Майла ванати бурхI­на­зиб бахъал­гъунти шагьар­ланти чула шимази ша­дибгьуни дураберкIес арбя­кьун. Илдас дубурла умуси гьава гьигьбарес, къугъати вава-кьарла кьалтинни вах­ка­даршибти ургубикад къунз­бухъес, арцантала далуй­тачи ва хIуркI­бала вихла тIама­личи лехIбизес имкан­бакIиб.

Лебтасалра дигахъуси Даргала театрла гIяртистка Раши­дат ИсмягIилованира бара гьа­лаб­ван тамашала архIя дура­беркIиб. ГIяртистунала гIямру иткъира анцIдукьести хIе­диалра, ил архIяли Рашидатла уркIиличи халаси асар бариб.

ГIямрула гьундурани ил Сергокъалала районна ГIя­яма­хьилизи раахъиб. ГIяр­тист­ка рахъхIи риублири ила рукьес дигули, гьанна саби илис сунела уркIила мурадличи раэс имканбакIибси. Рашидат Ис­мягIи­ловала санигIятли сунела хьул бартаахъес кумекбариб. Майла бехIбихьудличиб ил шилизивад дураухъунси РФ-ла ва ДР-ла культурабала урибси хIянчизар, Дагъиста бузерила Игит, СССР-ла ва Россияла машгьурси режиссёр МяхIяммад Сулайбановли Р.ИсмягIилова сунела сагаси, хасти документуначи хъарахъибси кинолизир бутIакьяндеш дарахъес жирариб.

ХIера, Рашидат МяхIяммад Мирзаевичличила се рикIулил: «МяхIяммад Мирзаевич дебали пагьмучевси адам сай. Илини 120-личирра имцIали хасти кагъуртачи хъарахъибти киноби касиб – «Дагъистайзиб ислам», «Дагъистан – дила хъали», «Дила уркIи дубуртазиб саби», «Нешани мяхIкамбарая», «Шакикни» ва цархIилтира. Илди лерилра вегIла ванзаличи, халкьличи, ВатIа машгьурси ва давлачебси тарихличи режиссёрла дигили цаладяхъили сари. Иш гьакIлизиб илала яргаличилси хIянчи сунела ахIерси шилис хасбарили сай, сабира шантани бархьбалтули, бубкIуси. ЧебяхIси Чедибдешла БархIи, МяхIяммад Мирзаевичла тилади хIясибли, «БебкIаагарси полк» бикIуси лебил Россияла балбуцлизир, илкьяйдали документуначи хъарахъибси фильмлизирра бутIакьяндеш дарес гIяямахьиланти шилизи чарбухъун».

Съёмкаби тамандиубли гIергъи, сари риштIахIели ха­ла нешли дурути, уркIилис дур­хъати мер-мусаличи раэсра имканбакIиб Рашидатлис. Буралли, хала нешли са­ри Рашидат ИсмягIиловазир даргала поэзияла дудеш ГIямарла Ба­тирайла назмуртачи диги акIахъубтира. Хала нешли сари русахъес карилхьахъухIели, поэтла дугьбачил  далуйти дучIни гьанбиркахъули сари гIяртисткани. Наслубачилси бархбасла гIяхIдешличибли, Рашидат рухIлашал давлачерриуб ва, кьисматли илис  ГI.Батирайла уличилси Даргала театрла гьаркьяси гIяртистка ретаахъес кьадарбиахъуб. Гьайгьайрагу, Рашидат ИсмягIилова поэтла хIябличира рякьун.

Сунела дурхIядешла гьанбикуназибадли бурни хIясибли, Рашидат 2 дус риуб­хIе­ли, илала дудеш ахиратла хъули арякьунсири. Хала дудешлис, ЧебяхIси ВатIа дергъла ветераннис, Избербашлизиб квартира бедибсири ва хала нешлира хала дудешлира Рашидат чучил рарх шагьарлизи гечрарибсири. Рашидатла нешра, узира, рузира шилизиб калунтири. ИлхIейчирадли гIяртистка сунела ахIерти мер-мусаличи рякьунси ахIенри ва, М.Сулайбановли кинолизир бу­тIакьяндеш дарахъес жирарнили, илис сагадан аслу-миналичи раэс имканбакIиб. Илала шалати гьанбикуни ва уркIила хIялани кагъарлизир дурес хIейрар – ил хIулбазир бисаличилси разидеш сабри.

Маргарита Арсланбекова,

ГI.Батирайла уличилси Даргала театрла жамигIятличилти ­бархбасунала шайчирси специалист