Гьамадли ахIенти кьис­матунала бегIти адамтани, чули севан гIям­рула кьячIикIуни ихъули диалра, илдачил цархIилти бяхI­хIе­гахъес багьандан, чули би­ру­­сигъуна кумек гIеббаахъес къайгъилизиб бирар. Чула па­сихI­деш­ли, уркIила ванадешли ил­ди­гъунти адамтани алавчартира Бер­хIила нурливан шалабиру.
СягIидов ГIямар ХIяжиевич акIубси сай 1944 ибил дусла май­ла 24-личив, Дахадаевла районна Ху­дуцIла шилизив, бахъал дурхI­на­ла хъалибарглизив (4 узи ва 3 рузи).
ГIямрули биалли, лебтанилра балуливан, селра ва чилра мяштI­би­рули ахIен, ил лу­гIи­лизиб – нуша-ургаб бегIлара гIяхI­ти­гъун­ти адамтира. Амма къияндешунани саби цIакьти ва гIяхIти адамти дебш­лабирутира.
Дила белкIла игитла дудеш ялчи сайри, неш колхозлизир рузусири.
ГIямар верхIел дус виубхIели ХудуцIла школала цаибил класслизи вякьунсири. Илаб верхIел дусла школа таманбарили, ГIяш­ти­ла шилизибси урга даражала шко­лализи вашескайиб. Багьудлу­мачи гъаргъси уршили школа унк­ъли таманбарили, Ростовла ра­диоэлектроникала техникумра (1955-1959-ибти дусми) «шула» кьиматуначил хъараахъес бажардиикиб.
ГI.СягIидовли сунела бузерила цаибти гунзри кацIибтири линейно-технический центрлизир (ЛТЦ), 1960 ибил дусличивад ил узес вехIихьиб. 1963 ибил дусличивад 1966 ибил дусличи бикайчи Лавашала районна Лавашала шилизибси ЛТЦ-ла начальникли узули калун. 1967 ибил дусличивад 1987 ибил дусличи бикайчи Хайдакьла районна Мажалисла шилизибси ЛТЦ-ла начальникла хIянчи дариб. 1988 ибил дуслизив биалли, ил Дербент шагьарла ЗУС-ла начальникла къуллукъличи шурухъун. Гьарил сагаси къуллукъличил ГIямар СягIидов бузерилизив гьалавяхI вашу­си­ри, санигIятлашалти ус­та­деш чедирцIахъутири. Ла­­вашав, Мажалислизив, Дер­бент­лизив узули хьалли, илини сунела биштIаси ва­тIай­чилара ца минутлисалра хъу­муртуси ахIенри, ва мур­тал­ра сунела шантала гIям­ру­лизир бутIакьяндеш дирутири, кумек хIяжатсилис ил гIеббиахъусири.
Сабухъчебси бузери багьандан, ил «ДР-ла урибси связист» ибси хIурматла уличира лайикьикибси сай.
ГIяхIси хIянчизарцунра ахIен­ну, ил хъалибаргла пергер бекIра сай. Сунела гIямрула рархкьячил илини шел дурхIя (4 — рурси ва 1 — урши) абикьур, бяркъличи бикахъиб.
Буралли, сунела хIянчила дурарад ГIямар СягIидовли жа­ми­гIятла гIямрулизирра жигарла бутIакьяндеш дирути сари. Ара­гIебли Дагъистан нешла мез мяхI­кам­дарес хIяжатли биъниличила гъай­бикIухIели, илини адамтас багаласи хIяракатлизи сунела баркьудлумачил белгиси пай кабихьиб. Чумал дус илини сунела ахIерси школалис кумекбирули сай, хIяжатти гIягIниахълумачил гIеббурцули, ил лугIилизир – дарган мезла жузира исули.
2013 ибил дуслизив ил пенсияличи арякьун. Биалра, ил бамсриихъули, виаркайруси адам ахIен. Илис дигахъу назмурти цаладирхъес. Даим кумекбирули вирар гIям­рула къиянти аги-кьяйдализи би­кибтас. ГIяхIбаркьла баркьудлу­ми дурадуркIес ил сеналра умс­хIем­­сар.