БегIтани бедлугуси гIякьлулис ва мугIяллимтани кайсахъути багьудлумас кумекли бетаруси саби кьакьализиб дурхIнани кайсуси дарсра. Гьалаб шила дурхIни мурталра дурсри тамандиубли гIергъи, кьакьализиб хIязтазиб бирутири дусмазиб. Каникултала заманацунра ахIи, школализи башуси манзилра дурхIнани мицIираг дуки дикули бири. БегIтас, бухънабас ва цархIилти шанила халкьлис илдани мурталра кумек гIеббиахъусири. Илкьяйдали аратили ва кьуватчебтили халабиутири дубурла шимазибти дурхIни.
Амма сегъуна-биалра спортла журализи ахъес илдала имканти камли дири. Ил багьандан бурги сецад цIакьти биалра, дубурланти камли машгьурбирути. Бархьси саби, нушачи гIергъити дусмазир гIяхIцад хабурти дашули сари, дубурланти багьадуртани дунъяличир чула гьунартачил хабардурхахъниличила бурути.
Илдигъунтазивадли сай Дахадаевла районна Гъуладтила шилизивадси МяхIяммадрасул Рабадановра. Гьалавван ил «Титаны» бикIуси реалити-шоулизив чедиикили сай. Ил балбуц ТНТ каналлизиб чебаахъибсири. Абзлизи кабизурли саби улкала цIакьтигъунти 99 спортсмен. Илди цаибил мер буцес багьандан, бажардилизибтири. Спортла декIар-декIарти бетуцуназиб декIарбухъунти дунъяла ва Европала чемпионти, Олимпиадала хIязаназиб гьаларти мерани сархибти цIакьти спортсменти лебри илди-ургаб. Ил ибкьси абзлизив чедиикибсилис бекIлибиубси савгъат сабри кубок ва 10 миллион къуруш арцла. Илди сархиб Гъуладтивадси уюнти чедиахъан (каскадер), лусентачи айцIан (скалолаз) МяхIяммадрасул Рабадановли.
МяхIяммадрасулли, кьуватчевси спортсмен сайливан. акробатикала лергIер къиянти уюнти чедаахъесра гIяхIил бажардиикиб.
Балбуцла башрилизир илала бутIакьянчибани дахъал хъарбаркьуни тамандарес хIяжатлири. Илди цаличиб ца цIакьтири, гIяхIил хIядурбиубтири ва хIербикIуталара судьябалара гьалаб чула цIакь ва пагьму чедаахъес къайгъилизибри. Амма лебтачивра цIакьсили увухъун дубурлан урши.
Ил чедибдешли арцла шабагъатцун ахIенри илис хибси. Челябкьлализиб сунела кьисмат барсбаресил анцIбукьли бетаур ил. Иличила хабар дунъяличи тIинтIбиуб. Илала дурабадлира, цархIилти жагьилтасра ил гIяхIгъабза мисалли ветаур ва илдала сагати ахъанайтачи абацIахъес иштяхI имцIабиахъуб. Сунечи сай чекайзнили ва бажардили спортлизир ва гIямрулизир сегъунти-дигара черяхIти ганзухъуначи ваэс вирни якьинбариб илини.
ХIера, сунела чедибдешличила се бурулил спортсменни:
— Абзанала асарлиув левалсиван билзули, гьаннара пикривикIулра, марлира, улкала чеббикIибти атлетуначивад ну чедиикес виубрав или. Ахирра абз таманбиублив? ГIур цIакьтигъунти къаршикартачил абзикIни ахирличи бикилив?
Нуни дила гъамтази ва хъалибарглизи багьахъурси ахIенри шоулизир бутIакьяндеш дирниличила. Илдани ил балбуц эфирлизиб чебаибхIели сабри багьурси ну чинав сайрал. Илис гьалаб илди паргъатли кабиилри, ну дубуртазив ургар или.
Ламус-хатир агарси ва гьалакси къаршикар Анатолий «Конор» Надратовскийличил финалличив къаршиикибсири МяхIяммадрасул Рабаданов. БегIлара адуцалачевси ва паргъатси дубурлан уршира илгъуна сабурагарси ва МяхIяммадрасулличив гIяхIцадла декIси Анатолийра дебали къиянси ва мягIничебси абзлизи каберхурхIели, илдачи хIербикIутазибадли уруслан урши чедииркниличи имцIатигъунти бирхутигъунтири. Амма, дубуртани вяркъурси арслай хIербикIути хатIабикахъиб…
— «Конор» гIяхIси шоумен сай, – бурули сай М.Рабадановли, — бегI гьалаб наб гьанбикиб илис адамти тамашабиахъес дигули сай или. Амма ил урехиагарси ва кьасчевси сайли увухъун. Абзлизир илини сунела илдигъунти хасиятуни чедиахъулри. Илис сеналра мукIурвакIес дигули ахIенри ва кьаслизи кайзурлири. Ну дубуртазив акIубсира ва дубурлантала асарлиув халаваибсира, иларти хала дудешунала ва дудешунала дурсри дяркъурти сари нуни. Дубуртазив ну гьатIира цIакьти жанивартачил – буцIачил къаршивиркули калунсира. Ил багьандан дубурланти чизибадалра урухбирути ахIен.
Набзи хьарбиули саби чидил бегIлара цIакьагарси къаршикар сайри или. Ил абзлизив цалра аги кьуватагарси, лебилра ункъли хIядурбиубти ва хабардерхурти спортсменти сабри. ЦабехIтас жявли абзлизибад арбукьес кьадарбиуб, цархIилтас чула гьунарти чедаахъес замана хIебаиб.
Ургав нура гьалакиубра ва абзлизивадли аркьули хIилхIи калунра. ГIур ну ибкьли гьалавяхI вашес кьаслизи кайзурра. Абз ахирличи биркухIели, Кратосличил ва Виссарионничил къаршиикибсири. Нуни набзи чIумали бурира гьалавяхI, чIянкIли гьалавяхI финалличи ваэс или.
Ца абзлизиб наб дебали къияннири къаршикарлизибадли мурчI зузбирухIели. ИлхIели дила къакъ дебали изесбяхIиб ва мурчI батаэсил даражаличи викира. Амма уркIи чIумабарира, мукIурхIекIира, чедиикира.
Ну страховка агарли шурмачивад вашусира, азадли мушулвашусира, кикбоксинглизир ва капоэйрлизир, ММА-ла абзаназир бутIакьяндеш дирути сари. Ил багьандан къияндешуни чекайсесра бурсивиубсира. Иличибли чедивикесра имканбакIиб.
Наб гибти арц нуни дугIли харжхIедирис. Илди гIяхIбаркьлис пайдаладирис. Кумек хIяжатсилисра дедес вирус. Дила пикри саби школалис ва кино кайснилис бегI гьалабси яргалис илди пайдаладарес.
Набзи тренерти спортла ца жура чеббикIа, хIуни Олимпиадала хIязаназир бутIакьяндеш дарес вируд или бикIули бирар. Илдала пикри бархьси саби. Илди бикIуси барес дигахъира. Артур Далалоянни ва Денис Лебедевливан нунира спортла ца жура чеббикIес хIяжатбиркур. Амма дила хасият хIясибли, ну гьар мерличи чеветиэс хIяжатси саби. Сеннира дила тренертала ибси бирис, ММА-личил, боксличил яра азадли мушулвашниличил дила кьисмат цабирис.
Илгъуна чедибдешличил МяхIяммадрасул мубаракварес лайикьли сай. Илис гьаннала гIергъира къаркъагъуна арадешра, спортлизир дахъал чедибдешунира, гIямрулизир гьарбизунира, талихIра дулгехIе.
Тамара ГIябдусалимова
