяники», — ибти полицияла сержант ХIябиб ГIялиевла бегIлара гIергъити дугьбани сай урехиагарси багьадур виъни иргъахъули саби. Жагьси уршила гъабзадешли ва игитласи гьунарли лебилра хIяйранбиахъуб. Илдигъунти сартан буцIи лебай, чилра нушачивад чедиикес хIейрар.
2016 ибил дусла дуцIрумлизив къачагъунала някъбазивад алхунси гIяхIгъабза, Россияла Игит МяхIяммад НурбяхIяндовгъуна хIурхъан багьадур сайри полицияла сержант ХIябиб ГIялиевра. КIелра Игитла аслу-мина Сергокъалала районна ХIурхъила шилизир сари.
ХIябиб ГIялиев гьалмагъунала къушум жагабируси, марти гьалмагъдеш дузахъуси, биштIа-халатачил гъай дургуси, масхара-мар балуси адам вири или гьанбиркахъули саби илала юлдаш-тянишунани.
«Ил гьарли-марси юлдаш вири ва кайзурси гъабза сайри. Краснопартизанскла школа таманбарили гIергъи, гIямру дявила къуллукъличил дархдасес дигули, дявила балбуцлизир пайдаладирути ракетабала гIяскуртала шайчибси дявила училищелизи керхес кьасбарибгу, бетхIеур. ИлхIели ХIябибли РФ-ла оборонала Министерстволичил вягIда бигьунсири ва кIел дус урхьула пехотализиб къуллукъбарибсири. Илала гIергъи, полициялизи шурухъун. Илини ВГУЮ-ла (РПА Минюста России) Северный Кавказла институтла юридический факультет хъараахъурсири.
ХIябиб нуша-ургав агниличи вирхаэс вирули ахIенра. Илала бебкIа дебали халаси бетахъри саби нушаб», — викIи ХIябиб ГIялиевла гъамси юлдаш ГIялигъалбацI ХIусейнов.
ДакIударибти гъабзадеш багьандан полицияла сержант ХIябиб ГIялиев Гъабзадешла орденничил шабагъатлавариб, вебкIили гIергъи. Буралли, июньна 23-личиб алхунти полицияла лебилра хIянчизарти Гъабзадешла орденничил шабагъатлабирнила ХIукму кьабулбариб РФ-ла Президент В.Путинни.
Ит кахси анцIбукьлизиб алхунти полицияла хIянчизарти гьалжанала агьлула биаб, нушала республикализиб даршудешла аги калаб.
ПатIимат Мирзаева
